ޗުއްޓީގަ ބޮޑު ހޭދަކުރާ ރަޝިއާ ރާއްޖޭގެ ޓޫރިޒަމްގެ އެއްވަނަ އަށް

މިދިޔަ އަހަރު ނިންމާލިއިރު ރާއްޖެ އަންނަ ޓޫރިސްޓުންގެ އެއް ވަނާގައި އޮތް ޗައިނާ ވައްޓާލުމަށްފަހު، ރަޝިއާ އެއްވަނަ އަށް އަރައިފި އެވެ. 

ޓޫރިޒަމް މިނިސްޓްރީގެ ހިސާބުތައް ދައްކާ ގޮތުން މި އަހަރުގެ ފުރަަތަމަ ހަފުތާގައި ރާއްޖެއަށް ޖުމްލަ  6,485 ރަޝިއާ ޓޫރިސްޓުން ވަނީ އައިސްފަ އެވެ. ރަަޝިއާއަކީ މިދިޔަ އަހަރު ދެވަނާގައި އޮތް ގައުމެވެ. އެ ގައުމުން މިދިޔަ އަހަރު 224,699 އަށްވުރެ ގިނަ ޓޫރިސްޓުން އައިސްފަ އެވެ. 

ރާއްޖެ އަށް ޒިޔާރަތް ކުރާ ޓޫރިސްޓުންގެ ތެރޭން އެންމެ ބޮޑު ހަރަދެއް ކުރާ ރަޝިއާ ޓޫރިސްޓުންނަކީ ރާއްޖޭގެ ހައި އެންޑް ރިސޯޓުތަކުގައިވެސް ގިނަ އަދަދަކަށް ޗުއްޓީ ހޭދަކުރާ ބައެކެވެ. މީގެ އިތުރުން ރަޝިއާ މީހުންނަށް ހާއްސަ ގެސްްޓްހައުސް ހުރި ރަށްތައްވެސް ރާއްޖޭގައި ހުރެ އެވެ. މިގޮތުން އއ. ތޮއްޑޫއަކީ ރަށަކަށް ބަލާއިރު އެންމެ ގިނައިން ރަޝިއާ މީހުންދާ އެއް ރަށެވެ. މި ރަށް އެމީހުންނަށް ހާއްސަވާ ސަބަބަކީ  ފެހިކަމާއި ތޮއްޑޫއިން ލިބޭ ފަޅޮލެވެ. 

ޓޫރިޒަމްގެ އެއްވަނައަށް ރަޝިއާ އެރިއިރު މިދިޔަ އަހަރު ނިންމާލިއިރު އެއްވަނާގައިއޮތް ޗައިނާ އޮތީ ނުވަ ވަނާގަ އެވެ. ޗައިނާ އިން މި އަހަރުގެ ފުރަތަމަ ހަފުތާގައި އެ ގައުމުން އައިސްފައިވަނީ 806 ޓޫރިސްޓުންނެވެ. ޗައިނާ އިން މިދިޔަ އަހަރު ނިންމާލިއިރު 263,042 ޓޫރިސްޓުން އައިސްފައިވެ އެވެ.  

މިވަގުތު ޗައިނާ ޓޫރިޒަމް ޓޭބަލްގެ ނުވަ ވަނާގައި އޮތްނަމަވެސް މި އަހަރުގެ 29 ވަނަ ދުވަހު ޗައިނާގެ ރަސްމީ ބަންދު ޗައިނީސް ނިއު އިޔާ އަންނާތީ މި އަދަދު މަތިވެގެންދާނެ ކަމަށް ބެލެވެ އެވެ. އަދި މިމަހުގެ 21 ވަނަ ދުވަހު ރާއްޖޭގެ ގައުމީ އެއާލައިން ޗައިނާއަށް ފަށާ ސީދާ ދަތުރުތަކާއެކު މި އަދަދު ބޮޑުތަނުން މަތި ވެގެންދާނެ ކަމަށް ބެލެވެ އެވެ. 

މިދިޔަ އަހަރު ރާއްޖޭން ނިންމާލީ ދެ މިލިއަން ޓޫރިސްޓުންގެ ލަނޑުދަނޑިއަށް ވާސިލްވެފަ އެވެ. މިދިޔަ އަހަރު އޮކިއުޕެންސީ އާއި ޓޫރިސްޓުން ރާއްޖޭގައި މަޑުކުރި މުއްދަތުވެސް ވަނީ އިތުރުވެފަ އެވެ. މިއަހަރުގެ އަމާޒަކީ މިއަދަދު 15 ޕަސެންޓް އިތުރު ކުރުމެވެ.