ބޯކޮށް ވާރޭވެހި ފެންބޮޑުވާނެކަމަށް ލަފާކޮށް މާލެ ހިމެނޭހެން ނުވަ އަތޮޅަކަށް އޮރެޖު އިންޒާރު

މިއަދު ހަވީރު ރާއްޖޭގެ އަށް އަތޮޅަކަށް ބޯކޮށް ވިއްސާރަކޮށް ފެންބޮޑުވާނެކަމަށް ލަފާކުރެވޭތީ އެ ސަރަހައްދުތަކަށް އޮރެންޖު ސަމާލު ނެރެފި އެވެ. 

މޫސުމާ ބެހޭ ގައުމީ އިދާރާއިން ބުނެފައިވަނީ މިއަދު ހަވީރު 15:00 އިން ފެށިގެން އިރުއޮއްސި 19:00 އާ ހަމައަށް ބ.އަތޮޅުން ފެށިގެން ތ.އަތޮޅާ ހަމައަށް ގުގުރުމާއެކު ބޯކޮށް ވާރޭވެހި ފެންބޮޑުވާނެ ކަމުގައި ލަފާކުރެވޭ ކަމަށެވެ. 

ޖަނަވަރީ މަހުގެ އެއްވަނަ ދުވަހުން ފެށިގެން މި މަހުގެ ފަސްވަނަ ދުވަހުގެ ނިޔަލަށް ރާއްޖޭގެ ބޮޑު ބަޔަކަށް ވިއްސާރަކޮށް އުދައެރުމާއެކު ކަނޑުގަދަވެ، ބާރަށް ވައިޖެހޭނެ ކަމުގައި މޫސުމާ ބެހޭ ގައުމީ އިދާރާއިން ލަފާކޮށްފައިވެ އެވެ. 

ބ.އަތޮޅުން ފެށިގެން ތ.އަތޮޅާ ހަމައަށް އޮރެންޖު އިންޒާރު ނެރުނީ މިއަދު ހަވީރު 15:00 އިން ފެށިގެން އިރުއޮއްސި 19:00 އާ ދެމެދު ބ.އަތޮޅުން ހައްދުންމައްޗާ ހަމައަށް ވިއްސާރަކޮށް، ވިލާގަނޑުގައި ގަޑިއަކު 45 މޭލަށް ވައިގަދަވާނެ ކަމުގައި ލަފާކޮށް ރީނދޫ ސަަމާލު ނެރުނުތާ ގަޑިއިރެެއްހައިއިރު ފަހުންނެވެ. 

މެޓު އޮފީހުން ޖަނަވަރީ އެއްވަނަ ދުވަހު ނެރުނު ބަޔާނެއްގައި ބުނެފައި ވަނީ މި ވިއްސާރަ ކުރާނެ ކަމަށް ލަފާކުރެވޭ ސަބަބަކީ ސްރީލަންކާގެ އިރުދެކުނުގައި އުފެދިފައިވާ ކޮޅިގަނޑާއި، މި ކޮޅިގަނޑާއި ގުޅިފައިވާ ލޯޕްރެޝަރުގެ ސަބަބުން ކަމަށެވެ.

މި ކޮޅިގަނޑުގެ ސަބަބުން ޖެނުވަރީ 1 އިން 5 އަށް ރާއްޖޭގެ ބޮޑު ބަޔަކަށް ވިއްސާރަ ކުރާނެ ކަމަށް ލަފާކޮށްފައިވާއިރު، ބައެއް އަތޮޅުތަކަށް އުދަ އެރުމުގެ ފުރުސަތު އޮތް ކަމަށް ވެސް މެޓުން ލަފާކޮށްފައިވެ އެވެ.

މެޓުން ބުނީ މި ފަސް ދުވަހު ވައި ޖެހޭނީ އިތުރާއި މެދުރާއްޖެތެރޭގެ އަތޮޅުތަކަށް، އިތުރާއި އިރު އުތުރުން، ދެކުނުގެ އަތޮޅުތަކަށް ހުޅަނގާއި ހުޅަނގުއުތުރުން، ގަނޑިއަކު 15 މޭލާއި 25 މޭލާ ދެމެދުގެ ބާރުމިނުގައި ކަމަށެވެ. އަދި ވިލާގަނޑުގައި ގަޑިއަކު ގާތްގަނޑަކަށް 50 މޭލަށް ވައި ގަދަވާނެ ކަމަށް ބެލެވޭ ކަމަށެވެ.