ސައްހަ ނޫން ފޯމުތަކެއް އެބަހުރި، މައްސަލަ ދަނީ ބަލަމުން: ޕީއެންސީ

ސަރުކާރު ހިންގާ ޕާޓީ، ޕީޕަލްސް ނޭޝަނަލް ކޮންގްރެސް (ޕީއެންސީ) އަށް މެންބަރުން އިތުރުކުރުމަށް ބޭއްވި ހަރަކާތުގައި އިލެކްޝަން ކޮމިޝަނަށް ހުށަހެޅި ފޯމުތަކުގެ ތެރެއިން ސައްހަ ނޫން ފޯމުތަކެއް ހުށަހަޅާފައިވާ މައްސަލަ ބަލަމުންދާ ކަމަށް އެޕާޓީން ބުނެފި އެވެ.

ޕީއެންސީއަށް މެންބަރުން އިތުރުކުރުމަށް ހިންގި "މެންބާޝިޕް ޑްރައިވް"ގައި އެތައް ސަތޭކަ ފޯމެއް އީސީއަށް ހުށަހަޅާފައިވެ އެވެ. ސައްހަ ނޫން ފޯމުތަކެއް އޭގެ ތެރޭގައި ހުރިކަން ފެންމަތިވީ ވައިކަރަދޫ ދާއިރާގެ އެމްޑީޕީ މެންބަރު ހުސެއިން ޒިޔާދު އެ ޕާޓީއަށް ވައްދާފައި އޮތުމުންނެވެ. 

އެ މައްސަލަ ފެންމަތިކުރުވުމުން އެހެން ޕާޓީތަކަށް ނިސްބަތްވާ އާންމު މެންބަރުންނާއި އެއްވެސް ޕާޓީއަކަށް ރަޖިސްޓްރީކޮށްފައި ނުވާ ފަރާތްތައް ޕީއެންސީއަށް ވައްދާފައިވާކަމުގެ މައްސަލަތައް ފެންމަތިވާން ފެށި އެވެ. އެމްޑީޕީގެ ފަރާތުން ވަނީ އެ މައްސަލަ އީސީއަށާއި ފުލުހަށް ވެސް ހުށަހަޅާފަ އެވެ.

މިކަމާ ގުޅިގެން ޕީއެންސީގެ ފަރާތުން މިއަދު ނެރުނު ނޫސްބަޔާނެއްގައި ބުނީ ސައްހަ ނޫން ފޯމުތަކެއް ހުށަހަޅާފައިވާކަން އެޕާޓީއަށް ވެސް ފާހަގަކުރެވިފައިވާ ކަމަށެވެ. 

އެޕާޓީން ބުނީ މެންބަރުން އިތުރުކުރަން ހިންގި ހަރަކާތަކީ ޕާޓީގެ އިދާރީ މުވައްޒަފުން ވަރަށް ބުރަކޮށް މަސައްކަތް ކުރި ހަރާކާތެއް ކަމަށެވެ. އެހުރިހާ ފޯމެއްގެ ސައްހަކަން ކަށަވަރު ކުރުމުގެ ގާބިލުކަން ޕާޓީގައި ނެތް ކަމަށް ވެސް ފާހަގަކޮށްފައިވެ އެވެ.

އެ ބަޔާނުގައި ބުނެފައި ވަނީ އީސީންނާއި ފުލުހުން އެ މައްސަލަ ބަލަމުންދާ ކަމަށް އެ ޕާޓީއަށް އަންގާފައިވާ ކަމަށެވެ. އަދި އެޕާޓީން ވެސް އެ ފޯމުތައް ހުށަހެޅިފައިވާ ގޮތް ބަލަމުންދާ ކަމަށް ވެސް ބުންޏެވެ.

"ކޮންގްރެސް ޕާޓީގެ ފަރާތުން މި ދެ މުއައްސަސާއަށް މިކަން ބެލުމުގައި ފުރިހަމައަށް އެއްބާރުލުން ދެމުންގެންދާނެކަން ދިވެހި ލޮބިވެތި ރައްޔިތުންނަށް ކަށަވަރުކޮށް އަރުވަން،" އެ ޕާޓީން ބުންޏެވެ.

ސައްހަ ނޫން ފޯމުތަކެއްގެ މުގާބިލުގައި، އެ ޕާޓީއަށް މެންބަރުން އިތުރުކޮށް، ރައްޔިތުންގެ ހައްގުތަކެއް ގެއްލޭފަދަ ގޮތަކަށް އެއްވެސް ކަމެއް ކުރުމަކީ އެ ޕާޓީގެ ރައީސް އަދި ލީޑާޝިޕުން އެއްވެސް ވަރަށް އެދޭ ކަމެއް ނޫން ކަމަށް ވެސް ބުންޏެވެ.