އެމެރިކާ އަލިފާންގަނޑު އަލިފާނުގެ ނަގޫރޯޅިއާއެކު ލަވަމުން ފެތުރެނީ

އެމެރިކާގެ މުއްސަނދިންގެ ސަހަރު ކެލިފޯނިއާގެ ލޮސް އެންޖަލިސްގައި މީގެ ދެ ހަފުތާ ކުރިން ރޯވި އަލިފާންގަނޑު ވައި ގަދަވުމުން ހަމައިން ނައްޓާލައިފި އެވެ. 

އަލިފާން ކޮންޓްރޯލް ކުރަން އެމެރިކާގައި ހުރި ހުރިހާ ވަސީލަތްތަކެއް ބޭނުން ކުރަމުންދާއިރުވެސް އަލިފާންގަނޑު ކޮންޓްރޯލްވުމުގެ އަލާމާތެއް ނުފެނި އިތުރަށް އެކި ދިމަދިލާލުގައި ހިފައި ދަނީ ފެތުރެމުންނެވެ. 

އަލިފާންގަނޑު މައިތިރި ކުރަން އަލިފާން ނިއްވާ މީހުންނަށް އެންމެ ބޮޑު ގޮންޖެހުމެއް ކުރިމަތިވެފައިވާ މައިގަނޑު ސަބަބަކީ އެ ސަރަހައްދުގެ މޫސުން ތަން ނުދިނުމެވެ. މި ވަގުތު ލޮސް އެންޖަލިސްގައި ވައިގެ ބާރުމިން ހުރީ 100-70 ކިލޯ މީޓަރުގެ ބާރު މިނުގަ އެވެ. 

މި އަލިފާންގަނޑަށް ތެޔޮ އެޅުންފަދަ ނުރައްކަލަށް ވަނީ އެ ސަރަހައްދުގައި އުފެދެމުންދާ އަލިފާނުގެ ނަގޫރޯޅި ތަނެވެ. މިކަމުގެ ސަބަބުން އަލިފާން ނިއްވާ މީހުންގެ ފުރާނަ އަށް ވެސް ވަނީ ނުރައްކާވެފަ އެވެ. ނަމަވެސް އިތުރު އަލިފާން ނިއްވާ މީހުން އެކި ހިސާބުތަކުން ގެނެސް އަލިފާން ކޮންޓްރޯލް ކުރުން ވަރުގަދަ ކުރަން އެމެރިކާއިން ދަނީ މަސައްކަތް ކުރުންނެވެ. މިވަގުތު ވެސް 1000 އަށްވުރެ ގިނަ ފަޔާ ފައިޓަރުން ދަނީ މަސައްކަތުގައި ބައިވެރިވަމުންނެވެ. ނަމަވެސް އަލިފާންގަނޑު ކޮންޓްރަލް ނުވެ ލޮސް އެންޖަލިސްގެ 38,600 އޭކަރުގެ ބިން ވަނީ އަނދައި އަޅިއަށްވެފަ އެވެ. 

މި އަލިފާންގަނޑު ހަމައަަށް އެޅުވިފައިނުވާއިރު، އަލިފާން ލަވަމުން ދަނީ ލޮސް އެންޖަލިސްގެ އެތެރެ އަށެވެ. މިހާތަނަށް 25 މީހުން މަރުވެފައިވާ ކަމަށް ޔަގީންވެފައިވާއިރު ގެއްލުމުގެ އަދަދު 150 ބިލިއަން ޑޮލަރަށްވުރެ ބޮޑެވެ. 

ލޮސް އެންޖެލިސް ކައުންޓީގެ ފަޔާ ޗީފް އެންތޮނީ މެރޯން ވިދާޅުވި ގޮތުގައި ލަފާކުރެވޭ ވައިގެ ބާރުމިން ހުރި ގޮތުން އެކު ހޫނުމިން ދަށްވުމާއި މި ސަރަހައްދުގައި އަލިފާނުގެ ނުރައްކާ ބޮޑުވުމުގެ ފުރުސަތު އެބައޮތެވެ. 

އެމެރިކާގައި ރޯވެފައިވާ އަލިފާންގަނޑުގެ ސަބަބުން 150،000 އަށްވުރެ ގިނަ މީހުން ވަނީ އެހެން ސަރަހައްދުތަކަށް ބަދަލުކޮށްފަ އެވެ. އަދި 10،000 އަށްވުރެ ގިނަ ގެ ވަނީ އަނދައިގެން ގޮސްފަ އެވެ.