ޑިމޮކްރެޓްސް އުވުމާ ގާތަށް، ރައީސް ހަސަން ވެސް ވަކިވެއްޖެ

ދަ ޑިމޮކްރެޓްސްގެ ރައީސް ހަަަސަން ލަތީފް އެ މަގާމުން އިސްތިއުފާ ދެއްވައިފި އެވެ.

ހަސަން އިސްތިއުފާ ދެއްވީ ފާއިތުވި ރިޔާސީ އިންތިހާބާ ދިމާކޮށް އެމްޑީޕީ ދޫކުރައްވައި ނުކުމެވަޑައިގެން ޑިމޮކްރެޓްސް ނަމުގައި ޕާޓީއެއް އުފައްދަވައި އެމްޑީޕީ ރޫޅައިލައްވާނެކަމުގެ އިންޒާރު ދެއްވި އެ ޕާޓީގެ ކުރީގެ ބައެއް ވެރިން އަނބުރާ އެމްޑީޕީއަށް ވަޑައިގެންފައި ވަނިކޮށެވެ.

ޑިމޮކްރެޓްސްގެ ނާއިބަށް އެޑްރެސްކޮށް ހަސަން ފޮނުއްވެވި ސިޓީގައި ވަނީ މިއަދުން ފެށިގެން ޑިމޮކްރެޓްސްގެ ރައީސް ކަމުން އިސްތިއުފާ ދެއްވާ ކަމަށެވެ.

ރޭ އެމްޑީޕީއަށް އަނބުރާ ވަޑައިގެންނެވި ބޭފުޅުންގެ ތެރޭގައި އެ ޕާޓީގެ ކުރީގެ ނައިބުރައީސް އަދި ރައީސް އޮފީހުގެ މިނިސްޓަރުކަމުގައި އެމްޑީޕީ ވެރިކަމުގައި ހުންނެވި މުހައްމަދު ޝިފާޒާއި، އެމްޑީޕީގެ ޕާލިމަންޓަރީ ގުރޫޕުގެ ލީޑަރުކަން ކުރެއްވި މެދުހެންވޭރު ދާއިރާގެ ކުރީގެ މެންބަރު އަލީ އާޒިމް ހިމެނިވަޑައިގަންނަވަ އެވެ.

އެ ދެ ބޭފުޅުންގެ އިތުރަށް އެމްޑީޕީގެ ސިޔާސަތު ކޮމިޓީގެ މުގައްރިރުކަން ކުރައްވައި އެ ޕާޓީގެ މެނިފެސްޓޯތައް އެކުލަވައިލުމުގައި އިސްކޮށް މަސައްކަތްކުރެއްވި ޑިމޮކްރެޓްސްގެ ރިޔާސީ ކެނޑިޑޭޓުގެ ރަނިންމޭޓުކަންވެސް ކުރެއްވި އެސްޓީއޯގެ ކުރީގެ މެނޭޖިން ޑިރެކްޓާ ހުސައިން އަމްރުވެސްވަނީ އަނބުރާ އެމްޑީޕީއަށް ސޮއިކުރައްވާފަ އެވެ.  

މި ބޭފުޅުންގެ ތެރެއިން އާޒިމަކީ ފާއިތުވި އެމްޑީޕީ ސަރުކާރާ ދެކޮޅަށް އެ ޕާޓީން ރާއްޖޭގެ ކަނޑުގެ ސަރަހައްދެއް ދޫކޮށްފައިވާކަމަށް ވިދާޅުވެ އެއިރުގެ ރައީސް އިބްރާހީމް މުހައްމަދު ސޯލިހަށް ވަރަށް ބޮޑަށް ފާޑުވިދާޅުވާތީ އެ ޕާޓީގެ މެންބަރުކަމުން ވަކިކުރި ބޭފުޅެކެވެ.  

