އެމްޓީސީސީ މަޝްރޫއުތަކުގެ މައުލޫމާތު ވަގުތުން ފެންނަ ގޮތް ހަދައިފި

ރާއްޖޭގައި އެންމެ ގިނަ ތަރައްގީގެ މަޝްރޫއުތައް ހިންގަމުން ގެންދާ ކުންފުނި ކަމަށްވާ އެމްޓީސީސީއިން ހިންގާ މަޝްރޫއުތަކުގެ މައުލޫމާތު ވަގުތުން ވަގުތަށް އެނގޭނެ ގޮތް ހަދައިފި އެވެ. 

މަޝްރޫއުގެ އަޕްޑޭޓް ނުލިބުމުގެ ޝަކުވާއަށް ހައްލެއް ގެނެސް ދިނުމުގެ ގޮތުން އެމްޓީސީސީގެ ވެބްސައިޓަށް އިތުރުކުރި ޕްރޮޖެކްޓް ޕޭޖާއެކު މަޝްރޫއުތަކުގެ ހުރިހާ މައުލޫމާތެއް މިހާރު ވަގުތުން އެނގެން ހުރެ އެވެ. މި ޕޭޖު ފަރުމާކޮށްފައިވަނީ މުޅިރާއްޖޭގައި ހިންގާ މަޝްރޫއުތަކާއި މަޝްރޫއުތަކުގެ ބާވަތް އަދި ވަކިވަކި އަތޮޅުތަކާއި ރަށްރަށުގައި ހިންގާ މަޝްރޫއުތައް އެނގޭ ގޮތަށެވެ.  

ދެފުށް ފެންނަ ގޮތަކަށް މައުލޫމާތު ފެތުރުމަށް އެމްޓީސީސީން ތައާރަފުކުރި މި ޕޭޖުން ފެށިފައި ހުރި މަޝްރޫއުތަކާއި ހިންގަމުންދާ މަޝްރޫއުތައް އަދި ހުއްޓިފައި ހުރި މަޝްރޫއުތައް ވެސް އެނގެ އެވެ. އަދި މަޝްރޫއުގެ އަގުވެސް އެނގެން ހުރެ އެވެ. އެ ކުންފުނިން މި މައުލޫމާތު ވެބްސައިޓުގައި ޝާއިއު ކުރަމުން ގެންދަނީ އެ ކުންފުނީގެ ޕްރޮޖެކްޓް މެނޭޖުމަންޓް ސޮފްޓް ވެއާ ބޭނުންކޮށްގެންނެވެ. މި ސޮފްޓް ވެއާއަކީ ކޮންމެ ދުވަހަކު އޮޓަމެޓިކުން އަޕްޑޭ ވެބްސައިޓަށް ޝާއިއުވާނެ އެވެ. 

އެމްޓީސީސީގެ މިދިޔަ އަހަރުގެ ތިންވަނަ ކުއާޓަރުގެ ހިސާބުތައް ދައްކާ ގޮތުގައި އެ ކުންފުނިން އެ ކުއާޓަރާ ހަމައަށް ޖުމްލަ  191 މަޝްރޫއެއްގެ މަސައްކަތް ދިޔައީ ކުރަމުންނެވެ. މީގެތެރޭގައި ފަސް އެއާޕޯޓާއި 14 އިމާރާތެއްގެ މަސައްކަތް އަދި ހަ ކޯޒްވޭ ބްރިޖުގެ މަސައްކަތް ހިމެނެ އެވެ. މީގެ އިތުރުން 75 ބަނދަރުގެ މަޝްރޫ އާއި އެއް ޓާމިނަލްގެ މަސައްކަތުގެ އިތުރުން ދެ ޖެޓީ އާއި ބޮޑުހިލަ ޖެއްސުމުގެ 35 މަޝްރޫއެއް އަދި ފަސް ކޮންސެލްޓެންސީ މަސައްކަތުގެ އިތުރުން ހަތް މަގުގެ މަސައްކަތާއި އެއް ފުޑްސެލް ދަނޑު އަދި އެހެނިގެން ނުވަ މަޝްރޫއެއް ހިމެނެ އެވެ. މިދިޔަ އަހަރުގެ ތިންވަނަ ކުއާޓަރުގައި އަށް މަޝްރޫއެއްގެ މަސައްކަތް ނިންމި އެވެ. އަދި މި މަޝްރޫއުތަކުގެ އަގު 443 މިލިއަން ރުފިޔާއަށް އަރަ އެވެ. އަދި މުޅިން އަލަށް 202 މިލިއަން ރުފިޔާގެ މަޝްރޫއު ވަނީ އެ ކުންފުންޏަށް ސަރުކާރުން ހަވާލުވެސް ކޮށްފަ އެވެ. 

ސަރުކާރުން ހިންގާ ޕީއެސްއައިޕީ މަޝްރޫއުގެ ބޮޑު ޕަސެންޓެއްގެ މަސައްކަތް ކުރާ އެމްޓީސީސީއަށް މިދިޔަ ތިންވަނަ ކުއާޓަރުގައި އާމްދަނީގެ ގޮތުގައި 587.05 މިލިއަން ރުފިޔާ ލިބިފައިވެ އެވެ. މިއީ ދެވަނަ ކުއާޓަރުގައި ލިބުނު  497.41 މިލިއަން ރުފިޔާއާ ބަލާއިރު އިތުރުވުމެކެވެ. އާމްދަނީ އިތުރުވިނަމަވެސް ތިންވަނަ ކުއާޓަރުގައި އެ ކުންފުންޏަށް ލިބުނު ސާފު ފައިދާވަނީ 18.11 މިލިއަން ރުފިޔާ ދަށްވެފަ އެވެ.