"ޑިމޮކްރެޓްސްގައި ސިޔާސީ ކުރިމަގެއް ނެތް، ފުރުސަތު އޮތީ އެމްޑީޕީގައި"

ޑިމޮކްރެޓްސްގައި ހުރެގެން ރައްޔިތުންނަށް ހިދުމަތް ކުރުމަށް އޮތް ފުރުސަތުތައް ހަނި ކަމަށާއި، އެމްޑީޕީއަށް ވަޑައިގަތީ އެ ފުރުސަތުތައް ފުޅާދާއިރާއެއްގައި ލިބެން އޮތުމުން ކަމަށް ހަސަން ލަތީފް ވިދާޅުވެއްޖެ އެވެ.

ޑިމޮކްރެޓްސްގެ ރައީސްގެ މަގާމުގައި ހުންނެވުމަށްފަހު ޕާޓީ ދޫކުރައްވައި ހަސަން ވަނީ އަލުން އެމްޑީޕީއާ ގުޅިވަޑައިގެންފަ އެވެ. އޭނާގެ އިތުރުން ލީޑާޝިޕްގެ އިތުރު ބައެއް ބޭފުޅުން ވެސް ވަނީ އެމްޑީޕީއާ އަލުން ގުޅިވަޑައިގެންފަ އެވެ.

އެބޭފުޅުންނަކީ ފާއިތުވި ރިޔާސީ އިންތިހާބާ ދިމާކޮށް އެމްޑީޕީ ދޫކުރައްވައި ނުކުމެވަޑައިގެން ޑިމޮކްރެޓްސް ނަމުގައި ޕާޓީއެއް އުފައްދަވައި އެމްޑީޕީ ރޫޅައިލައްވާނެކަމުގެ އިންޒާރު ދެއްވި ބޭފުޅުންނެވެ. 

މިކަމާ ގުޅިގެން ރާއްޖެޓީވީގެ ޕްރޮގްރާމެއްގައި ރޭ ވާހަކަ ދައްކަވަމުން ހަސަން ވިދާޅުވީ ޑިމޮކްރެޓްސްއަކީ އޭރުގެ ހާލަތު އޮތް ގޮތުން ވަރަށް މަސައްކަތުން އުފެއްދި ޕާޓީއެއް ކަމަށެވެ. ނަމަވެސް ދެ ޕާޓީގެ އަސާސީ ގަވާއިދާއި އުސޫލުތަކުގައި މާ ބޮޑު ތަފާތެއް ނެތް ކަމަށެވެ. ޕާޓީއަކީ މަގުބޫލު ޕާޓީއަކަށް ހެދުމަށް ވަރަށް ގިނަ މަސައްކަތްތައް ކުރި ނަމަވެސް އެ މަސައްކަތް ކާމިޔާބުވެފައި ނުވާ ކަމަށް އޭނާ ވިދާޅުވި އެވެ.

ޑިމޮކްރެޓްސްއަށް ރައްޔިތުންގެ ތާއީދު ލިބުނު ނަމަވެސް، ފާއިތުވި އިންތިހާބުތަކުގައި ވޯޓުން އެކަން ފެނިފައި ނުވާ ކަމަށް ވެސް ހަސަން ވިދާޅުވި އެވެ. ޕާޓީއަކަށް އޮންނަ ތާއީދު އާންމުކޮށް ފެންނަނީ ވޯޓުން ކަމަށް އޭނާ ފާހަގަކުރެއްވި އެވެ.

"އަޅުގަނޑަށް ގަބޫލުކުރެވުނު ގޮތުގައި އަޅުގަނޑު ކުރަން އޮތް މަސައްކަތް، އެ މަސައްކަތް ޑިމޮކްރެޓްސްގަ ހުރެގެން އިތުރަށް ކުރުމުގެ ފުރުސަތު ހަގީގަތުގަ ވަރަށް ކުޑަ. މިދެންނެވީ އަޅުގަނޑަށް އެ ޖާގަ ލިބިފަ ނެތީއަކީއެއް ނޫން. ތަންމިނަށް ޖާގަ އެބައޮތް އަމުދުން ރައީސްވީމަ ޖާގަ ލިބޭ، ނަމަވެސް އަޅުގަނޑު މި އެދޭ މިންވަރަށް ކުރާނެ މީހުން އިންތިހާއަށް ނެތީ،" ހަސަން ވިދާޅުވި އެވެ.

