ފެޑެކްސް މެދުވެރިކޮށް ޑްރަގް އެތެރެ ކުރި މީހަކު ހައްޔަރު ކޮށްފި

ދިވެހިރާއްޖެއަށް މަސްތުވާތަކެތި އެތެރެކޮށް، ބޭނުންކުރުމާއެކު މަސްތުވާތަކެތި ގެންގުޅުމާއި އޭގެން ވިޔަފާރިކުރުމުގެ ތުހުމަތުގައި މީހަކު ހައްޔަރުކޮށްފިއެވެ.

މިމައްސަލައާއި ގުޅިގެން ހައްޔަރުކޮށްފައިވަނީ ހ. ކަފުރުތޮޅިގެ، އަލީ އަމީން (32އ) އެވެ. އަމީން ހައްޔަރުކޮށްފައި ވަނީ ފެޑެކްސް މެދުވެރިކޮށް ރާއްޖެ އެތެރެކުރި ފޮށިގަނޑެއް ކަސްޓަމްސްއިން ހިފާއްޓާ، ފުލުހުންނާއި ހަވާލުކުރުމުން ފުލުހުން ހިންގި ކޮންޓްރޯލް ޑެލިވަރީ އޮޕްރޭޝަނެއްގަ އެވެ. 

ފުލުހުންގެ ކައުންޓާ ނާކޮޓިކްސް އިންޓެލިޖެންސާއި ޑްރަގް އެންފޯސްމަންޓު ގުޅިގެން ހިންގި މި އޮޕަރޭޝަނުގައި އޭނާގެ އަތުން 213 ވަރަކަށް ގުރާމުގެ މަސްތުވާތަކެތި ފެނިފައިވާކަމަށް ފުލުހުން ބުންޏެވެ.

މި މައްސަލައާ ގުޅިގެން ކްރިމިނަލް ކޯޓުން ވަނީ ހަތް ދުވަހަށް އޭނާ ބަންދުގައި ބެހެއްޓުމަށް އަމުރު ކޮށްފަ އެވެ. ފުލުހުން ގެންދަނީ މިމައްސަލަ އިތުރަށް ތަހުގީގު ކުރަމުންނެވެ.