އަދީބުގެ 1 މިލިއަން ރުފިޔާގެ ޖޫރިމަނާ މަސް ދުވަހުން ދައްކަން ހުކުމް ކޮށްފި

އެމްއެމްޕީއާރްސީގެ ބޮޑު ހިޔާނާތުގެ މައްސަލައިގައި ކުރީގެ ނައިބް ރައީސް އަހުމަދު އަދީބު އަބްދުލްގަފޫރުގެ މައްޗަށް އުފުލާފައިވާ ހަތް ދައުވާ ސާބިތުވެ 20 އަހަރަށް ޖަލަށްލުމަށް ކުރި ހުކުމުގައި ޖޫރިމަނާގެ ގޮތުގައި ދައްކައި އޮތް ފައިސާގެ ތެރެއިން ނުދައްކާ އޮތް އެއް މިލިއަން ރުފިޔާ މަސް ދުވަހުން ދެއްކުމަށް ސިވިލް ކޯޓުން އިއްޔެ ހުކުމް ކޮށްފި އެވެ.

އަދީބުގެ މައްޗަށް ދައުލަތުން ދައުވާކުރީ ހިޔާނާތްތެރިވުމުގައި ބައިވެރިވެފައިވާ ކަމަށް ބުނާ ދެ ދައުވާ އަކާއި މަގާމުގެ ނުފޫޒު ބޭނުންކޮށްގެން ނާޖާއިޒު ފައިދާ ހޯދައިދިނުމުގެ ދެ ދައުވާ އެކެވެ. މަނީ ލޯންޑަރިންގެ ދެ ދައުވާ އާއި ރަސްމީ ހައިސިއްޔަތު ނަހަމަ ގޮތުގައި ބޭނުންކުރިކަމުގެ ދައުވާއެއް ވެސް އުފުލި އެވެ.

މި ދައުވާތަކާއި ގުޅިގެން އަދީބު ވަނީ ތަހުގީގަށް އެއްބާރުލުންދޭން ނިންމައި ދައުލަތާއި އެކު އެއްބަސްވުމެއް ހަދާފަ އެވެ. އެހެން ކަމުން އަދީބަށް އިއްވީ ލުއި ހުކުމެކެވެ. އަދި މި ދައުވާތަކަށް އަދީބު އެއްބަސްވުމުންނާއި އަދީބާއި ދައުލަތުގެ ފަރާތުންވެސް މި މައްސަލަތަކަށް އަވަސް ނިއާއެއް ކަނޑައެޅުމަށް ބޭނުންވުމުން އަދީބު، 20 އަހަރަށް ޖަލަށްލުމާއެކު ދެ މިލިއަން ރުފިޔާއިން ޖޫރިމަނާ ކުރުމަށް ކްރިމިނަލް ކޯޓުން ހުކުމްކުރީ އޮކްޓޫބަރު 5، 2020 ގައެވެ.

ކޯޓްގެ ހުކުމްގައި ވަނީ މަސް ދުވަހުގެ ތެރޭގައި އެ ފައިސާ މީރާއަށް ދެއްކުމަށެވެ. ނަމަވެސް މިހާތަނަށް އޭގެތެރެއިން އެއް މިލިއަން ރުފިޔާ ނުދައްކާ އޮތުމުން ދައުލަތުން ވަނީ އެ ފައިސާ ހޯދަން ސިވިލް ކޯޓުގައި ދައުވާ ކޮށްފަ އެވެ.

ސިވިލް ކޯޓުން އިއްވި ހުކުމުގައިވާ ގޮތުން، އެ ފައިސާ އެއްފަހަރާ ދެއްކުމަށް ދަތިވާނެ ކަމަށް އަދީބު ފާހަގަކޮށްފައިވާކަން އެނގެ އެވެ. ނަމަވެސް މަސް ދުވަހަށްވުރެ ދިގު މުއްދަތެއް އަދީބަށް ދިނުމަށް ދައުލަތުން ވަނީ އިންކާރުކޮށްފަ އެވެ. އެހެންވެ، އިއްޔެ އިން ފެށިގެން އެއް މަސްދުވަސް ތެރޭގައި އެ ފައިސާ ދައްކާ ހަލާސް ކުރުމަށް ހުކުމްކޮށްފައިވެ އެވެ.

އަދީބަށް 20 އަހަރު ދުވަހުގެ ޖަލު ހުކުމެއް އިއްވިޔަސް، ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި އަދީބު ގޭ ބަންދަށް ބަދަލު ކުރި އެވެ. އެ ފަހުން ހަތަރު ދުވަހަށް ޖަލު ހުކުމް ކުޑަކޮށްދެއްވި އެވެ. އެ ނިންމުމާއެކު އަދީބު މިހާރު ވަނީ މިނިވަންވެފަ އެވެ.