މިދިޔަ ބޮޑު އީދު ފާހަގަކުރަން އެޗްޑީސީން އަށް ލައްކަ ހަރަދު ކުރި

ހުޅުމާލޭގައި މިދިޔަ އަހަރުގެ ބޮޑު އީދު ފާހަގަ ކުރުމަށް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން އަށް ލައްކަ ރުފިޔާ ހަރަދުކޮށްފައިވާ ކަމަށް އެ ކޯޕަރޭޝަނުން ބުނެފި އެވެ.

މައުލޫމާތު ހޯދާ ލިބިގަތުމުގެ ގާނޫނުގެ ދަށުން މި މައުލޫމާތު ހޯދަން އެދުމުން އެޗްޑީސީން ވަނީ ބޮޑު އީދުގެ ހަރަދުތައް މި ނޫހާ ހިއްސާކޮށްފަ އެވެ. މިދިޔަ އަހަރުގެ ބޮޑު އީދު ފާހަގަކުރަން ޖުމްލަ 881،753.85 ރުފިޔާ ހަރަދުކޮށްފައިވާ ކަމަށް އެޗްޑީސީން ވަނީ ބުނެފަ އެވެ.

ހުޅުމާލޭގައި ބޮޑުއީދު ފާހަގަކުރުމުގެ ގޮތުން ކުޑަކުދިންގެ ހަވީރަކާއި ހަވާ އަރުވާފައިވެ އެވެ. އަދި ވެދުމާ ދިއުމުގެ ހަރަކާތެއް ވެސް ބާއްވާފައިވެ އެވެ.

އީދު ފާހަގަކުރުމަށް ބޭއްވި ހަރަކާތްތަކުގެ ތެރެއިން އެންމެ ބޮޑު ހަރަދެއް ހިނގާފައި ވަނީ ހުޅުމާލޭގައި ބޭއްވި ކުޑަކުދިންގެ ހަވީރަށެވެ. އެ ހަރަކާތަށް 726،851.85 ރުފިޔާ ހަރަދުކޮށްފައިވެ އެވެ. ހަވާ އެރުވުމަށް ހަރަދުކޮށްފައި ވަނީ 124،902 ރުފިޔާ އެވެ.

މީގެ އިތުރުން ވެދުމާ ދިއުމުގެ ހަރަކާތަށް 15،000 ރުފިޔާ، ލަކީ ޑްރޯ ޕްރިންޓްކުރުމަށް 5000 ރުފިޔާ އަދި ތައްޔާރީތައް ވުމަށް އުޅުނު ސްޓާފްގެ ކެއުމަށް 10،000 ރުފިޔާ ހަރަދުކޮށްފައިވެ އެވެ.

އީދު ފާހަގަ ކުރުމަށް ސަރުކާރުން ބޮޑެތި ހަރަދުތައް ކުރެ އެވެ. ރަށްރަށުގެ ކައުންސިލްތަކުން ވެސް ބޮޑެތި ހަރަދުތައް ކުރެ އެވެ. މާލެ ސަރަހައްދުގައި ފަހަކަށް އައިސް ވަރަށް ކުލަ ގަދަކޮށް އީދުތައް ދަނީ ފާހަގަކުރަމުންނެވެ.