ބޮޑު ބޯޓު ރާއްޖެއަށް، އަހަރު 65،000 ޓޫރިސްޓުން އިތުރުކުރެވޭނެ

މި އަހަރުގެ އޮކްޓޫބަރު މަހު އިތުރު ވައިޑް ބޮޑީ ބޯޓެއް ގެންނާނެ 

ގައުމީ އެއާލައިންގެ ބޮޑު ބޯޓު ރާއްޖެއަށް އައިސްފައިވާއިރު ރާއްޖެއަށް އަންނަ ޓޫރިސްޓުންގެ އަދަދަށް 65،000 މީހުން އިތުރު ކުރެވޭނެ އެވެ. 

އައިލެންޑް އޭވިއޭޝަންގެ ތާރީހުގައި މިހާތަނަށް ގެނައި އެންމެ ގިނަ މީހުން އުފުލޭ އެއާބަސް އޭ330 ގެ ބޯޓަށް ވީއައިއޭގައި މިއަދު ވަނީ މަރުހަބާ ކިޔާފަ އެވެ. މި ރަސްމިއްޔާތުގައި ރައީސް ޑރ. މުހައްމަދު މުއިއްޒު އާއި ރައްޔިތުން މަޖިލީހުގެ ރައީސް އަބްދުރަހީމް އަބްދުﷲ އަދި ދައުލަތުގެ އިސްވެރިންނާއި ކުންފުނިތަކުން ވެރިން ބައިވެރިވަޑައިގަތެވެ. 

މި ރަސްމިއްޔާތުގައި ވާހަކަ ދައްވަމުން ރައީސް ޑރ. މުއިއްޒު ވަނީ ގައުމީ އެއާލައިން ތަރައްގީ ކުރަން ސަރުކާރުން ގެންގުޅުއްވާ ތަސައްވުރު ވިދާޅުވެ ދެއްވާފަ އެވެ. އަދި މި އަހަރު ގައުމީ އެއާލައިންއަށް އިތުރު ވައިޑް ބޮޑީ އެއާކްރާފްޓެއް އިތުރުވާނެކަން ރައީސް އިއުލާނު ކުރެއްވި އެވެ. މި ކުރިއެރުމާއެކު ޓޫރިޒަމަށް ގިނަ ކުރިއެރުންތަކެއް ލިބިގެންދާނެ ކަމަށް ވިދާޅުވި އެވެ. 

މޯލްޑިިވިއަން އެއާލައިންގެ ފުރަތަމަ ވައިޑް-ބޮޑީ މަތިންދާ ބޯޓު ސިންގަޕޫރުން މާލެ ގެނައީ ދިވެހިންނެވެ. ބޯޓު ދުއްވީ ކެޕްޓަން ހުނައިނާއި ކެޕްޓަން މައުމޫނެވެ. އަދި އެ ބޯޓުގެ ފަސްޓް އޮފިސަރެއްގެ ގޮތުގައި މި ދާއިރާގެ ތަޖުރިބާކާރެއް ކަމަށްވާ ގަތަރު އެއާވޭސްގައި މަސައްކަތް ކުރައްވާ ކެޕްޓަން މުހައްމަދު ތޮއްލަތު އަންވަރެވެ. އަދި އިންޖިނިއަރަކަށް ހުރީ އަހުމަދު ޝިއުޒެވެ. ކްރޫއިންގެ ގޮތުގައި ވެސް ހަރަކާތްތެރިވީ ވެސް ދިވެހިންނެވެ. 

އައިލެންޑް އޭވިއޭޝަން ސާވިސްގެ މެނޭޖިން ޑިރެކްޓަރު އިބްރާހިމް އިޔާސް ވިދާޅުވީ ފުރަތަމަ އޮޕަރޭޓް ކުރެވުނީ ޑޯނިއާ 228 މަރުކާގެ މަތިންދާ ބޯޓަކާއި ޑޭޝް 8 މަރުކާގެ މަތިންދާ ބޯޓެއް ކަމަށާ، އޭރު ރާއްޖޭގައި އޮތީ އެންމެ ހަތަރު އެއާޕޯޓް ކަމަށެވެ.
އަދި 2008 ވަނަ އަހަރު ފެށުނު ކަމަށާ މިއާއެކު ވައިގެ ދަތުރުތައް 2012 އަދި 2015 ވަނަ އަހަރު  އެއާބަސް އޭ 320 ގެ ބޯޓެއް ގެނެވުނުކަން އޭނާ ފާހަގަ ކުރެއްވި އެވެ.