ރޭސް ކާރު އެކްސިޑެންޓް: ކުށަށް އިއުތިރާފްވުމުން އިކްރާމަށް ޖޫރިމަނާގެ އަދަބެއް، ގެއްލުމުގެ ބަދަލު ވެސް ދީފި

ހުޅުމާލެ ދެ ވަނަ ފިޔަވަހީގައި މިދިޔަ ޖުލައި މަހު ހިނގި ނުރައްކާތެރި އެކްސިޑެންޓާއި ގުޅިގެން ދައުވާކޮށްފައިވާ މ. ލޭންޑްއޮފްގާޑްން، އިބްރާހިމް އިކްރާމް ކުށަށް އިއުތިރާފް ވުމުން، މައްސަލަ ސާބިތުވާ ކަމަށް ކަނޑައަޅައި ޖޫރިމަނާގެ އަދަބެއް ދިނުމަށް ކްރިމިނަލް ކޯޓުން މިއަދު ހުކުމް ކޮށްފި އެވެ.

ހުޅުމާލެ ހިޔާ އަވަށް -- ވިނަރަސް ފްލެޓް ސަރަހައްދު ގައި މި އެކްސިޑެންޓް ހިނގީ ބާރު ސްޕީޑްގައި ދުއްވާފައި އައި ރޭސް ކާރެއް ކޮންޓްރޯލް ނުވެގެނެވެ. އެނބުރެމުން އެނބުރެމުން އައި ރަތްކުލައިގެ އެ ކާރުން ޖެހުނީ އެވަގުތު މަގުގެ އެއް ފަރާތުގައި ސައިކަލެއްގައި މަޑުކޮށްގެން އިން މީހެއްގެ ގައިގަ އެވެ. އެކްސިޑެންޓަށްފަހު ކާރުގައި ތިބި މީހުން ފިލީ އެވެ.

މި މައްސަލައިގައި އިކުރާމުގެ އިތުރުން ދެން ދައުވާ ކޮށްފައި ވަނީ ހ. ނޫރަންމާގެއާގޭ އިކްރާމުއްރަހުމާނާއި ގއ. ކަނޑުހުޅުދޫ އާޒާދު، ޖިނާހު އިސްމާއީލަށެވެ. މީގެ ތެރެއިން އިކްރާމް ވަނީ ކުށަށް އިއުތިރާފްވެފަ އެވެ. 

އިކްރާމްގެ މައްޗަށް ދައުލަތުން ހަ ދައުވާއެއް ވަނީ އުފުލާފަ އެވެ. އޭނާ ވަނީ ދައުލަތާއެކު އިއުތިރާފްގެ އެއްބަސްވުމެއް ހަދާފަ އެވެ. މި އެއްބަސްވުމުގައި، އޭނާއަށް އަންނަ ޖަލު އަދަބު ޖޫރިމަނާގެ އަދަބަށް ބަދަލުކުރަން ވަނީ ދެ ފަރާތުން އެއްބަސްވެފަ އެވެ. އެގޮތުން؛

މި މައްސަލައިގައި ދައުލަތުން ހުށަހަޅާފައިވާ މުދަލަށް ގެއްލުން ދިނުމުގެ ދެ ދައުވާ ވަނީ އަނބުރާ ގެންގޮސްފަ އެވެ. އެ ދެ ދައުވާ އަނބުރާ ގެންދިޔައީ މި ހާދިސާގައި އަނިޔާ ލިބުނު ފަރާތް އިން ސައިކަލަށް ލިބުނު ގެއްލުމުގެ ބަދަލުގެ ގޮތުގައި 90،000 ރުފިޔާ އަދި ގެއްލުން ލިބުނު ދެވަނަ ސައިކަލަށް އިކްރާމްގެ ފަރާތުން 5000 ރުފިޔާ ދައްކާ ހަލާސްކޮށްފައި ވާތީ އެވެ.

