ނިމުނު އަހަރު ޖިންސީ ކުށްތަކާއި މާރާމާރީ އިތުރުވިއިރު، ޑްރަގާއި ވައްކަން ދަށަށް

ފާއިތުވި 2024 ވަނަ އަހަރު އޭގެ ކުރީ އަހަރާ އަޅާބަލާއިރު ޖިންސީ ކުށްތަކާއި މާރާމާރީ އިތުރުވިއިރު ވައްކަމާއި މަސްތުވާތަކެތީގެ މައްސަލަތައް ރިޕޯޓުކުރި މިންވަރު ދަށްވެފައިވާކަން ފުލުހުންގެ ތަފާސްހިސާބުތަކުން ދައްކައިފި އެވެ. 

ފުލުހުންގެ ހިދުމަތުން އާންމުކޮށްފަައިވާ ތަފާސްހިސާބުތަކަށް ބަލާއިރު 2024 ވަނަ އަހަރުގެ ނިޔަލަށް އެންމެ ގިނައިން ހުށަހަޅާފައިވަނީ ވައްކަމުގެ މައްސަލަ އެވެ. ނަމަވެސް 2023 ވަނަ އަހަރަށްވުރެ ހުށަހެޅި ވައްކަމުގެ މައްސަލަތައް ކުޑަކޮށް މަދުވެފައިވެ އެވެ. 

އެގޮތުން 2023 ގައި ވައްކަމުގެ 3،817 މައްސަލައެއް ފުލުހަށް ހުށަހެޅުނުއިރު 2024 ގައި ހުށަހެޅިފައިވަނީ 3،751 މައްސަލަ އެވެ. މަސްތުވާތަކެތީގެ 1،752 މައްސަލަ 2023 ގައި ފުލުހަށް ރިޕޯޓުކޮށްފައިވާއިރު ނިމުނު އަހަރު އެ އަދަދުވަނީ 1662 މައްސަލައަށް މަދުވެފަ އެވެ. 

2023 އާ އަޅާބަލާއިރު މަދުވި މައްސަލަތަކުގެ ތެރޭގައި އޮޅުވާލައިގެން ފައިސާ ހޯދުމުގެ މައްސަލަތައް ނުވަތަ ޓެކުމުގެ މައްސަލަތައް ހިމެނެެ އެވެ. އެމްބެޒުލްމެންޓުގެ 758 މައްސަލައެއް 2023 ގައި ހުށަހެޅުނުއިރު 2024 ގައި ހުށަހެޅިފައިވަނީ 654 މައްސަލަ އެވެ. 

ނަމަަވެސް އެހެނިހެން ބައެއް ބާވަތުގެ މައްސަލަތައް 2024 ގައި ރިޕޯޓުކުރި މިންވަރު އިތުރުވެފައިވެ އެވެ. 

2024އާ އަޅާބަލާއިރު ރިޕޯޓުކުރި މިންވަރު އިތުރުވި މައްސަލަތަކުގެ ތެރޭގައި ޖިންސީ ކުށްތަކާއި، މަގުމަތީ އެކްސިޑެންޓުތަކާއި، މާރާމާރީ ހިމެނެ އެވެ. އެގޮތުން ނިމުނު އަހަރު ޖިންސީ ކުށުގެ 316 މައްސަލައެއް ހުށަހެޅުނުއިރު 2023 ގައި ހުށަހެޅިފައި އޮތީ ޖިންސީ ކުށުގެ 293 މައްސަލައެކެވެ. 

އަދި މާރާމާރީގެ 711 މައްސަލަ ނިމުނު އަހަރު ހުށަހެޅުނުއިރު އޭގެ ކުރީ އަހަރު ހުށަހެޅިފައިވަނީ 655 މައްސަލައެކެވެ. ގެވެށި އަނިޔާގެ 248 މައްސަލަ ނިމުނު އަހަރު ހުށަހެޅުނުއިރު ކުރީ އަހަރު ހުށަހެޅިފައި އޮތީ 219 މައްސަލަަ އެވެ. 

2024 ގައި 2،867 މަގުމަތީ އެކްސިޑެންޓުގެ މައްސަލަ ފުލުހަށް ހުށަހެޅިފައި އޮތްއިރު 2023 ގައި ހުށަހެޅިފައިވަނީ 2،300 މަގުމަތީ ހާދިސާގެ މައްސަލަ އެވެ. 

އޭގެ އިތުރަށް ކައުންޓާފިޓް އަދި ފޯޖަރީގެ 166 މައްސަލައަކައި، މުދަަލަށް ގެއްލުންދިނުމުގެ 665 މައްސަލަައަކާއި، ޗަކު ބައުންސްވުމުގެ ހަތް މައްސަލައަކާއި، ތަކެތި ގެއްލިގެން ހުށަހަޅާފަައިވާ 1،028 މައްސަލައެއްގެ އިތުރަށް ތަންތަން ފަޅާލައިގެން ވައްކަންކުރުމުގެ 504 މައްސަލައެއް ނިމުނު އަހަރު ފުލުހަށް ހުށަހެޅިފައިވެ އެވެ. 

ފުލުހުންގެ ހިދުމަތުން އަންނަނީ އެ އިދާރާއިން ރައްޔިތުންނަށް ދޭ ހިދުމަތްތަކުގެ ފެންވަރު ރަނގަޅުކޮށް، އަމާންކަން ކަށަވަރުކުރުމަށް ގިނަ މަސައްކަތްތަކެއް ކުރަމުންނެވެ. އަދި ކުރިއަށް އޮތް އަހަރުތަކުގައި އެ ހިދުމަތުގެ ހަރަަކާތްތެރިކަން އިތުރުކުރުމަށް ފިޔަވަޅުތަކެއް އަޅަންވަނީ ނިންމާފަ އެވެ.