ފަތުރުވެރިކަން 2024؛ ހަ ގައުމަކުން ލައްކައަކަށްވުރެ ގިނަ ޓޫރިސްޓުން، %9 ގެ ކުރިއެރުމެއް

ނިމުނު 2024 ވަނަ އަހަރު އޭގެ ކުރީ އަހަރާ އަޅާބަލާއިރު ރާއްޖެއަށް އައި ފަތުރުވެރިންގެ އަދަދު %9 އިތުރުވެފައިވާއިރު، ހަ ގައުމަކުން އައި ފަތުރުވެރިންގެ އަދަދު ލައްކައަކަށްވުރެ އިތުރުވެފައިވެ އެވެ.

މި އަހަރުގެ ދެ މިލިއަން ޓޫރިސްޓަށް މަރުހަބަ ކިޔަނީ

ފާއިތުވި 2024 ވަނަ އަހަަރު ނިމުނުއިރު ރާއްޖެއަށް ފަތުރުވެރިން ޒިޔާރަތްކުރާ ހަ ގައުމަކުން ލައްކައަކަށްވުރެ ގިނަ ޓޫރިސްޓުން އައިސް، އޭގެ ކުރީ އަހަރާ އަޅާބަލާއިރު %9 ގެ ކުރިއެރުމެއް ލިބިފައިވާކަން ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފި އެވެ. 

ޓޫރިޒަމް މިނިސްޓްރީން އާންމުކޮށްފައިވާ ތަފާސްހިސާބުތަކަށް ބަލާއިރު ނިމުނު އަހަރު ދެ ގައުމަކުން ދެ ލައްކައަށްވުރެ ގިނަ ފަތުރުވެރިން ރާއްޖެއަށް އައިސްފައިވެ އެވެ. އެއީ ޗައިނާއާއި ރަޝިޔާ އެވެ. އޭގެ އިތުރަށް ހަތަރު ގައުމަކުން އެއް ލައްކައަށްވުރެ ގިނަ ޓޫރިސްޓުން އައިސްފައިވެ އެވެ. 

އެންމެ ގިނައިން ޓޫރިސްޓުން ރާއްޖެއަށް ޒިޔާރަތްކުރި ގައުމުތަކުން ފަތުރުވެރިން އައިސްފައިވާ އަދަދުތައް: 

  •  ޗައިނާ: 263،042
  •  ރަޝިޔާ: 224،699
  •  އިނގިރޭސިވިލާތް: 180،455
  •  ޖަރުމަނުވިލާތް: 156،208
  •  އިޓަލީ: 144،214
  •  އިންޑިޔާ: 130،328

ފާއިތުވި 2024 ވަނަ އަހަރަށް ސަރުކާރުން ކަނޑައަޅާފައިވާ ފަތުރުވެރިކަމުގެ އަމާޒަކީ ދެ މިލިއަން ފަތުރުވެރިން ގެނައުމެވެ.  އަހަރު ނިންމައިލިއިރު 2،041،526 (ދެ މިލިއަން ސާޅީސް އެއްހާސް ފަސްސަތޭކަ ސައްބީސް) ފަތުރުވެރިން ރާއްޖެއަށް ޒިޔާރަތްކުރި އެވެ. އެއީ ކުރީ އަހަރާ އަޅާބަލާއިރު %9 ގެ އިތުރުވުމެކެވެ. 

ޑިސެންބަރު މަހުގައި އެވެރެޖުކޮށް ކޮންމެ ދުވާލަކު 6،796 ފަތުރުވެރިން ރާއްޖެއަށް އައިސްފައިވާއިރު، ޖުމްލަކޮށް މުޅި އަހަރު އެވެރެޖުކޮށް 5،593 ފަތުރުވެރިން ރާއްޖެއަށް އައިސްފައިވެ އެވެ. 

އައު އަހަރުގެ އަމާޒު

އައު އަހަރަށް ޓޫރިޒަމްގެ އަމާޒެއްގެ ގޮތުގައި ސަރުކާރުން ކަނޑައަޅާފައިވަނީ 2024 ވަނަ އަހަރަށްވުރެ 15 އިންސައްތަ އިތުރަށް ފަތުރުވެރިން ގެނައުމެވެ. އެކަމަށްޓަކައި ސަރުކާރުންވަނީ ހާއްސަ ގިނަ މަސައްކަތްތަކެއް ކުރުމަށް ރާވާފަ އެވެ. ޖުމްލަ 2.5 މިލިއަން ފަތުރުވެރިން ރާއްޖެއަށް ގެނައުމަށް ސަރުކާރުން އަމާޒު ހިފާފައިވެ އެވެ. 

ރައީސް އަބްދުﷲ ޔާމީނުގެ ވެރިކަމުގައި ވެލާނާ އިންޓަނޭޝަނަލް އެއާޕޯޓު ތަރައްގީކުރުމަށް ފެށި މަޝްރޫއުގެ މަސައްކަތް އަންނަ އަހަރު ތެރޭ ނިންމައިލުމަށް ސަރުކާރުން އަންނަނީ މަސައްކަތްކުރަމުންނެވެ. އެއާޕޯޓު ނިމުމުން ރާއްޖެއަށް ދަތުރުކުރާ އެއާލައިންތަކުގެ އަދަދު ވަރަށް ބޮޑަށް އިތުރުކުރެވި ފަތުރުވެރިން އަންނަ މިންވަރުވެސް އިތުރުވާނެކަމަށް ސަރުކާރުން ގަބޫލުކުރެ އެވެ. 

ކޮމެންޓް

0
450

މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ

Newsroom
Phone: 7819333
Email: news@themirror.mv
Marketing
Phone: 7399333
Email: marketing@themirror.mv
H. Fairlin, Bodu thakurufaanu magu, Male
Republic of Maldives
© 2025 Mi. All rights reserved.