ތަހުގީގަށް ސާހިލް ދިން ބަޔާންތައް ބަލައިގަންނަން ނިންމައިފި
މި ބަޔާންތައް ބަލައިގަންނަން ނިންމާފައި ވަނީ ސާހިލްގެ ފަރާތުން އެ ބަޔާންތައް ބަލައިނުގަންނަން ހުށަހަޅާފައި ވަނިކޮށެވެ.
ހ. ޝީރީންވިލާގައި އަނިޔާވެރިކޮށް މަރާލާފައި އޮއްވާ ފެނުނު ޏ. ފުވައްމުލަކު ޝިއާއު މުހައްމަދު ސައީދުގެ މަރުގެ މައްސަލައިގެ ތުހުމަތުގައި ދައުވާ އުފުލާފައިވާ ނިލަންދޫ، ފިނިފެންމާގެ، އަލީ ސާހިލް ތަހުގީގަށް ދީފައިވާ ބަޔާންތައް ބަލައިގަންނަން ކްރިމިނަލް ކޯޓުން މިއަދު ނިންމައިފި އެވެ.
މި ބަޔާންތައް ބަލައިގަންނަން ނިންމާފައި ވަނީ ސާހިލްގެ ފަރާތުން އެ ބަޔާންތައް ބަލައިނުގަންނަން ހުށަހަޅާފައި ވަނިކޮށެވެ.
ސާހިލްގެ މައްޗަށް މި މައްސަލައިގައި ފަސް ދައުވާއެއް ދައުލަތުން އުފުލާފައިވެ އެވެ. އޭނާގެ މައްޗަށް ކުރަނީ ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގެ ކުށުގެ ދައުވާ އާއި އޮރިޔާން ކާޑު ގެންގުޅުމުގެ ދައުވާގެ އިތުރުން ކެނެބިސް ބޭނުންކުރުމުގެ ކުށުގެ ދައުވާ އެވެ. ދެ ދައުވާގެ ތަފްސީލް ވަނީ ސިއްރުކޮށްފަ އެވެ.
ސިއްރުކޮށްގެން ހިންގާ ޝަރީއަތުގެ އަޑުއެހުމެއް މިއަދު ވަނީ ބާއްވާފަ އެވެ. ސާހިލް ތަހުގީގަށް ދީފައިވާ ބަޔާންތައް ބަލައިގަތުމުގެ އިތުރުން، އޭނާއާ ދެކޮޅަށް ދައުލަތުން ހުށަހަޅާފައިވާ ނުވަ ހެއްކެއްގެ ހެކިބަސް ސިއްރުކޮށްގެން ކުރިއަށް ގެންދަން ވަނީ ނިންމާފަ އެވެ. އެނިންމުން ނިންމާފައި ވަނީ މީގެ ކުރިން ދައުލަތުން އެގޮތަށް ހުށަހެޅުމުންނެވެ.
މި މައްސަލައިގެ އިބްތިދާއީ މަރުހަލާ މިއަދު ނިންމާލާފައިވާ ކަމަށް ކޯޓުން ވަނީ މައުލޫމާތުދީފަ އެވެ. ދެން މި މައްސަލައިގައި އޮންނާނީ ޝަރީއަތް ފަށައި، ހެކިންގެ ހެކިބަސް ނެގުމެވެ.
މީގެ ކުރިން ބޭއްވި އަޑުއެހުމުގައި ދައުވާތައް އިއްވުމުން ސާހިލް ވަނީ ދައުވާތަކަށް ޖަވާބުދާރީވާން އުޒުރުވެރިވާކަމަށް ބުނެފަ އެވެ. އެހެންވެ، އޭނާ ދައުވާތަކަށް އިންކާރު ކުރީ ކަމަށް ކަނޑައަޅާފައިވެ އެވެ. ދިފާއީ ހެކި ހުށަހަޅަން ފުރުސަތު ދިނުމުން، ދިފާއީ ހެއްކެއް ނެތް ކަމަށް ވެސް އޭނާ ވަނީ ބުނެފަ އެވެ. މި މައްސަލަ މިހާރު ކުރިއަށް ގެންދަނީ ސާހިލް އަމިއްލައަށް، ވަކީލަކާ ނުލަ އެވެ.
އޯގަސްޓު 6، 2022 ގައި ޝިއާއު މަރާލާފައި ވަނީ ސާހިލް ކަމަށް ތުހުމަތުކޮށް އޭނާ ހުރީ ޝަރީއަތް ނިމެންދެން ބަންދުކޮށްފަ އެވެ. ސާހިލް ހައްޔަރު ކޮށްފައި ވަނީ ޝިއާއު މަރާލާފައި އޮއްވާ ފެނުނު ސީނުންނެވެ.
ކޮމެންޓް
Republic of Maldives