ހަސަން ފާހަގަކުރެއްވި ގޮތުގައި ސިޔާސީ ޕާޓީތައް އުފެދިގެން އަންނަނީ ރައްޔިތުންނަށް ހިދުމަތް ކުރުމަށް ކަމަށާއި، އެކަންކުރެވޭނީ ވެރިކަމަށް އައިސްގެންނެވެ. ނަމަވެސް ޑިމޮކްރެޓްސްއަށް ސަރުކާރެއް އުފަންކުރުމުގެ ފުރުސަތު އޮތް މިންވަރު ވަރަށް ހަނި ކަމަށް އޭނާ ވިދާޅުވި އެވެ.

"އަޅުގަނޑު އަބަދުވެސް ބަލަން ކުރިއަށް ހުރި އިންތިހާބުތަކުގަ ކިހިނެއްތޯ ޕާޓީ ގެންދެވޭނީ، ޕާޓީއަށް ވޯޓު ހޯދައިގެން ސަރުކާރެއްގާއިމް ކުރެވިދާނެތޯ. މިހެން ބަލާއިރު އަޅުގަނޑަށް ގަބޫލުކުރަން ދަތި މިވަގުތު ޑިމޮކްރެޓްސްއަށް ސަރުކާރެއް ގާއިމްކޮށްގެން، ޑިމޮކްރެޓްސްގެ ތެރެއިން ސަރުކާރެއް އުފަން ކުރުވައިގެން ރައްޔިތުންނަށް ހިދުމަތް ކުރުމުގެ އެ ފުރުސަތު ހަގީގަތު އޮތް ކަމަށް ދެކެން ދަތި،" ހަސަން ވިދާޅުވި އެވެ.

އޭނާ ވިދާޅުވީ ޑިމޮކްރެޓްސް ކުރިއަރުވަން އެކި މަސައްކަތް ކުރި ނަމަވެސް ކުރިމަގު ފެނިފައި ނުވާ ކަމަށެވެ. ސިޔާސީ ގޮތުން އަމިއްލައަށް ވެސް އެތައް ބައިވަރު ކަންކަން ކުރަން ރާވާފައި ހުރި ނަމަވެސް އެ ޕާޓީގައި ހުރެގެން އެކަންކަން ހާސިލް ކުރެވެން ނެތް ކަމަށެވެ. ނަމަވެސް އެމްޑީޕީގައި ހުރެގެން އިންތިހާބެއްގައި ވާދަކޮށް ކާމިޔާބު ހޯދޭނެ ކަމަށް ހަސަން ވިދާޅުވި އެވެ.

"މި ދައުލަތަށް ވާންވީ ގޮތުގެ ވިސްނުންތަކެއް އެބަހުރި، ސަރުކާރަށް ވާންވީ ގޮތުގެވެސް، ރައްޔިތުންގެ މަޖިލީހަށް ވާންވީ ގޮތުގެވެސް އަދި މުޅި ނިޒާމަށް ގެންނަންވީ ބަދަލުތަކުގެ ވިސްނުމެއް ވެސް އެބައޮތް. އަދި އެޔާއެކީގަ ރައްޔިތު މީހާއަށް އެންމެ އާންމު މީހާއަށް ވަމުންދާ ގޮތް، ގައުމަށް މި ވަމުންދާ ގޮތް، މިކަންކަމަށް ބަދަލުތަކެއް ގެންނާނެ ކަހަލަ ގޮތަކަށް ސިޔާސަތުތަކެއް ބައްޓަންކޮށްގެން އިންތިހާބުތަކަށް ކުރިމަތިލައިގެން ރައްޔިތުންގެ ތާއީދާ އެކީގައި ވޯޓުން ހޮވިގެން ދެން އަންނަ ސަރުކާރެއް އުފެން ކުރުމުގެ ވިސްނުމެއް އެބައޮތް،" މިކަންކަން ވާނީ އެމްޑީޕީގެ ތެރެއިން ކަމަށް ހަސަން ވަނީ ވިދާޅުވެފަ އެވެ.