ޓްރާންސްފޯމަރު ވަގު ހިފި މުވައްޒަފުންގެ އަގު ވަޒަންކޮށްފި

ހިޔާ އަވަށުގައި ހުންނަ ޓްރާންސްފޯމަރު ތެރެއަށް ވަދެ ވައްކަން ކުރަން އުޅުނު ވަގު އަތުލައިގަތް ސްޓެލްކޯ މުވައްޒަފުންގެ އަގު ވަޒަންކޮށްފި އެވެ. 

ސްޓެލްލޯގެ އިން މި މުވައްޒަފުންގެ ހިދުމަތުގެ އަގު ވަޒަން ކުރުމުގެ ގޮތުން ބޭއްވި ރަސްމިއްޔާތުގައި ސްޓެލްކޯގެ އެމްޑީ ހުސެއިން ފަހުމީ ވަނީ މުވައްޒަފުންނަށް މެޑަލް އޮފް ބްރޭވަރީ ނުވަތަ ހިތްވަރުގަދަ ކަމުގެ މެޑަލް އަރުވާފަ އެވެ. 

މި މެޑަލް ދީފައިވަނީ އެ ކުންފުނީގެ މުވައްޒަފު އަޙުމަދު ވިޝާން އާއި ސަރުވާން މުޙައްމަދަށެވެ. މި ހާދިސާގައި ޒަހަމްވެފައިވަނީ ވިޝާން އެވެ. ސްޓެލްކޯ އިން ބަލަހައްޓަމުން ގެންދާ ހުޅުމާލެ ދެވަނަ ފިޔަވަހީގެ ޓްރާންސްފޯމަރު ތަކުން ވައްކަން ކުރަން އުޅުނު ބަޔަކު އަތުލައިގަންނަން މުވައްޒަފުން މަސައްކަތް ކުރުމުގެ ތެރޭގައި އެއް މުވައްޒަފަކު ޒަހަމްވެސް ވި އެވެ. ނަމަވެސް އެ މުވައްޒަފު ވަނީ މިކަކުގައި އުޅުނު ވަގު ކަލޭގެ ހިފަހައްޓައި ފުލުހުންނާ ހަވާލުކޮށްފަ އެވެ.

މި ދެ މުވައްޒަފުންގެ އަގުވަޒަން ކުރުމަށް ބޭއްވި ރަސްމިއްޔާތުގައި މެނޭޖިން ޑިރެކްޓަރު ހުސެއިން ފަހުމީ ވިދާލުވީ ސްޓެލްކޯއަކީ މުވައްޒަފުން ކުރާ މަސައްކަތުގެ އަގު އަބަދުވެސް އަދާކުރާ ކުންފުންޏެއް ކަމަށެވެ. 

"މި ކުންފުންޏަކީ މުވައްޒަފުންގެ އަގުވަޒަންކޮށް، މުވައްޒަފުންނަށް ދިމާވާ ކަންކަމުގައި އަޅާލާ، އޯގާތެރި މެނޭޖްމަންޓެއް އޮންނަ ކުންފުންޏެއް އަބަދު ވެސް. އަޅުގަނޑު ތިބޭފުޅުންނަށް ޔަޤީންކަން މި އަރުވަނީ މިއަދު ވެސް ކުންފުނީގެ މެނޭޖްމަންޓް އޮތީ ހަމަ އެގޮތަށޭ،" ފަހުމީ ވިދާޅުވި އެވެ.

އޭނާ ވިދާޅުވީ މުވައްޒަފުންނަށް ދިމާވާ ކޮންމެ ކަމެއްގަ ސްޓެލްކޯ އެހީތެރިވުމުގައި ފަހަތުގައި އޮންނާނެ ކަމަށާ އެކަމަކީ އަނިޔާއެއް ލިބުންކަމުގައިވިޔަސް، އުފަލެއް ލިބުންކަމުގައިވިޔަސް އަދި ހިތާމައެއް ލިބުންކަމުގައިވިޔަސް ކުންފުނީގެ މެނޭޖްމަންޓް އޮންނާނެ ކަމަށެވެ.

