ޕްރޮމޯޝަނަކާއެކު ގައުމީ އެއާލައިން ޗައިނާ ފްލައިޓްތައް ޝެޑިއުލަށް

ޗައިނާގެ މަންޒިލްތަކަށް ދެވޭ އެންމެ ހެޔޮ އަގާއެކު ގައުމީ އެއާލައިންއިން ޗައިނާއަށް ދާ ފްލައިޓްތައް ޝެޑިއުލްގައި ހިމަނައިފި އެވެ. 

ގައުމީ އެއާލައިން އިން އަލަށް ގެނައި ވައިޑް ބޮޑީ އެއާބަސް 330 ގެ ބޯޓުގައި ޗައިނާއަށް ކުރާ މި ދަތުރުގައި ތިން މަންޒިލަކަށް އުދުހެން މިހާތަނަށް ޝެޑިއުލްގައި ހިމަނައި ޓިކެޓު އަގުތައް އާއްމުކޮށްފައިވެ އެވެ. މި ދަތުރުތަކުގައި ދާ ކޮންމެ މީހަކަށް 40 ކިލޯ ލިބެ އެވެ. މިއީ ރާއްޖޭން ޗައިނާއަށްދާ ފްލައިޓަކުން ދޭ އެންމެ ބޮޑު ބެގޭޖު އެލަވަންސެވެ. 

މޯލްޑިވިއަން އިން ޗައިނާގެ މަންޒިލްތަކަށް މިހާރު އިއުލާނުކޮށްފައިވަނީ ފްލައިޓްތައް ފެށުމާ ދިމާކޮށް ކުރިއަށް ގެންދާ އިނޯގްރޭޝަން ފެއާ ތަކެވެ. މިއީ މިހާރު ރާއްޖޭން ސީދާ ޗައިނާގެ މަންޒިލްތަކަށް ދެވޭ ގޮތަށް މިހާރު ރާއްޖޭގައި ހުރި އެންމެ ހެޔޮ ފެއާ އެވެ. މިހާރު ރާއްޖޭން އެންމެ އަގުހެޔޮކޮށް ޗައިނާއަށް ޓިކެޓު ވިއްކާ އެއާލައިންގެ ޓިކެޓުގެ އަގުވެސް ހުރީ ޓެކްސް ނުހިމަނައި 500 ޑޮލަރަށްވުރެ މަތީގަ އެވެ. އެ އެއާލައިންއިން ސިންގަޕޫރު އެއާޕޯޓުގައި ގިނައިރުތަކެއް މަޑު ކުރަން ޖެހެ އެވެ. 

މޯލްޑިވިއަން އިން ވަނީ މިމަހުގެ 22 ވަނަ ދުވަހު ޗައިނާގެ ޗެންޑޫއަށް ސީދާ ފްލައިޓްތަކެއް ފަށަން ނިންމާފަ އެވެ. "މިރާ" އަށް އެނގިފައިވާ ގޮތުގައި މި ފްލައިޓްތައް އޮތީ ގާތްގަނޑަކަށް ފުލްކޮށެވެ. އަދި މި ފްލައިޓަކީ 10 ޓަނުގެ ކާގޯ އުފުލޭ ފްލައިޓަކަށްވުމުން ޗައިނާއިން މުދާ އުފުލަންވެސް ބޮޑު ޝައުގުވެރިކަމެއް އެބައޮތެވެ. 

ގައުމީ އެއާލައިން އިން މިފަހަރު ގެނައި ބޯޓަކީ އެއް ފަހަރާ 260 މީހުން އުފުލޭނެ ބޯޓެކެވެ. މި ބޯޓުގައި ތިން ކްލާސް އޮވެ އެވެ. ބިޒްނަސް އަދި ޕްރިމިއަމް އިކޮނޮމީއާއި އިކޮނޮމީ ކްލާހުގެ ގޮނޑިތައް މި ފުލައިޓުގައި ހުންނައިރު 10 ޓަނުގެ ކާގޯ މި ބޯޓުގައި އުފުލޭނެ އެވެ.