މަސްވެރިކަމަށް އަލަށް ނިކުންނަ ދޯނިތަކަށްވެސް މިހާރު ލޯނަން އެދެވޭނެ
ލޮނުފެނުނުން މަސްފިނިކުރާ ނިޒާމު ގާއިމުކުރުމަށް ދޫކުރާ ލޯނަށް އެދުމުގެ ފުރުސަތު އަލުން ހުޅުވާލައިފިއެވެ.
ރަހުނަކާނުލާ ލޯނު ދެވިގެންދާ މިނިޒާމުގެ ދަށުން 700،00 ރުފިޔާއާއި ދެމިލިޔަން ރުފިޔާއާއި ދެމެދުގެ އަގެއް ލޯނަށް ދެވިގެންދާއިރު، ލޯނު އަނބުރާ ދެއްކުމަށް ހަމަހުގެ ގްރޭސް ޕީރިއަޑަކާއެކު ދިހަ އަހަރުގެ މުއްދަތެއް ލިބިގެނދާނެކަމަށާއި އާރްއެސްޑަބްލިއު ސިސްޓަމާއި ޖަނަރޭޓަރާއި ސޯލާ ގަތުމަށްދާ އަގުގެ 35 އިންސައްތަ އަނބުރާ ދައްކަން ނުޖެހޭނެ ކަމަށް މަސްވެރިކަމާއި ކަނޑުގެ ވަސީލަތްތަކާބެހޭ ވުޒާރާއިން މައުލޫމާތުދެއެވެ.
ވުޒާރާއިން މައުލޫމާތުދޭގޮތުގައި މަސްވެރިކަމުގެ ލައިސަންސް ނަގައިގެން މަސްވެރިކަންކުރާ 50 ފޫޓުހަމަވާ އުޅަނދުތަކަށް އަމިއްލައަށް ނުވަތަ އެސްޑީއެފްސީގައި ރަޖިސްޓަރީކޮށްފައިވާ ވެންޑަރެއް މެދުވެރިކޮށް އެ ފެސިލިޓީއަށް އެދެވޭނެއެވެ.
ލޯނަށް އެދުމުގެ ޝަރުތުތަކަށް ބަލާއިރު، ހަލް ރަޖިސްޓްރީކޮށްފައިވާ އުޅަނދަކަށްވުމާއި އިންޖީނު އެޅުމުގެ މަސައްކަތް ފަށާފައިވާ އުޅަނދަކަށްވުމާއި 50 ފޫޓަކަށްވުރެ ދިގު އުޅަނދަކަށްވުމުގެ އިތުރުން މަދުވެގެން 10 ޓަނުގެ ފިޝް ހޯލްޑިންގ ކެޕޭސިޓީ ހުންނަ އުޅަނދަކަށްވުން ވުޒާރާއިން ފާހަގަކުރެއެވެ. މީގެ އިތުރުން މިހާރުވަނީ މަސްވެރިކަން ކުރުމަށް އަލަށް ބަންނަ އުޅަނދުތަކަށްވެސް ލޯނަށް އެދުމުގެ ފުރުސަތު ހުޅުވާލާފައެވެ.