އިންޑިޔާގެ އައު ސަފީރު ފަތްކޮޅު ރައީސަށް އަރުވައިފި
އިންޑިޔާއިން ރާއްޖެއަށް ކަނޑައަޅާފައި ހުންނަވާ ސަފީރުކަމަށް އައްޔަންކޮށްފައިވާ ޖީ.ބަލަސުބްރަމާނިއަމް ފަތްކޮޅު ރައީސަށް އެރުވީ މިއަދު ރައީސް އޮފީހުގައި އޮތް ރަސްމިއްޔާތެއްގަ އެވެ.
އިންޑިޔާއިން އަލަށް ރާއްޖެއަށް ކަނޑައެޅި ސަފީރު ޖީ. ބަލަސުބްރަމަނިއަން މިއަދު އޭނާގެ މަގާމުގެ ފަތްކޮޅު ރައީސުލްޖުމްހޫރިއްޔާ ޑރ.މުހައްމަދު މުއިއްޒަށް އަރުވައިފި އެވެ.
ޖުމްހޫރީ މައިދާނުން ރައީސުލްޖުމްހޫރިއްޔާގެ އޮފީހަށް ސަފީރު ވަޑައިގަތީ ރަސްމީ އިއްޒަތުގައި ހަތްކޮޅާއެކު އެވެ. ހަތްކޮޅު އެރުވީ އެމްއެންޑީއެފްގެ ބޭންޑުންނެވެ.
ރައީސް އޮފީހުގައި މިއަދު ހެނދުނު އޮތް ރަސްމިއްޔާތުގައި އައު ސަފީރުގެ ފަތްކޮޅު ރައީސަށް އަރުވައި، އެމަނިކުފާނުވަނީ އެ ފަތްކޮޅު ގަބޫލުކުރައްވާފަ އެވެ. އިންޑިޔާއިން ރާއްޖެއަށް ކަނޑައަޅާފައި ހުންނަވާ ސަފީރުގެ ހައިސިއްޔަތުން އޭނާއަށް ރައީސް މަރުހަބާ ވިދާޅުވި އެވެ.
މި ރަސްމިއްޔާތުގައި އިންޑިޔާ ސަފީރުވަނީ އެ ގައުމުގެ ބޮޑުވަޒީރު ނަރެންދުރަ މޯދީއާއި އެގައުމުގެ ހާރިޖީވަޒީރު ސުބްރަމާނިޔަން ޖައިޝަންކަރުގެ ވެދުމާއި ސަލާން ރައީސް މުއިއްޒަށް ރައްދު ކުރައްވާފަ އެވެ.
އަދި ދެ ބޭފުޅުންވަނީ އިންޑިޔާއާއި ރާއްޖޭގެ މެދުގައި ބަދަހިވަމުންދާ އެއްބާރުލުމާ ގުޅޭ ގޮތުން މަޝްވަރާކުރައްވާފަ އެވެ. އަދި އެ ގައުމުގެ ސަރުކާރުން ރާއްޖޭގައި ހިންގަމުންދާ މަޝްރޫއުތަކާއި އެކި ދާއިރާތަކުގައި އިންޑިޔާއިން ކުރަމުން އަންނަ އިންވެސްޓުމެންޓުތަކާމެދު ދެ ބޭފުޅުން މަޝްވަރާކުރެއްވި އެވެ.
ދެ ބޭފުޅުން ބައްދަލުވުން ނިންމަވައިލެއްވީ ކުރިއަށް އޮތް ތަނުގައި ދެ ގައުމުގެ ގުޅުން އިތުރަށް ބަދަހިކުރައްވައި އެއްބާރުލުންދިނުން އިތުރުކުރައްވާނެ ކަމުގެ ޔަގީންކަން ބަދަލުކުރައްވަމުންނެވެ.
ކޮމެންޓް
Republic of Maldives