ފްލެޓް ލިސްޓު "ގަޑުބަަޑުވި" މައްސަލައިގެ ހައްލު ހޯދައި، ރޯދައިގެ ކުރިން ދޫކުރަނީ

ފްލެޓު ލިސްޓު "ގަޑުބަޑުވި" ބޮޑު މައްސަލައިގެ ހައްލު ހޯދައި ފައިނަލް ލިސްޓު ނެރުނު 4،000 ފްލެޓް ލިބުނު މީހުން ވެރިފައިކޮށް ރޯދައިގެ ކުރިން ފްލެޓު ދެވޭނެ ކަމަށް މިނިސްޓަރު ޑރ. އަބްދުﷲ މުއްތަލިބް ވިދާޅުވެއްޖެ އެވެ. 

ނުހައްގު އެތައް ބަޔަކަށް ފްލެޓު ދީފައިވާ ކަމަށް ރައްޔިތުންގެ މެދުގައި ޝައްކާއި ވަހުމް އިންތިހާއަށް އުފެދިފައިވާ ފްލެޓު ލިސްޓު ބަލަހައްޓަން އަލަށް ހަވާލުވަޑައިގެންނެވި ބިމާއި ގެދޮރުވެރިކަމާ ބެހޭ މިނިސްޓްރީން ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި އެ މިނިސްޓްރީގެ ވަޒީރު މުއްތޮލިބު ވިދާޅުވީ ގެދޮރުވެރިޔާ ސްކީމަށް ކުރިމަތިލި 20،000 މީހުންގެ ފޯމް އިވެލުއޭޓް ކުރުމުގެ ބަދަލުގައި ކުރީ ސަރުކާރުން އިއުލާން ކުރި 4،000 މީހުންގެ ފްލެޓް ލިސްޓު ވެރިފައި ކުރުމަށްފަހު ފްލެޓް ދޭން ނިންމާފައިވާ ކަމަށެވެ.

"މި [4000 ފްލެޓް] ވެރިފިކޭޝަން ކުރިއަށް ގެންދާއިރު ބަލާނީ 26، ޖޫން 2022 ގައި އިއުލާނުކުރި އުސޫލަށް. އެޕްލިކޭޝަން ހުށަހެޅުގައި ދީފައިވާ އިރުޝާދު ތަކަށް. މާލޭގައި އުޅޭތާ 15 އަހަރުވީކަން ސާބިތު ކުރުމަށް ހުށަހެޅިދާނެ ލިޔުންތައް ކަމަށް،" މުއްތޮލިބު ވިދާޅުވި އެވެ.  

މިނިސްޓަރު މުއްތޮލިބު ވަނީ މި ލިސްޓް ވެރިފައިކޮށް ވޭތުވެދިޔަ 14 މަސް ދުވަހުގެ ތެރޭގައި ނެރެވިފައި ނުވާތީ ފޯމް ހުށަހެޅި ހުރިހާ ފަރާތްތަކުގެ ކިބައިއިން މިއަދު މައާފަށް ވެސް އެދިވައިގެންފަ އެވެ. އަދި މިނިސްޓަރު ވިދާޅުވީ ފްލެޓު ލިސްޓުގެ މަސައްކަތް ނިންމުން ލަސްވެގެން ދިއުމަކީ ރައްޔިތުންގެ މެދުގައި ޝައްކު އިތުރުވާނެ ކަމަށްވާތީ މިހާރުގެ އަމާޒަކީ މި މަސައްކަތް ވީހާވެސް އަވަހަކަށް ނިންމުމުގެ ނަތީޖާ އަށް ވާސިލްވުމެވެ. 

"މި ލިސްޓުގެ މަސައްކަތް ކޮށްފައިވަނީ [ރައީސް ސޯލިހުގެ ސަރުކާރުން] އިންތިހާބުގެ ތެރޭގައި ކަމަށް ވެފައި ވެރިކަން ބަދަލުވުމުގެ މަރުހަލާގެ ތެރޭގައި ބޮޑެތި ބަދަލުތަކެއް އަންނަ ގޮތަށް ލިސްޓް ތައްޔާރުކޮށްފައިވަނީ. އެހެންވެ ނެރުވުނު ލިސްޓާމެދު ރައްޔިތުންގެ މެދުގައި ކަންބޮޑުވުން ހުރި. އޭސީސީގެ ވެސް ކަންބޮޑުވުން އޮތް،" މުއްތޮލިބު ވިދާޅުވި އެވެ. 

