މިމަހުގެ ފަހު ދުވަހު ސަރުކާރާ ދެކޮޅަށް އެމްޑީޕީން ބޮޑު ހިނގާލުމެއް ބާއްވަނީ
ޝާހިދު ވަނީ ވަކި ސިޔާސީ ފިކުރަކަށް ބެލުމެއްނެތި މި ހިނގާލުމުގައި ވީހާވެސް ގިނަ ރައްޔިތުން ބައިވެރިވުމަށް ގޮވައިލައްވާފަ އެވެ.
ސަރުކާރު ޖަވާބުދާރީ ކުރުވުމަށް ކުރަމުންދާ މަސައްކަތުގެ ތެރެއިން މިމަހުގެ 31 ވަނަ ދުވަހު މާލޭގައި ބޮޑު ހިނގާލުމެއް ބާއްވަން ނިންމާފައިވާ ކަމަށް އިދިކޮޅު އެމްޑީޕީން ބުނެފި އެވެ.
އެމްޑީޕީގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމެއްގައި، ޕާޓީގެ ރައީސް އަބްދުﷲ ޝާހިދު ވިދާޅުވީ މި ހިނގާލުމަކީ ސަރުކާރުން ކުރަމުންދާ ގޯސްކަންތަކާ ދެކޮޅަށް ބާއްވާ ސުލްހަވެރި ހިނގާލުމެއް ކަމަށެވެ. ޕާޓީގެ ގައުމީ މަޖިލީހުގެ ނިންމުމާއެކު މަގުމަތީ ހަރަކާތްތައް ރަސްމީކޮށް ފަށަން ތައްޔާރުވެފައިވާ ކަމަށް އޭނާ ވިދާޅުވި އެވެ.
"ފުދިއްޖެ، ފުނޑިއްޖެ" ގެ ނަމުގައި ބާއްވާ މި ބޮޑު ހިނގާލުމަށް ތައްޔާރުވުމުގެ ގޮތުން މި މަސްތެރޭގައި މަގުމަތީ އެކިއެކި ހަރަކާތްތައް ކުރިއަށް ގެންދަވާނެ ކަމަށް ވެސް ޝާހިދު ވިދާޅުވި އެވެ. އެގޮތުން ކަންމަތީ ޖަލްސާތައް ބޭއްވުމާއި ޑޯޓުޑޯ ހަރަކާތްތައް ހިންގަން ހަމަޖެހިފައިވާ ކަމަށް އޭނާ ވިދާޅުވި އެވެ.
ޝާހިދު ވަނީ ވަކި ސިޔާސީ ފިކުރަކަށް ބެލުމެއްނެތި މި ހިނގާލުމުގައި ވީހާވެސް ގިނަ ރައްޔިތުން ބައިވެރިވުމަށް ގޮވައިލައްވާފަ އެވެ.
ހިނގާލުން ފަށާނީ އެ ދުވަހުގެ 4:00 ގައި އާޓިފިޝަލް ބީޗު ސަރަހައްދުންނެވެ.
ކޮމެންޓް
Republic of Maldives