ބޭ އޮފް ބެންގާލުގައި ކޮޅިގަނޑެއް، ފަސް ދުވަހަށް މޫސުން ގޯސް
މެޓުން ބުނީ މާދަމާ އިން ފެށިގެން މި މަހުގެ 18 ވަނަ ދުވަހުގެ ނިޔަލަށް ރާއްޖޭގެ ބޮޑުބަޔަކަަށް ވިއްސާރަ ކުރާނެ ކަމަަށް ލަފާ ކުރެވޭ ކަމަށެވެ.
ބޭ އޮފް ބެންގާލުގައި ކޮޅިގަނޑެއް އުފެދި ކުރިއަށް އޮތް ފަސް ދުވަހަށް މޫސުން ގޯސްވާނެ ކަމަށް މޫސުމާ ބެހޭ ގައުމީ އިދާރާ މެޓުން ލަފާ ކޮށްފި އެވެ.
މެޓުން ބުނީ ރާއްޖޭގެ އިރުން ހުޅަނގު ދެކުނު ބޭ އޮފް ބެންގާލުގައި ކޮޅިގަނޑެއް އުފެދިފައިވާ ކަމަށެވެ. މި ކޮޅިގަނޑު ހުޅަނގަށް ޖެހި ރާއްޖޭގެ ސަރަހައްދުގައި ބޯވިއްސާރަ ވިލާތައް އުފެދުމުގެ ފުރުސަތު އެބައޮތް ކަމަށް ވެސް ބުންޏެވެ.
އަދި ބުނީ މާދަމާ އިން ފެށިގެން މި މަހުގެ 18 ވަނަ ދުވަހުގެ ނިޔަލަށް ރާއްޖޭގެ ބޮޑުބަޔަކަަށް ވިއްސާރަ ކުރާނެ ކަމަަށް ލަފާ ކުރެވޭ ކަމަށެވެ. މި ވިއްސާރާގައި ބައެއް ރަށްތަކަށް ބޯކޮށްވާރޭވެހި ގުގުރާނެ ކަމަށާ އާންމުވައި ގަދަވެ ކަނޑުތައް ވެސް ގަދަވާނެ ކަމަށް ވަނީ ލަފާކޮށްފަ އެވެ.
މެޓުން ބުނީ އުތުރާއި މެދުއަތޮޅުތަކުގެ ބައެއް ރަށްތަކަށް އުދަ އެރުމުގެ ފުުރުސަތު ވެސްް އޮތް ކަމަށެވެ. އެހެން ކަމުން މޫސުން ގޯސްވާނެ ކަމަށް ލަފާކުރެވޭތީ މެޓުން ދޭ އިރުޝާދުތަކާއި މޫސުމީ އިންޒާރުތަކަށް ސަމާލުވުމަށް ވަނީ އެދިފަ އެވެ.
މިދިޔަ ދެތީން ދުވަހު މޫސުން ގޯސްކޮށް އޮތުމަށް ފަހު މިއަދަކީ މުޅި ރާއްޖެއަށް މޫސުން ވަރަށް ރީތި ދުވަހެކެވެ.
ކޮމެންޓް
Republic of Maldives