ސަރުކާރުން ނުފޫޒަށް ޖާގަނުދީ ކޮރަޕްޝަން މައްސަލަތައް ބަލާނެ: ޕީއެންސީ
އެ ޕާޓީން ބުނެފައިވަނީ ސިޔާސީ އެއްވެސް ނުފޫޒަކަށް ބޯނުލަނބައި، އަދި މުއްތަހަމު ނިސްބަތްވާ ޕާޓީއަށްވެސް ނުބަލައި ކޮރަޕްޝަނުގެ ހުރިހާ މައްސަލައެއް ތަހުގީގުކުރާނެކަން ސަރުކާރުން ސާބިތުކޮށްދެމުންދާ ކަމަށެވެ.
ސަރުކާރުން އެއްވެސް ކަހަލަ ސިޔާސީ ނުފޫޒަކަށް ޖާގަނުދީ ކޮރަޕްޝަނުގެ މައްސަލަތައް ތަހުގީގުކޮށް ބަލާނެކަމުގެ ޔަގީންކަން ރައްޔިތުންނަށް ދެމުންދާކަމަށް ސަރުކާރު ހިންގާ ޕީޕަލްސް ނޭޝަނަލް ކޮންގުރެސް ޕާޓީން ބުނެފި އެވެ.
އެ ޕާޓީން ނެރުނު ބަޔާނެއްގައި ބުނެފައިވަނީ ރައީސް ޑރ.މުހައްމަދު މުއިއްޒަށް ރައްޔިތުން ވެރިކަން ދިނީ ކޮރަޕްޝަނާ ދެކޮޅަށް ކުރައްވާ މަސައްކަތް ކާމިޔާބުކުރެއްވުމުގެ ވައުދުފުޅު ފުއްދެވުމަށް ކަމަށެވެ.
އަދި މިހާރު ފުލުހާއި، މަޖިލީހުގެ މާލިއްޔަތު ކޮމިޓީއާއި އޭސީސީ ފަދަަ މުސްތަގިއްލު އިދާރާތަކުން ކުރަމުންދާ ތަހުގީގުތަކަކީ މި ސަރުކާރުގައި ކޮރަޕްޝަނާ ދެކޮޅަށް އަޅަން ފަށާފައިވާ މުހިއްމު ފިޔަވަޅުތަކެއްކަން ފާހަގަކުރަމުން އެ ޕާޓީން ބުނެފައިވަނީ، މި އިދާރާޓަކުން ކުރީ ސަރުކާރުގެ އިސް މަސްއޫލުވެރިން ދައުލަތުގެ ފައިސާއަށް ހިޔާނާތްތެރިވެ ކޮރަޕްޝަނުގެ އަމަަލުތައް ހިންގަވާފައިވާކަމަށް ތުހުމަތުކުރާ ކަމަށެވެ.
އަދި މި އިދާރާތަކަށް ކޮރަޕްޝަނުގެ ތުހުމަތުވާ މީހަކު ނިސްބަތްވާ ޕާޓީއަށް ބެލުމެއް ނެތި ތަހުގީގުކުރުމުގެ މިނިވަންކަން މި ވެރިކަމުގައި އޮންނާނެކަން މިހާރު ކަންކަން ހިނގަމުންދާ ގޮތުން ސާބިތުވެފައިވާކަމަށް ޕީއެންސީން ބުނެ އެވެ.
ބުރަދަންހުރި ހެކީގެ މައްޗަށް ކުރަމުންދާ ތަހުގީގުތައް ހިންގުމަށް ވަގުތު ނެގި ނަމަވެސް އެ ތަހުގީގުތައް އަވަސްކުރުމަށް އިދާރާތަކުން ކުރަމުން އަންނަ މަސައްކަތަށް ތާރީފުކުރުމާއެކު، މި އިދާރާތައް ބާރުވެރިކުރުވައި ކޮރަޕްޝަން އެއްވެސް މިންވަރަަކަށް ތަހައްމަލުނުކުރުމުގެ ސިