ކުޑަކުދިންތަކެއް ގްރޫމްކުރިކަމަށް ތުހުމަތުވާ ޓީޗަރު ބަންދުކުރަން ހައިކޯޓުން އަމުރުކޮށްފި

ކުޑަކުދިންތަކެއް ގުރޫމުކުރިކަމުގެ ތުހުމަތުގައި ހައްޔަރުކޮށްފައިވަނިކޮށް ދަށު ކޯޓުން ދޫކޮށްލި ޓީޗަރު ދޫކޮށްލީ ރަަނގަޅަށް ނޫންކަމަށް ކަނޑައަޅައި ހަތް ދުވަހަށް ބަންދުކުރުމަށްފަހު، އޭނާގެ ބަންދާމެދު ގޮތެއް ނިންމުމަށް ހައިކޯޓުން ހުކުމްކޮށްފި އެވެ. 

ޓީޗަރެއްގެ މަގާމުގައި ހުރެ އުމުރުން 18 އަހަރު ނުފުރޭ ފިރިހެން ކުދިންތަކަކާމެދު ޖިންސީ އަމަލުތަކެއް ހިންގައި އެކުދިން ގުރޫމުކުރި ކަމުގެ ތުހުމަތުގައި ހައްޔަރުކުރި ޓީޗަރު ދެ ފަހަރެއްގެ މަތިން ބަންދުކުރި އެވެ. ފުރަތަމަ ފަހަރު 20 ދުވަހު ބަންދުކޮށްފައި ދެވަނަ ފަހަަރު 30 ދުވަހު ބަންދުކުރި އެވެ. އެއަށްފަހު އޭނާ ބަންދުން ދޫކޮށްލީ ޝަރުތުތަކެއް ކުރުމަށްފަހު އެވެ. 

ޝަރުތުތަކެއް ކުރުމަށްފަހު އޭނާ ބަންދުން ދޫކުރަން ދަށު ކޯޓުން ނިންމި ނިންމުން ޕްރޮސެކިއުޓާ ޖެނެރަލްގެ އޮފީހުން ދިވެހިރާއްޖޭގެ ހައިކޯޓުގައި އިސްތިއުނާފު ކުރި އެވެ. އެ މައްސަލާގައި ދައުލަތުން ފާހަގަކުރި ގޮތުގައި އޭނާ ދޫކޮށްލީ ކުޑަކުދިންނަށް ޖިންސީ ގޯނާކުރާ މީހުންނާމެދު ހާއްސަ އުސޫލުތަކުން އަމަލުކުރުމުގެ ގާނޫނާ ހިލާފަށެވެ. 

އަދި އެ މައްސަލާގައި ނިންމި ނިންމުމަކީ ސުޕްރީމް ކޯޓުގެ ހުކުމެއްގައި ކަނޑައަޅާފައިވާ އިޖުރާއަތުތައް މަސްހުނިނުކުރުމުގެ އުސޫލާވެސް ހިލާފަށް ނިންމާފައިވާ ނިންމުމެއް ކަމަށް ހައިކޯޓުގައި ދައުލަތުން ބުނެފައިވެ އެވެ. 

މައްސަލަ ބެއްލެވި ފަނޑިޔާރުންގެ މަޖިލީހުގައި ހިމެނިވަޑައިގެންނެވި ހުރިހާ ފަނޑިޔާރުން ތާއީދުކުރެއްވި ފަނޑިޔާރު ނިޔާޒުގެ ރައުޔާގައި ފާހަގަކުރެއްވި ގޮތުގައި ކުޑަކުދިންނަށް ޖިންސީ ގޯނާކުރާ މީހުންނާމެދު ހާއްސަ އުސޫލުތަކުން އަމަލުކުރުމުގެ ގާނޫނުގައި އޮންނަ ގޮތުން މި ގާނޫނުގެ ދަށުން ހައްޔަރުކޮށް ބަންދުކުރަ މީހަކީ ހަގީގަތުގައި މުޖުތަމައުގެ ސަލާމަތަށް އޭނާގެ ފަރާތުން ނުރައްކަލެއް ކުރިމަތިކުރެވިދާނެ މީހަކަށް ނުވި ނަމަަވެސް އޭނާއަކީ އެފަދަ ނުރައްކަލެއް ކުރިމަތިކުރުވާނެ މީހެއްކަމަށް ބަލަންޖެހޭނެ ކަމަށް އެ ގާނޫނުގައި ބަޔާންކުރާ ކަމަށެވެ. 

