މިއަދު ބޮޑު ބަޔަކަށް ވިއްސާރަވާނެ، ނ.އިން ލ.އަށް ހުދު ސަމާލު ނެރެފި

ރާއްޖޭގެ ބޮޑު ބަޔަކަށް މިއަދު ވިއްސާރަވާނެ ކަމަށް މޫސުމާ ބެހޭ ގައުމީ އިދާރާއަށް ލަފާކުރެވޭތީ، ނ.އަތޮޅުން ފެށިފެން ލ. އަތޮޅާ ހަމައަށް ހުދު ސަމާލު ނެރެފި އެވެ. 

އުތުރުގެ ނ.އިން ފެށިގެން ދެކުނުން ލ.އާ ހަމައަށް މެޓު އޮފީހުން މިއަދު ނެރުނު ސަމާލުގެ މުހުލަތަކީ ހެނދުނު 6:30 އިން ފެށިގެން މެންދުރުކުރީ 11:30 އާ ހަމައަށެވެ. 

މޫސުމާ ބެހޭ އިދާރާއިން ލަފާކުރާ ގޮތުގައި މިވަގުތުތަކުގައި އެ ސަރަހައްދުގައި ހިމެނޭ އަތޮޅުތަކަށް ބޯކޮށް ވާރޭވެހޭނެ އެވެ. އަދި ގުގުރުމަކީވެސް އެކަށީގެންވާ ކަމެއްކަމަށް އެ އިދާރާއިން ބުނެފައިވެ އެވެ. 

އޭގެ އިތުރަށް ވިލާގަނޑުގައި ގަޑިއަކު 40 މޭލަށްވުރެ ބާރަށް ވައިޖެހޭނެ ކަމުގައިވެސް އެ އިދާރާއިން ލަފާކުރެ އެވެ. 

މިހާރު ކުރަމުންދާ ވިއްސާރައަކީ ސްރީލަންކާގެ އިރު ދެކުނުގައި އުފެދިފައިވާ ކޮޅިގަނޑެއް އަދި އެ ކޮޅިގަނޑާ ގުޅުގެން އުފެދިފައިވާ ލޯ ޕްރެޝާ ޓްރަފުގެ ސަބަބުން ކުރަމުން އަންނަ ވިއްސާރައެކެވެ. މެޓު އޮފީހުން ލަފާކުރާ ގޮތުން އައު އަހަރުގެ ފުރަތަމަ ފަސް ދުވަހުވެސް ވިއްސާރަވާނެ އެވެ.