ފުރަތަމަ ފަހަރަށް ސޫރިޔާގެ މަރުކަޒީ ބޭންކުގެ ގަވަރުނަރުކަމަަށް އަންހެން ބޭފުޅެއް

ސޫރިޔާގެ ވެރިކަަންކުރައްވާ އަހްމަދު އައްޝަރުއު އެ ގައުމުގެ މަރުކަޒީ ބޭންކުގެ ގަވަނަރުގެ މަގާމަށް އެ އިދާރާގެ 70 އަހަރުވީ ތާރީހުގައި ފުރަތަމަ ފަހަރަށް އަންހެން ބޭފުޅެއްކަމަށްވާ މައިސާ ސަބްރީން އައްޔަންކުރައްވާފައިވާކަމަށް އެ ގައުމުގެ މަސްއޫލުވެރިޔަކު ވިދާޅުވެއްޖެ އެވެ. 

ދާއިރާގައި 15 އަހަރަށްވުރެ ދިގު ތަޖުރިބާ ލިބިވަޑައިގެންފައިވާ ސަބްރީނަކީ ސޫރިޔާގެ މަރުކަޒީ ބޭންކުގައި ބޭންކިން ދާއިރާ ރެގިއުލޭޓުކުރުމުގެ މަސައްކަތުގައި ގިނަ ދުވަސްތަކެއްގައި ހަރަކާތްތެރިވެވަޑައިގެންފައިވާ ތަޖުރިބާކާރު ބޭކަނބަލެކެވެ. 

ދިމިޝްގު ޔުނިވާސިޓީން އެކައުންޓިން ދާއިރާއިން މާސްޓާސް ޑިގުރީ ހާސިލުކުރައްވާފައިވާ ސަބްރީންއަކީ 2018 ވަނަ އަހަރުން ފެށިގެން ދިމިޝްގުގެ ހިއްސާގެ ބާޒާރުގެ ޑިރެކްޓަރުންގެ ބޯޑުގެ މެންބަރެކެވެ. އަދި އޭނާއަކީ ޑެޕިއުޓީ ގަވަނަރުކަން ކުރައްވައި އެ އިދާރާގެ އޮފީސް ކޮންޓްރޯލު ޑިވިޝަނުގެ ވެރިޔާގެ މަގާމު އަދާކުރައްވާފައިވާ ބޭފުޅެއްކަމަށް އެ ބޭންކުގެ ވެބްސައިޓުގައި ބުނެފައިވެ އެވެ.

ސަބްރީން މަގާމާ ހަވާލުވެވަޑައިގަތުމުގެ ކުރިން މަގާމުގައި ހުންނެވީ 2021 ވަނަ އަހަރު ކުރީގެ ރައީސް ބައްޝާރުލް އަސަދު މަގާމަށް އައްޔަންކުރެއްވި މުހައްމަދު އިސާމް ހާޒިމް އެވެ. ހައިތައް ތަހުރީރުއް ޝާމްއިން އަސަދުގެ ވެރިކަން ނިމުމަކަށް ގެނައުމާ ހަމައަށްވެސް ގަވަނަރު ކަމުގައި ހުންނެވީ އޭނާ އެވެ. 

ކުރިން ދައުލަތުން ވަރަށް ބޮޑަށް ކޮންޓުރޯލުކުރަމުން އައި އިގުތިސާދު މިނަވަންކުރުމަށް މަރުކަޒީ ބޭންކުން މިހާރު އަންނަނީ ފިޔަވަޅުތައް އަޅަމުންނެވެ. އެގޮތުން އިމްޕޯޓު އެކްސްޕޯޓަށް ކުރިއާލައި ހުއްދަ ހޯދުން ލާޒިމުކޮށްފައި އޮތް އޮތުން ނިމުމަކަށް ގެނެސްފައިވެ އެވެ. އަދި ބޭރު ފައިސާ ބޭނުންކުރުން ކޮންޓުރޯލުކޮށްފައި އޮތް އޮތުމަށްވެސް ލުއިތަކެއް ދީފައިވެ އެވެ. 

ނަމަވެސް މަރުކަޒީ ބޭންކާއި ޖުމްލަކޮށް ސޫރިޔާއާ ދެކޮޅަށް އެމެރިކާއާއި ހުޅަނގުން އަޅާފައިވާ ގިނަގުނަަ ދަތިކުރުމުގެ ފިޔަވަޅުތައް އަދިވެސް އުވާލާފައިނުވެ އެވެ. 

ބައްޝާރުގެ ވެރިކަން ނިމުމަށްފަހު ކުޑަ ވަގުތުކޮޅަކަަށް ހިނގައިދިޔަ ފޭރުމުގެ ހާދިސާތަކަށްފަހު މަރުކަޒީ ބޭންކުގައި ހުރި އެސެޓުތަކުގެ އަދަދު އެ އިދާރާއިންވަަނީ ބަލާފަ އެވެ. އެ ހާދިސާތަކުގައި ސޫރިޔާ ފައިސާ ގިނަ އަދަދަކަށް ގެންދިޔަ ނަމަަވެސް މައި ތިޖޫރީ ފަޅައިލާފައިނުވެ އެވެ. 

އެ ތިޖޫރީގައި 26 ޓަނުގެ ރަން ހުންނާނެ ކަމަށް އޮފިޝަލުން ވިދާޅުވެ އެވެ. ބޭންކުގެ އޮފިޝަލުން ވިދާޅުވާ ގޮތުގައި ސޫރިޔާގެ އަހުލީ ހަނގުރާމައިގެ ކުރިން 18 ބިލިއަން ޑޮލަރުގެ ރިޒާވްއެއް އެ ގައުމުގައި އޮތް ނަމަވެސް މިހާރު ރިޒާވްގައި ހުރީ 200 މިލިއަނެއްހައި ޑޮލަރެވެ. 

ސަބްރީންއަކީ ސޫރިޔާގައި ވެރިކަންކުރައްވާ އަހްމަދުއް ޝަރުއުގެ އިންތިގާލީ ސަރުކާރުން މަގާމަކަށް އައްޔަންކުރެއްވި ދެވަނަ އަންހެން ބޭފުޅާ އެވެ. އޭނާގެ ކުރިން އަންހެނުންގެ ކަންކަމާ ބެހޭ އިދާރާގެ ވެރިޔަކަށް އައިޝް އައްދިބްސް އައްޔަންކުރައްވާފައިވެ އެވެ.