ހަމަައެހެންމެ އޭނާއަކީ ހެއްކަށް ނުފޫޒު ފޯރުވުމުގެ އެއްވެސް ގާބިލުކަމެއް ނެތް މީހެއްކަމަށްވީ ނަމަވެސް އެ ގާނޫނުން ލާޒިމުކުރަނީ އެ ގާނޫނުން ތުހުމަތުކޮށް ބަންދުކުރާ މީހުންނަކީ ހެއްކަށް ނުފޫޒު ފޯރުވަފާނެ މީހުންކަމަށް ބެލުމަށްކަން ފަނޑިޔާރު ފާހަގަކުރެއްވި އެވެ. 

އަދި މި ގާނޫނުގެ ދަށުން ބަންދުކުރާ މީހުންނަކީ ޝަރުތުތައް ކުރުމަށްފަހު ކޯޓުން ދޫކޮށްލެވިދާނެ ބައެއްވެސް ނޫންކަން ހައިކޯޓުގެ ހުކުމުގައި ފާހަގަކުރި އެވެ. 

ހައިކޯޓުގެ ހުކުމުގައި ފާހަގަކުރި ގޮތުގައި މިފަދަ މައްސަލަތަކުގައި ހައްޔަރުކުރާ މީހަކީ މުޖުތަމައަށް ނުރައްކަލެއް އޭނާގެ ކިބައިން އޮތް މީހެއްތޯ އަދި ހެއްކަށް ނުފޫޒު ފޯރުވަފާނެ ނުވަތަ އެކަމުގެ ގާބިލުކަން ހުރި މީހެއްތޯ ޝަރީއަތުގައި ބަހުސްކުރާކަށް ނުޖެހެ އެވެ. 

މި މައްސަލާގައި ބަންދުގައި ހުރި މުއްތަހަމު ދޫކޮށްލިއިރު އޭނާ ދޫކޮށްލީ ގާނޫނާ ހިލާފަަށް ކަމަށާއި، އަދި ކޯޓުން އޭނާ ދޫކޮށްލުމުގައި ރިއާޔަތްކުރި ކަންކަން ވަޒަންކުރި ގޮތްވެސް ރަނގަޅު ނޫންކަމަށް ހައިކޯޓުގެ ހުކުމުގައި ބުނެފައިވެ އެވެ. އެގޮތުން އޭނާގެ ދިރިއުޅުމުގެ ވައްޓަފާޅިއަށް ރިއާޔަތްކުރި ގޮތެއް އެނގެން ނޭނގޭ ކަމަށާއި، ޝަރީއަތަށް ހުށަހެޅި ލިޔެކިޔުންތަކުން އޭނާގެ ދިރިއުޅުމުގެ ވައްޓަފާޅި ހުރީ ކުޑަކުދިންނަށް ރައްކާތެރި ގޮތަކަށް ނޫންކަމަށް ބުރަވެވޭ ކަމަށް އެ ކޯޓުން ބުނެފައިވެ އެވެ. 

އެކަންކަމަށް ބުރަވެ ފަނޑިޔާރު މުހައްމަދު ފައިސަލާއި ފަނޑިޔާރު ހަސަން ޝަފީއު ތާއީދުކުރެއްވި ފަންޑިޔާރު މުހައްމަދު ނިޔާޒުގެ ރައުޔައިގެ މައްޗަށް ބިނާކޮށް ހުކުމްކުރައްވާފައިވަނީ އޭނާ ހަތް ދުވަހަށް ބަންދުކޮށް، އެ މުއްދަތު ނިމުމުން ކުޑަކުދިންނަށް ޖިންސީ ގޯނާކުރާ މީހުންނާމެދު ހާއްސަ އުސޫލުތަކުން އަމަލުކުރުމުގެ ގާނޫނުގައި ބަޔާންކުރާ އުސޫލުތަކަށް ރިއާޔަތްކޮށް އޭނާގެ ބަންދާމެދު ކޯޓުން ގޮތެއް ނިންމުމަށެވެ.