އެގްރޯނެޓު އުވައިނުލާ، އިންޑަސްޓްރިއަލް ޒޯން ކުންފުނީގެ ދަށަށް ބަދަލުކުރީ

ދަނޑުވެރިކަމުގެ އުފެއްދުންތައް ގަނެ ބާޒާރަށް ނެރެ އެ ސިނާއަތް ފުޅާކުރުމަށް އެސްޓީއޯގެ އެހީތެރިކަމާއެކު އުފައްދައި ފަންޑް މެނޭޖުމެންޓު ކޯޕަރޭޝަނުގެ ސަބްސިޑަރީ ކުންފުންޏެއްގެ ގޮތުގައި ފާއިތުވި ސަރުކާރުން އުފެއްދި އެގްރޯނެޓު ކުންފުނި އުވައިނުލައްވާކަމަށާއި، އެ ކުންފުނީގެ މަސައްކަތް އިތުރަށް ހަރުދަނާކުރުމުގެ ގޮތުން އަލަށް މި ސަރުކާރުން އުފެއްދި އިންޑަސްޓްރިއަލް ޒޯން ކުންފުނީގެ ދަށަށް ބަދަލުކުރެއްވީކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެ އެވެ. 

އެގްރޯނެޓު އުވައިލިކަމަށް އަޑުފެތުރުނީ އެ ކުންފުނީގެ މާލީ ހުރިހާ މުއާމަލާތްތައް ޑިސެންބަރު މަހުގެ ނިޔަލަށް ނިންމަން ފިނޭންސް މިނިސްޓްރީން އެ ކުންފުންޏަށް އެންގުމާ ގުޅިގެންނެވެ. އެއިރު ދައުލަތުގެ މީޑިޔާއިންވެސް ރިޕޯޓުކޮށްފައި އޮތީ އެގްރޯނެޓު ކުންފުނި އުވައިލަން ސަރުކާރުން ނިންމާފައިވާ ކަމަށެވެ. 

ހުވަދު އަތޮޅުގެ ރަށްތަކަށް ކުރައްވާ ދަތުރުފުޅުގެ ތެރެއިން ގއ.ނިލަންދޫއަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވަައި ދެއްކެވި ވާހަކަފުޅުގައި ރައީސްވަނީ އެގްރޯނެޓު އުވައިނުލައްވާކަން އިއުލާނު ކުރައްވާފަ އެވެ. 

ފުޅާ ދާއިރާއެއްގައި ދަނޑުވެރިކަންކުރާ ނިލަންދޫ ކައުންސިލުން އެ ރަށުގެ ދަނޑުވެރިން އުފައްދާ ތަކެތި ގަނެ ބާޒާރަށް ނެރެވޭނެ އިންތިޒާމެއް ސަރުކާރުން ހަމަޖައްސައިދިނުމަށް އެދިފައިވެ އެވެ. އަދި އެގްރޯނެޓު އުވައިލި ނަމަވެސް އެ އިންތިޒާމު ހަމަޖެހޭނެ ކޮންމެވެސް ގޮތެއް ހޯދައިދެއްވުމަށް އެ ކައުންސިލުން ރައީސް އަރިހުގައި އެދުނެވެ. 

އެ ވާހަކަފުޅާ ގުޅިގެން ރައީސް ވިދާޅުވީ އެގްރޯނެޓު ކުންފުނި އުވައިލިކަމަށް ބުނެ ދައްކާ ވާހަކައަކީ ހަގީގަތެއް ނޫން ކަމަށެވެ. އަދި އޭގެ ބަދަލުގައި ސަރުކާރުން ނިންމާފައިވަނީ އެސްޓީއޯގެ ބައިވެރިވުމާއެކު އުފައްދާފައިވާ އިންޑަސްޓްރިއަލް ފްރީ ޒޯން ކުންފުނީގެ ދަށަށް އެގްރޯ ކުންފުނި ބަދަލުކުރުމަށް ކަމުގައި ރައީސް ވިދާޅުވި އެވެ.

އެގްރޯނެޓު އުވިގެންނުދާކަން ފާހަގަކުރައްވަމުން ރައީސް ވިދާޅުވީ މި ބަދަލާއެކު އެގްރޯނެޓުގެ މަސައްކަތް ސްޓްރީމްލައިން ކުރެވި އެ ކުންފުނިން މިހާރު ކުރާ މަސައްކަތްތައް އިތުރަށް ހަރުދަނާކުރެވިގެންދާނެ ކަމަށެވެ. 

އެގްރޯނެޓުގެ މަސައްކަތުގެ އިތުރަށްވެސް އިގުތިސާދު ސިންދަފާތުކުރުމަށްޓަކައި ދަނޑުވެރިކަމަށް ވަރަށް ބޮޑަށް އިސްކަންދެއްވައިގެން، ރާއްޖޭގައި އުފެއްދޭ ކާބޯތަކެތީގެ ބާވަތްތައް ރާއްޖެއަށް ބޭނުންވާ މިންވަރަށް ރާއްޖޭގައި އުފެއްދޭ މިންވަރަށް ދަނޑުވެރިކަން ކުރިއެރުވުމަށް މަސައްކަތްކުރައްވާނެ ކަމުގައި ރައީސް ވިދާޅުވި އެވެ. 

"ދަނޑުވެރިކަން އެއީ ރާއްޖޭގައި ވަރަށް ރަނގަޅަށް ހިންގޭ ފުޅާކުރެވޭ ސިނާއަތަކަށް ހެދުން އެއީ އަޅުގަނޑުމެންގެ ސިޔާސަތަކީ. އެހެންވީމާ އާންމުކޮށް އޮންނަ ގޮތާ ދަނޑުވެރިކަމަށް މަސައްކަތްކުރަން ސަރުކާރުގެ ވުޒާރާއެއް އެވަނީ ހާއްސަކުރެވިފައި،" ރައީސް ވިދާޅުވި އެވެ.