އާޒިމް ވަކިކުރެއްވުމާއެކު އެއިރު އެމްޑީޕީ ތެރޭގައި ވަކި ފެކްޝަނެއްގެ ގޮތުގައި ހަރަކާތްތެރިވަމުން އައި ރައީސް މުހައްމަދު ނަޝީދާ އަރިސް ހުރިހާ މަޖިލިސް މެންބަރުންނާއި ސަރުކާރުގެ އިސް މަގާމުތަކުގައި ތިއްބެވި ބޭފުޅުން އިސްތިއުފާދެއްވައި ޕާޓީން ނުކުމެވަޑައިގަތެވެ. އޭގެ ތެރޭގައި ޝިފާޒާއި، އަމްރުވެސް ހިމެނިވަޑައިގަތެވެ.  

2023 ވަނަ އަހަރުގެ ރިޔާސީ އިންތިހާބުގެ ދެވަނަ ބުރުގައި ޑިމޮކްރެޓްސްއިން ރަސްމީކޮށް އެއްވެސް ކެނޑިޑޭޓަކަށް ތާއީދުނުކުރި ނަމަވެސް އެ ޕާޓީގެ ގިނަ އާންމު މެންބަރުންނާއި ބައެއް އިސްވެރިން ގެންދެވީ ނުސީދާކޮށް "އިބޫ ނޫންގޮތެއް" ޝިއާރު ބޭނުންކުރައްވައި މިހާރުގެ ރައީސުލްޖުމްހޫރިއްޔާ ޑރ.މުހައްމަދު މުއިއްޒަށް ކެމްޕެއިން ކުރައްވަމުންނެވެ.
ނަމަވެސް ސަރުކާރަށް އަހަރުނުވަނީސް ޑިމޮކްރެޓްސްގެ ފާޑުކިޔުންތައް ސަރުކާރަށް ވަރަށް ބޮޑަށް އަންނަނީ އަމާޒުވަމުންނެވެ. އެ ޕާޓީގެ ރޫހާނީ ލީޑަރުކަމުގައި ގިނަ ބަޔަކު ގަބޫލުކުރާ ރައީސް ނަޝީދު ސަރުކާރަށް ފާޑުވިދާޅުނުވެ އެވެ. އަދި ސަރުކާރަށް ވަރަށް ބޮޑަށް ފިއްތުން ބޮޑުވާ ވަގުތުތަކުގައި ނަޝީދު ގެންދަވަނީ އެ ފިއްތުން ކުޑަވާނެ ގޮތަށް ވާހަކަދައްކަވަމުންނެވެ.  

މައުލޫމާތު ލިބިފައިވާ ގޮތުގައި މިހާރު އެމްޑީޕީ ތެރޭގައި 2028 ވަނަ އަހަރުގެ ރިޔާސީ ޓިކެޓާމެދު އުފެދިފައިވާ ވާދަވެރިކަމުގައި ގިނަ ޑިމޮކްރެޓުން ތާއީދުކުރަން ނިންމާފައިވަނީ އެމްޑީޕީގެ ޗެއާޕާސަން ފައްޔާޒު އިސްމާއީލަށެވެ.  

އެހެންނަމަވެސް ރޭ އަލުން އެމްޑީޕީއާ ގުޅިވަޑައިގެންނެވި އަލީ އާޒިމަކީ އެމްޑީޕީގެ ރައީސް އަބްދުﷲ ޝާހިދާ ކުރިއްސުރެ ގާތް ގުޅުމެއް ބާއްވަވާ، ޑީއާރުޕީ ޒަމާނުއްސުރެ ޝާހިދާއެކު މަސައްކަަތްކުރައްވާފައިވާ ބޭފުޅެކެވެ.  

މައުލޫމާތު ލިބޭ ގޮތުގައި ކުރިއަށް އޮތް ދުވަސްތަކުގައި ޑިމޮކްރެޓްސްގެ ކުރީ ސަފުގައި މަސައްކަތްކުރައްވާ އެހެން ބައެއް ބޭފުޅުންވެސް އެމްޑީޕީއާ ގުޅިވަޑައިގަންނަވާނެ އެވެ.