ޗައިނާގައި އާދަޔާ ހިލާފަށް ރޯގާ އިތުރުވާތީ އެޗްޕީއޭއިން ރާއްޖޭގެ ހާލަތު މޮނީޓާ ކުރަނީ
މިނިސްޓްރީން ބުނެފައި ވަނީ އެޗްޕީއޭ އިން މިހާލަތު މޮނީޓާ ކުރަމުންދާ ކަމަށެވެ. ރާއްޖެއަކީ ޗައިނާ ފަތުރުވެރިން ވަރަށް ގިނައިން އަންނަ ގައުމަކަށްވާތީ މި ބަލިތައް ރާއްޖޭގައި ފެތުރުން އެކަށީގެންވެ އެވެ.
ޗައިނާގައި ނޭވާލާ ނިޒާމުގެ ބަލިތައް އާދަޔާ ހިލާފަށް އިތުރުވަމުންދާތީ ރާއްޖެއަށް ނުރައްކާ އޮތް މިންވަރު މޮނީޓާ ކުރަމުންދާ ކަމަށް ހެލްތު މިނިސްޓްރީން ބުނެފި އެވެ.
ދުނިޔޭގެ ސިއްހަތު ޖަމިއްޔާއާ ހަވާލާދީ ހެލްތު މިނިސްޓްރީން މިއަދު ބުނީ ޗައިނާގެ އެކި ހިސާބުތަކުގައި މިދިޔަ ނޮވެމްބަރު މަހުގެ ދެވަނަ ހަފްތާއިން ފެށިގެން ނޭވާލާ ނިޒާމުގެ ބަލިތައް އިތުރުވަމުންދާކަމަށް ފާހަގަކުރެވިފައިވާ ކަމަށެވެ. ޗައިނާގައި ފެތުރެމުންދާ ބަލިތަކަކީ އާއްމުކޮށްވެސް ދައުރުވާ ނޭވާލާ ނިޒާމުގެ ބަލިތަކެވެ. މީގެ ތެރޭގައި އެންމެ ގިނައީ އިންފްލުއެންޒާއެވެ. މީގެ އިތުރުން އާރްއެސްވީ، ރައިނޯވައިރަސް، އެޑިނޯވައިރަސް، މައިކޯޕްލާސްމާ ނިމުއޯނިއާ އަދި ހިއުމަން މެޓަނިއުމޯވައިރަސް ހިމެނެ އެވެ.
ފިނި މޫސުމާ ދިމާކޮށް ޗައިނާ އަދި ފިނި މޫސުން އަންނަ އެހެން ގައުމުތަކުގައި އާންމުކޮށް ނޭވާލާ ނިޒާމުގެ ބަލިތައް އިތުރުވެ އެވެ.
މިދިޔަ އަހަރާއި އަޅާ ބަލާއިރު ޗައިނާގައި މި މޫސުމުގައި ނޭވާލާ ނިޒާމުގެ ބަލިތައް ފެންނަ މިންވަރާއި، ބަލީގައި ބޮޑުވަރުވާ މީހުންގެ ނިސްބަތް މަދު ކަމަށް ތަފާސްހިސާބުތަކުން ފާހަގަކުރެވޭ ކަމަށް މިނިސްޓްރީން ބުންޏެވެ. ނަމަވެސް މިހާލަތާ ގުޅިގެން ޗައިނާގައި އިމަޖެންސީ އިއުލާނުކޮށްފައިވާ ވާހަކަ ސިއްހަތު ޖަމިއްޔާއާ ހަވާލާދީ މިނިސްޓްރީން ވަނީ ދޮގުކޮށްފަ އެވެ.
މިނިސްޓްރީން ބުނެފައި ވަނީ އެޗްޕީއޭ އިން މިހާލަތު މޮނީޓާ ކުރަމުންދާ ކަމަށެވެ. ރާއްޖެއަކީ ޗައިނާ ފަތުރުވެރިން ވަރަށް ގިނައިން އަންނަ ގައުމަކަށްވާތީ މި ބަލިތައް ރާއްޖޭގައި ފެތުރުން އެކަށީގެންވެ އެވެ.
މިނިސްޓްރީން އިތުރަށް ބުނެފައި ވަނީ މިދުވަސްވަރަކީ ވަރަށް ގިނަ ފަރާތްތަކުން އުމްރާއިންނާއި އެކި ސަރަހައްދުތަކަށް ދަތުރުކުރުމަށްފަހު އެނބުރި އަންނަ ދުވަސްވަރު ކަމުން، ނޭވާލާ ނިޒާމުގެ ބަލިތައް މިދުވަސްވަރު ރާއްޖޭގައި ވެސް އިތުރުވެދާނެކަމަށް ލަފާ ކުރެވޭ ކަމަށެވެ. އެހެންކަމުން، ހުރިހާ ފަރާތްތަކުން ވެސް އެކަމަށް ސަމާލުވާން އިލްތިމާސްކޮށްފައިވެ އެވެ.
ޗައިނާގައި ކޮވިޑް-19އާ ގާތްކުރާފަދަ އާ ވައިރަހެއް ފެތުރެމުންދާ ކަމުގެ ހަބަރުތައް ވެސް ވަނީ ފެތުރިފަ އެވެ. ނަމަވެސް ޗައިނާ ސަރުކާރުން އެކަން ވަނީ ދޮގުކޮށްފަ އެވެ.
ކޮމެންޓް
Republic of Maldives