ގާޒީ އަލީ ނަދީމް ވަނީ އިކްރާމް ދައުލަތާއެކު ހަދާފައިވާ އެއްބަސްވުން ބަލައިގެންފަ އެވެ. އަދި އެއްބަސްވުމުގައިވާ ގޮތަށް، އޭނާގެ މައްޗަށް އަންނަ ޖަލު އަދަބު، ޖޫރިމަނާގެ އަދަބަށް ބަދަލުކޮށް، ސާބިތުވެފައިވާ ހަތަރު ދައުވާއަށް ޖުމްލަ 70،000 ރުފިޔާ ޖޫރިމަނާގެ ގޮތުގައި ދައްކަން ޖެހޭ ކަމަށް ވަނީ ހުކުމްކޮށްފަ އެވެ. އެ ފައިސާ އަށް މަސް ދުވަހުގެ ތެރޭގައި މީރާއަށް ދެއްކުމަށް ވަނީ ހުކުމްކޮށްފަ އެވެ.

ދައުލަތުން މިއަދު ފާހަގަކޮށްފައިވާ ގޮތުގައި، މި އެކްސިޑެންޓްގައި އަނިޔާ ލިބުނު ފަރާތުން ބޭސްފަރުވާއަށް ރާއްޖޭން ބޭރަށް ދިއުމަށް ހަރަދުވި 4004 ރުފިޔާ އާއި އެފަރާތަށް ލިބުނު ނަފްސާނީ އަދި އެހެނިހެން ގެއްލުންތަކުގެ ބަދަލުގެ ގޮތުގައި 20،000 ރުފިޔާ އިކްރާމް މިހާރު ވަނީ ދައްކާފަ އެވެ.

މިއަދުގެ ޝަރީއަތުގެ މަޖިލީހުގައި އިކްރާމް ވަނީ އޭނާގެ ފަރާތުން ހިނގާދިޔަ ކަންކަމާމެދު ދެރަވާކަމަށް ބުނެފަ އެވެ. އަދި އަނިޔާ ލިބުނު ފަރާތުގެ ކިބައިން ޝަރީއަތުގައި މައާފަށް އެދޭ ކަމަށް ވެސް ވަނީ ބުނެފަ އެވެ.

ހާދިސާ ހިނގި ގޮތް ކިޔައިދެމުން އޭނާ ބުނެފައި ވަނީ އެކްސިޑެންޓަށްފަހު އެތަނުން ދިޔައީ "ޕެނިކްވެގެން" ނުވަތަ ބިރުގަތުމުން ކަމަށެވެ. އޭނާ ކާރު ދުއްވަމުން ދިޔައީ 40 މޭލުގައި ކަމަށާއި ގޯޅި އެޅި ވަގުތު ކާރުގެ ފަހަތު ފުރުޅު ޕޭވްމަންޓްގެ މައްޗަށް އެރުމުން ބުރަކި ޖެއްސުމުގެ ބަދަލުގައި އޮޅިގެން ކާރު ރޭސް ކޮށްލެވުނީ ކަމަށް އޭނާ ބުންޏެވެ. 

އިކްރާމަށް ޖޫރިމަނާގެ އަދަބެއް ކަނޑައަޅައި ހުކުމް ކުރުން، އޭނާ މިއަދު ޖަލުން މިނިވަންވީ އެވެ. އޭނާ ހުރީ ޖުލައި 31، 2024 ވަނަ ދުވަހުން ފެށިގެން ބަންދުގަ އެވެ.

މި ހާދިސާގައި ކާރުގައި ދެން ތިބި އިކްރާމުއްރަހުމާނާއި ޖިނާހު ވަނީ ދައުވާތަކަށް އިންކާރު ކޮށްފަ އެވެ. އެހެންކަމުން އެމީހުންގެ ބައި ކުރިއަށް ގެންދަނީ ވަކިންނެވެ.