ފަރުމަހާއި ހުއިފި ލަނޑާ މަސްވެރިކަން ހަރުދަނާ ކުރުމަށް ގަވާއިދެއް

ފަރުމަހާއި ހުއިފި ލަނޑާގެ މަސްވެރިކަން ހަރުދަނާ ކުރުމުގެ އުސޫލުތައް ބަޔާންކޮށް ގަވައިދު ނެރެފި  އެވެ. 

ރާއްޖޭގެ މަސްވެރިކަމުގެ ގާނޫނުގެ ދަށުން މިއަދު އާއްމުކުރި މަސްވެރިކަމާއި ކަނޑުގެ ވަސީލަތްތަކާ ބެހޭ މިނިސްޓްރީން ނެރުނު މަސްވެރިކަމުގެ ގަވާއިދުގެ ބޭނުމަކީ ދިވެހިރާއްޖޭގެ ފަރުމަހުގެ މަސްވެރިކަން މެނޭޖްކުރުމުގެ ޕްލޭން ތަންފީޒުކުރުމާއ،ި ދިވެހިރާއްޖޭގައި ކުރާ ފަރުމަހުގެ މަސްވެރިކަމުގެ ފައިދ،ާ ދިގު މުއްދަތަކަށް ދިވެހި ރައްޔިތުންނަށް ލިއްބައިދިނުމަށް ޓަކައި ފަރުމަހުގެ މަސްވެރިކަމާއި މަސްވެރިކަމާ ގުޅުންހުރި ހަރަކާތްތައް ރާވައި ހިންގައި ބެލެހެއްޓުމުގެ އުސޫލުތައް ބަޔާން ކުރުމެވެ. 

މި ގަވައިދުގައިވާ ގޮތުން ފަރުމަހުގެ މަސްވެރިކަން މެނޭޖްކުރުމަށް މިނިސްޓްރީއަށް ލަފާދޭ ކޮމިޓީއެއް އުފައްދަން ޖެހެ އެވެ. މި ކޮމެޓީގައި ސަރުކާރުގެ ގިނަ ވުޒާރާތަކުގެ އިތުރުން ފަރުމަހުގެ މަސްވެރިކަމުގައި ހަރަކާތެރިވާ ދެ މަންދޫބުންވެސް ތިބޭނެ އެވެ. މީގެ އިތުރުން ލައިސަންސް ދިނުމާ ގުޅޭ އުސޫލުތައް ވެސް ބަޔާންކޮށްފައިވެ އެވެ. އަދި ޕްރޮސެސްކުރުމުގައި ޢަމަލުކުރަންޖެހޭ އުސޫލުތަކާއި އެކްސްޕޯޓުކުރުމުގައި އަމަލުކުރަންޖެހޭ ގޮތްވެސް ބަޔާންކޮށްފައިވެ އެވެ. 

ފަރުމަހުގެ މަސްވެރިކަމުގެ ގަވައިދުގައިވާ ގޮތުން ކްސްޕޯޓުކުރާ ފަރުމަހާއި ފަރުމަހުގެ އުފެއްދުންތަކުގެ ކޮންމެ ޝިޕްމަންޓަކަށް
[ފިޝަރީޒް އިންފޮމޭޝަން ސިސްޓަމް – ކެޔޮޅު] މެދުވެރިކޮށް، ކެޗް ސެޓުފިކެޓެއް ހޯދަން ޖެހެ އެވެ.މި ގަވައިދުގައި ގަވާއިދާ ހިލާފުވެއްޖެނަމަ އަޅާނެ ފިޔަވަޅުތަކެއްވެސް ބަޔާންކޮށްފައިވެ އެވެ. 

ފިޝަރީޒް މިނިސްޓްރީން އާއްމުކުރި ހުއިފި ލަނޑާގެ ގަވައިދުގެ ބޭނުމަކީ ރާއްޖޭގައި ކުރާ ހުއިފިލަނޑާގެ މަސްވެރިކަމުގެ ފައިދާ ދިގު މުއްދަތަކަށް ދިވެހި ރައްޔިތުންނަށް ލިއްބައިދިނުމަށް ޓަކައި ހުއިފިލަނޑާގެ މަސްވެރިކަމާއި މަސްވެރިކަމާ ގުޅުންހުރި ހަރަކާތްތައް ރާވައި ހިންގައި ބެލެހެއްޓުމުގެ އުސޫލުތައް ބަޔާން ކުރުމެވެ. މި ގައިދުގައިވާ ގޮތުންވެސް ހުއިފި ލަނޑާގެ މަސްވެރިކަން ބަލަހައްޓާ ކޮމެޓީއެއް އެކުލަވާލަން ޖެހެ އެވެ. އެ ކޮމެޓީގައިވެސް ހުއިފި ލަނޑާގެ މަސްވެރިކަމުގައި ހަރަކާތްތެރިވާ ދެ ފަރާތެއް ހިމެނެ އެވެ.