"އެކަމުގަ [މުވައްޒަފުން ބޭނުންވާ] އެއްބާރުލުން އަޅުގަނޑުމެން ތިބޭފުޅުންނަށް ދޭނަން. އަޅުގަނޑު ޔަޤީންކަން މި އަރުވަނީ، ތިބޭފުޅުން ރެއާ ދުވާލު ތި ކުރާ މަސައްކަތުގަ ލިބޭ ގެއްލުންތަކުގަ ކުންފުނީގެ މެނޭޖްމަންޓުން އެއްވެސްކަހަލަ އިހުމާލުވުމެއް ނޯންނާނެ. ތިބޭފުޅުންގެ ފަހަތުގަ އަޅުގަނޑުމެން ތިބޭފުޅުންނަށް ދެވެންހުރި ހުރިހާ އެހީތެރިކަމެއް ދޭނަން،" ފަހުމީ ވިދާޅުވި އެވެ.

މި ރަސްމިއްޔާތުގައި ވާހަކަފުޅުދައްކަވަމުން ސްޓެލްކޯގެ ޑެޕިއުޓީ މެނޭޖިން ޑިރެކްޓަރ ޢަބްދުﷲ ނާޡިރު ވިދާޅުވީ، ކުންފުންނަށް މިހާތަނަށް ލިބިފައިވާ ކޮންމެ ކާމިޔާބެއްގެ ފަހަތުގައިވަނީ މުވައްޒަފުންނަށް ވަޒީފާގެ މާހައުލުގަ ލިބެންޖެހޭ ސަލާމަތާއި ރައްކާތެރިކަމާއި އިތުބާރާއި ހިތްހަމަޖެހުން ހޯދައިދެވިފައި އޮތުން ކަމަށެވެ.

މި ރަސްމިއްޔާތުގައި ވާހަކަފުޅުދައްކަވަމުން ސްޓެލްކޯގެ ޓްރާންސްމިޝަން އެންޑް ޑިސްޓްރިބިއުޝަން ޑިޕާޓްމަންޓްގެ ޖެނެރަލް މެނޭޖަރ އިބްރާހިމް ނާޝިދު ވިދާޅުވީ މުވައްޒަފުންގެ ޚިދުމަތުގެ އަގު މިފަދައިން އަދާކުރަން ފެށުމަކީ ވަރަށް ރަނގަޅު ކަމެއް ކަމަށެވެ.
"އަޅުގަނޑުމެންގެ މުވައްޒަފުން އެތަންތަނަށް އެޓެންޑް އެވަނީ މި ހުރިހާ ކަމެއްވެސް، މިކަންކަން މިހެން ހިނގާފާނެ ކަންވެސް ދެނެގެން ތިބެ އަސްލުގަ. އެއީ މިއީ އަލަށް ހިނގާ ކަންތައްތަކެއް ނޫން. މިކަންކަން މީގެ ކުރީގަވެސް ކޮންމެސްވަރަކަށް ހިނގާފަ އެބަހުރި. އަޅުގަނޑު ފާހަގަކޮށްލަން ބޭނުންވަނީ އެމްޑީ ފާހަގަކުރެއްވިހެން އަޅުގަނޑުމެންގެ މުވައްޒަފުން މިގޮތަށް މި ކުރާ ކަންތައްތައް ކުންފުނީގެ އެންމެ އިސް ލެވެލްއިން ބަލައިގަންނަ ސަޤާފަތެއް މިތަނުގަ ފެށުމަކީ މީ ވަރަށް އުފާވެރިކަމެއް"


ޓްރާންސްފޯމަރުން ވައްކަން ކުރަން އުޅުނު މީހުން އަތުލައިގަނެވިފައިވަނީ 14 ޖަނަވަރީ 2025 ވީ އަންގާރަ ދުވަހުގެރޭ ހުޅުމާލޭގެ ދެވަނަ ފިޔަވަހީގެ ބައެއް ހިސާބުތަކުން ކަރަންޓުގެ ހިދުމަތް ކެނޑުމާއި ގުޅިގެން، ޓްރާންސްފޯމަރުތައް ޗެކުކުރުމުގެ މަސައްކަތް ކުރަމުންދަނިކޮށެވެ.