މިނިސްޓަރު މުއްތޮލިބު ވިދާޅުވީ މި ލިސްޓު އޭސީސީން ހުއްޓުވުމުގައި އެންމެ ބޮޑު ކަންބޮޑުވުމަކީ ހަމަހަމަ ކަމާއެކު އަމަލުކޮށްފައި ނެތުމެވެ. 

މިނިސްޓަރު މުއްތޮލިބު ވިދާޅުވީ މާލޭގައި 15 އަހަރު މާލޭގައި މެދުނުކެނޑި އުޅެފައިވާކަން ސާބިތުކޮށްދޭން ހުށަހަޅާ ލިޔުންތައް  އެކި މީހުންނަށް އެކި ގޮތްގޮތަށް ހުށަހެޅޭ ގޮތަށް އޮތުމަކީ އޭސީސީގެ އެންމެ ބޮޑު ކަންބޮޑުވުމެވެ. މިގޮތުން މާލޭގައި ދިގު މުއްދަތަށް ދިރިއުޅުން ކުރިން މާނަކޮށްފައި ނެތުމަކީ އެންމެ ބޮޑު މައްސަލަކަން މިނިސްޓަރު ފާހަގަ ކުރެއްވި އެވެ. 

"އެފަދަ ލިޔުންތައް [ޕޯޓަލްގައި ބުނެފައި ނެތް ދިގު މުއްދަތުގައި ދިރިއުޅެފައިވާކަން ސާބިތުކޮށްދޭ ލިޔުންތައް ] ބަލައި ގަންނަން ނުފެންނަ ކަމަށް އޮޑިޓަރު ޖެނެރަލް ވެސް ވަނީ ލަފާ ދެއްވާފަ. އެހެންވެ ޕޯޓަލްގައި ބަޔާންކޮށްފައި ނެތް ލިޔުންތަކަކީ ގާނޫނީ ގޮތުން ބަލައި ގަނެވޭނެ ލިޔުން ތަކެއް ނޫން. [ޕޯޓަލްގައި ކުރިން އޮތް ގޮތުން] މެދުކެނޑުން ވަރަށް ހަރުކަށިކޮށް މާނަކޮށްފިނަމަ އޭލެވަލް ނިންމާ ކުއްޖަކު އެއް މަހުގެ ބްރޭކެއް ނަގަން [މާލޭން ބޭރުވިޔަސް] އެވަނީ ޝަރުތު ހަމަނުވާ ކަމަށް. ބޭރަށް މަތީ ތައުލީމަށްދާ ފަރާތްތަކާ ވަޒީފާގެ ގޮތުން ޓާމެއްގައި ބޭރުގައި ވަޒީފާ އަދާކުރަން ޖެހޭ ފަރާތްތަކާ ބޮޑު ބައްޔަށް ފަރުވާ އަށް ދާ ފަރާތްތައް ވެސް [ކުރީގެ އުސޫލުން ] ވަނީ [މާލޭގައި ދިރިއުޅުން] މެދުކެނޑުނު ކަމަށް،" މުއްތޮލިބު ވިދާޅުވި އެވެ. 

ދިގު މުއްދަތު މާނަކޮށް ހައްލު ހޯދުން - އެހެންކަމުން މިނިސްޓަރީން ވަނީ މާލޭގައި ދިރިއުޅުން މެދުކެނޑުނުކަން މި ފަހަރު ފުރިހަމަ އަށް މާނަކޮށް އެ މައްސަލައަށް ހައްލު ހޯދާފަ އެވެ. މިނިސްޓަރު ވިދާޅުވީ މާލޭގައި ދިރިއުޅުން މެދުކެނޑުނު ކަމަށް ބެލެވޭނީ އެއް އަހަރަށްވުރެ ދިގު މުއްދަތެއްގެ މެދުކެނޑުމެއް އައިސްފައިވުމެވެ. 

"މިގޮތަށް ނިންމީ މި [ރައީސް ސޯލިހުގެ ފްލެޓް ލިސްޓް ގަވައިދު] ގައި މާނަކޮށްފައި ނުވުން. އެހެން ނަމަވެސް 2015 ގެ ކުރިއަށް ގެންދިޔަ ގެދޮރުވެރިކަމުގެ ޕްރޮގްރާމްގައި [އެއް އަހަރު ދުވަހަށްވުރެ ދިގުވުމަކީ މެދުކެނޑުން] ކަމަށް ކަނޑައަޅާފައިވުން. މިއީ ކުރިން ކަންކޮށްފައިވާ ގޮތް،" މުއްތޮލިބު ވިދާޅުވި އެވެ.