ފިޔޯރީ މަސް ކާރުހާނާ މަސައްކަތް ފެބްރުއަރީގައި ޗައިނާ ކުންފުންޏަކާ ހަވާލުކުރަނީ

ގދ.ފިޔޯރީގައި މަސް ބަންދުކުރާ ކާރުހާނާއެއް ގާއިމުކުރުމުގެ މަސައްކަތް އަންނަ ފެބްރުއަރީ މަހު ޗައިނާ ކުންފުންޏަކާ ހަވާލުކުރައްވާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެ އެވެ. 

ހުވަދު އަތޮޅުގެ ބައެއް ރަށްތަކަށް ރައީސް ކުރައްވަމުންދާ ދަތުރުފުޅުގެ ތެރެއިން އިއްޔެ ފިޔޯރީއަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައި ފިޔޯރީގައި މަސް ކާރުހާނާއެއް ގާއިމުކުރެއްވުމަށް އެމަނިކުފާނު ވެވަޑައިގެންނެވި ވައުދުފުޅަކީ ފުއްދެވުމުގެ އަޒުމުގައި އެ ނިޔަތުގައި ވެވަޑައިގެންނެވި ވައުދެއް ކަމަށެވެ. 

އެގޮތުން އަންނަ ފެބްރުއަރީ މަހު އެ މަޝްރޫއު ހިންގުމަށް ޗައިނާގެ ކުންފުންޏަކާއެކު ސޮއިކުރާ އެއްބަސްވުމުގެ ދަށުން 3،000 ޓަނުގެ މަސްކިރުވޭނެ ކާރުހާނާއެއް ގާއިމުކުރުމުގެ އަމަލީ މަސައްކަތްކުރެވޭނެ ކަމަށް ރައީސް ވިދާޅުވި އެވެ. 

އެގޮތުން އެއްބަސްވުމުގައި ސޮއިކުރާތާ ދެ ހަފުތާ ތެރޭގައި މަޝްރޫއުގެ މަސައްކަތް ފެށޭނެކަމަށް ވިދާޅުވި އެވެ. އެ ކާރުހާނާގައި ދުވާލަކު 100 ޓަނުގެ މަސް ބަންދުކުރެވޭއިރު، 3000 ޓަނުގެ މަސް ރައްކާކުރެވޭނެ ކޯލްޑް ސްޓޮރޭޖު ހުންނާނެ އެވެ. އަދި 50 ޓަނުގެ އައިސް ޕްލާންޓެއްވެސް ގާއިމުކުރާނެ އެވެ. 

އެ މަޝްރޫއުގެ އިތުރަށް ފިޔޯރީ ރައްޔިތުންނަށް ދަތިވެފައި ހުރި ގިނަ މައްސަލަތަކަކަށް ހައްލު ހޯދައިދެއްވާނެކަން ރައީސް އިއުލާނުކުރެއްވި އެވެ. އެގޮތުން ހައްލުކޮށްދެއްވާނެ މައްސަލަތަކުގެ ތެރޭގައި މި އަހަރު އެ ރަށު ސްކޫލުގައި މަލްޓި ޕާޕޯސް ހޯލެއް ގާއިމުކުރެއްވުމާއި، ކްލާސް ރޫމާއި ލެބު ގާއިމުކުރެއްވުން ހިމެނެ އެވެ. 

ބަޖެޓުގެ ތެރެއިން މި އަހަރު ކުނި ނައްތައިލުމުގެ ނިޒާމު ގާއިމުކުރުމުގެ މަސައްކަތް ކުރައްވާނެ ކަމުގައި ރައީސް ވައުދުވެވަޑައިގެންނެވި އެވެ. އަދިި އެ ރަށުގައި އޭޓީއެމެއް ގާއިމުކުރުމުގެ ވައުދުވެސް ފުއްދަވާނެ ކަމުގެ ޔަގީންކަަން ދެއްވި އެވެ.