ތާރީހީ ދުވަހެއް | ރާއްޖެއާއި ޗައިނާއާ ދެމެދު ފްރީ ޓްރޭޑް ފެށިއްޖެ
މި އެއްބަސްވުމާއެކު ރާއްޖޭގެ މަހުގެ އުފެއްދުންތައް ޗައިނާއަށް ޑިއުޓީ ނުނަގައި އެތެރެކުރެވޭނެ އެވެ.
ރާއްޖޭގެ ތާރީހުގައި ދެ ގައުމެއްގެ ދެމެދުގައި ފުރަތަމަ ގާއިމްކުރި ފްރީޓްރޭޑް އެގްރިމެންޓް (އެފްޓީއޭ) ނުވަތަ މިނިވަން ވިޔަފާރީގެ އެއްބަސްވުމަށް މިއަދުން ފެށިގެން އަމަލު ކުރަން ފަށައިފި އެވެ.
ރައީސް އަބްދުﷲ ޔާމީންގެ ވެރިކަމުގައި އެކުލަވާލި ޗައިނާ-ރާއްޖެ މިނިވަން ވިޔަފާރީގެ އެއްބަސްވުމުން ގާއިމް ކުރިނަމަވެސް މިދިޔަ ރައީސް އިބްރާހިމް މުހައްމަދު ސޯލިހުގެ ސަރުކާރުން އެ އެއްބަސްވުމަށް އަމަލު ކުރުން އޮތީ ހުއްޓުވާފަ އެވެ. ނަމަވެސް މިހާރުގެ ރައީސް ޑރ. މުހައްމަދު މުއިއްޒު ވެރިކަމަށް ވަޑައިގެން ވަނީ ދިވެހިންނަށް ބޮޑު މަންފާއެއް ލިބޭ ގޮތަށް އެއްބަސްވުން ފަހި ކުރައްވާފަ އެވެ.
ރާއްޖެ ޗައިނާ އެފްޓީއޭގެ ޓައިމްލައިނެއް
- އެއްބަސްވުމުގައި ސޮއިކުރެއްވީ 14، ޑިސެމްބަރުގައި 2014 ގައި
- އެއްބަސްވުމަށް ހުރުން ދިނީ ނޮވެމްބަރު 2017 ގައި
- އެފްޓީއޭއަށް އަމަލުކުރަން ފަށަން މަޝްވަރާ ފެށީ މިދިޔަ އަހަރު ޖެނުއަރީ މަހު
ރާއްޖެއަށް އަހަރަކު 700 މިލިއަން ޑޮލަރުގެ މުދާ އެތެރެކުރާ ޗައިނާއާ ދެމެދު ހެދި މިނިވަން ވިޔަފާރީގެ އެއްބަސްވުމާއެކު ސަރުކާރުން ވަނީ ޗައިނާ އާއި ރާއްޖޭގެ ވިޔަފާރި އަހަރު އެއް ބިލިއަން ޑޮލަރަށް މަތި ކުރާނެ ކަމަށް ބުނެފަ އެވެ.
ޗައިނާ-ރާއްޖެ މިނިވަން ވިޔަފާރީގެ އެއްބަސްވުން
- ޗައިނާ އިން އެތެރެކުރާ މުދަލުގެ 91 ޕަސެންޓް މުދަލުން ޑިއުޓީ ނުނަގާނެ، ރާއްޖެއަށް 7،000 އަށް ވުރެ ގިނަ އައިޓަމް އެތެރެކުރޭ
- ރާއްޖޭން ޗައިނާއަށް އެކްސްޕޯޓް ކުރާ މަހުގެ ހުރިހާ ބާވަތްތަކުން ޑިއުޓީ މައާފުވާނެ
- ތާޒާ، ފިނިކޮށް ގަނޑުކޮށްފައި ހުންނަ ކަޅު ބިލަމަހާއި ފާނައިގެ ބާވަތްތަކާއި އަދި ކަންނެލީގެ ބާވަތްތަކާއި މަސް ދަޅާއި ވަޅޯ މަހާއި ލޮނު މަހުގެ އިތުރުން ސީފުޑްގެ ބާވަތްތައް ވެސް ހިމެނޭނެ
- ރާއްޖޭގައި އިމާރާތް ކުރުމުގެ ދާއިރާގައި ބޭނުންކުރާ މުދާ އަގުހެޔޮވާނެ
- އިމާރާތް ކުރުމުގެ ދާއިރާ އަށް އިންވެސްޓްކުރުމަށް އިތުރު ފުރުސަތުތައް ފަހިވާނެ
- އިމާރާތް ކުރުމަށް ބޭނުންވާ ގާތްގަނޑަކަށް ހުރިހާ ބާވަތަކުން ޑިއުޓީ މާފުވާނެ
- ރާއްޖޭގައި އިންސާނީ ވަސީލަތްތައް ތަރައްގީކޮށް، އެކި ދާއިރާތަކުން ދިރާސާކުރުމަށް ޗައިނާގެ އެހީ ލިބުމާއި ދިވެހިންގެ ހުނަރު އިތުރުކުރުމަށް ވެސް ފުރުސަތު ލިބޭނެ. ޗައިނާ އިން އަންނަ އިންވެސްޓްމަންޓްތައް އިތުރުކުރުމަށް ދެ ގައުމުގައި އިންވެސްޓްމަންޓް ޕްރޮމޯޝަން ހިންގުމުގެ ފުރުސަތު ލިބޭނެ.
- އަމިއްލަ އުފެއްދުންތައް އުފައްދާ ފަރާތްތަކުގެ ޕްރޮޑަކްޓްތައް ޗައިނާއަށް ބޭރު ކުރަން ފުރުސަތު ފަހިވާނެ
- އެކްސްޕޯޓާއި ރިއެކްސްޕޯޓްގެ ދާއިރާއިން ވަޒީފާގެ ފުރުސަތުތައް އިތުރުވާނެ
- މިހާރު ފަރުނީޗަރުން ފަސް ޕަސެންޓްގެ ޑިއުޓީއެއް ނަގާ، މި އެއްބަސްވުމުގެ ސަބަބުން ޑިއުޓީ ކެނޑޭނޭ
ރާއްޖޭން ދަނީ މިނިވަން ވިޔަފާރީގެ އެއްބަސްވުމުގެ އިތުރުން ކަރަންސީ ސެޓްލްމެންޓު އެއްބަސްވުމެއް ހަދަންވެސް މަސައްކަތް ކުރަމުންނެވެ. މި އެއްބަސްވުމުގެ ދަށުން ސަބަބުން ޗައިނާއިން މުދާ އެތެރެކުރަން އަހަރަކު ވިޔަފާރިވެރިން ބޭނުންވާ 700 މިލިއަނެއްހާ ޑޮލަރުގެ ބަަދަލުގައި ދިވެހި ރުފިޔާ އިން މުދަލަށް އަގު ދެއްކުމުގެ ފުރުސަތު ލިބޭނެ އެވެ.
ކޮމެންޓް
Republic of Maldives