އައިއެސްގެ އިސް މީހެއް ކަމަށް ބުނާ ހޫދު ބަންދުން ދޫކޮށްލީ ގޯސްކޮށް: ހައިކޯޓު

ދިވެހި ފުލުހުންގެ ހިދުމަތާއި ޔޫރަޕިއަން ޔޫނިއަންގައި ހިމެނޭ ދެ ގައުމެެއްގެ އިދާރާއަކާއި އެމެރިކާގެ ފެޑެރަލް ބިއުރޯ އޮފް އިންވެސްޓިގޭޝަން ގުޅިގެން ހިންގި އޮޕަރޭޝަނެއްގައި ހައްޔަރުކޮށް ދައުވާ އުފުލާފައިވާ، ހަރުކަށި ފިކުރު ފަތުރާ އިސްލާމިކް ސްޓޭޓް (އައިއެސް) އަށް ނިއްބަތްވާ ކަމަށް ބުނާ ވ. ދެލްވައްތަ، ހޫދު މުހައްމަދު ޒާހިރު ބަންދުން ދޫކޮށްލުމަށް ކްރިމިނަލް ކޯޓުން ނިންމި ނިންމުން ހައިކޯޓުން ބާތިލުކޮށްފި އެވެ.

ހޫދުގެ މައްޗަށް ދައުލަތުން ވަނީ ޓެރަރިޒަމްގެ ފަސް ދައުވާއެއް އުފުލާފަ އެވެ. އެއީ އިންޓަނެޓް މެދުވެރިކޮށް ޓެރަރިޒަމްގެ އަމަލެއް ހިންގަން ހިތްވަރުދިނުމުގެ ކުށުގެ ދައުވާ އާއި އިންޓަނެޓް މެދުވެރިކޮށް ޓެރަރިސްޓް ޖަމާއަތެއްގެ ލިޔެކިޔުންތައް ފެތުރުމުގެ ދައުވާ އާއި ޓެރަރިސްޓް ޖަމާއަތެއްގެ މެންބަރަކަށްވުމުގެ ދައުވާގެ އިތުރުން ޓެރަރިސްޓް ޖަމާއަތަކަށް ތާއީދު ކުރުމުގެ ދައުވާ އަދި ޓެރަރިސްޓް ޖަމާއަތަކަށް ތާއީދުކުރާ މީހެއްކަން ދޭހަވާ ފަދަ ލިޔުމާއި ކުރެހުމާ ފޮޓޯ ގެންގުޅުމުގެ ދައުވާ އެވެ. މި ދައުވާތައް ސާބިތުވެއްޖެ ނަމަ 53 އަހަރުގެ ހުކުމެއް އަންނާނެ އެވެ.

މި މައްސަލައިގައި ހޫދު ހުރީ 2022 ވަނަ އަހަރުގެ ޖެނުވަރީ މަހުން ފެށިގެން ޝަރީއަތް ނިމެންދެން ބަންދުކޮށްފަ އެވެ. އޭނާ ބަންދުން ދޫވެފައި ވަނީ މިދިޔަ އޮކްޓޯބަރު މަހުގެ ތެރޭގައި އޭނާ ބަންދުކުރަން ކޮށްފައިވާ އަމުރު ކްރިމިނަލް ކޯޓުން 60 ދުވަހަށް ސަސްޕެންޑް ކުރުމުންނެވެ. 

ސަސްޕެންޝަން ހަމަވުމުން ހޫދު ވަނީ އަމުރުގެ ސަސްޕެންޝަން އިތުރު ކޮށްދޭން އެދިފަ އެވެ. ހޫދު އެދުނު ގޮތަށް މިދިޔަ މަހު ކޯޓުން އަލުން ވަނީ 60 ދުވަހަށް އަމުރު ސަސްޕެންޑް ކޮށްފަ އެވެ. އެ އަމުރުގެ ސަސްޕެންޝަން ހަމަވާނީ އަންނަ މަހުގެ 12 ވަނަ ދުވަހު އެވެ.

އެހެންވެ، މިކަމާ ހިތްހަމަނުޖެހިގެން ދައުލަތުގެ ފަރާތުން ވަނީ މައްސަލަ ހައިކޯޓުގައި އިސްތިއުނާފް ކޮށްފަ އެވެ. ހައިކޯޓުން އިއްޔެ ކުރި ހުކުމުގައި ބުނެފައި ވަނީ ޓެރަރިޒަމް މަނާކުރުމުގެ ގާނޫނުގެ ދަށުން ހޫދަށް ދައުވާ ކޮށްފައިވާއިރު، އެ ގާނޫނުގެ ދަށުން ޝަރީއަތް ނިމެންދެން ބަންދުކުރާ މީހުންގެ ބަންދު މުރާޖައާ ކުރުމަށް ހުށަހެޅޭނީ ދައުލަތަށް ކަމަށެވެ. 

ހުކުމުގައި ބުނެފައި ވަނީ ހާއްސަ އިޖުރާއަތެއްގެ ދަށުން ބަންދުކޮށްފައި ހުރި މީހެއް ބަންދުން ދޫކޮށްލަން ވެސް ޖެހޭނީ ހާއްސަ އިޖުރާއަތު ބަޔާންކުރާ ގާނޫނުގެ ދަށުން ކަމަށެވެ. ކްރިމިނަލް ކޯޓުން އަމަލުކޮށްފައި ވަނީ އެ ގާނޫނާ ހިލާފަށް ކަމުން، އެ ނިންމުން ބާތިލުކުރަން ހައިކޯޓުން ވަނީ ހުކުމްކޮށްފަ އެވެ.

އެގޮތުން ޓެލެގްރާމް އަދި އެނޫންވެސް އެންކްރިޕްޓް ކޮށްފައިވާ މެސެޖިން ޕްލެޓްފޯމްތަކުގައި "ސްކާމިޝް" އާއި "ސްކާމިޝްކިޑް" ފަދަ ނަންނަމުގައި އެކައުންޓްތައް ހަދައިގެން ހަރުކަށި ފިކުރު ފަތުރާކަމުގެ ތުހުމަތު އޭނާގެ މައްޗަށް ވަނީ ކޮށްފަ އެވެ.

ހޫދު ހައްޔަރު ކުރީ ޖެނުވަރީ 4، 2022ގަ އެވެ. މި މައްސަލައިގެ ތަހުގީގަށް ބޭރުގެ އެކި ގައުމުތަކުގެ އިންޓެލިޖެންސް އޭޖެންސީތަކާއި، ތަހުގީގީ އިދާރާތަކުގެ އެހީތެރިކަން ލިބިފައިވާ ކަމަށް ދައުލަތުން ކުރިން ބުނެފައިވެ އެވެ. އެގޮތުން އެފްބީއައިގެ އިތުރުން އިޓަލީ ފުލުހުންނާއި ޔޫރަޕުގެ އެހެން ގައުމެއްގެ ފުލުހުން މި އޮޕަރޭޝަނުގައި ބައިވެރި ވެފައިވެ އެވެ.

ހޫދުގެ މައްސަލަ ކްރިމިނަލް ކޯޓުގައި ކުރިއަށް ގެންދަނީ ސިއްރުކޮށްގެންނެވެ.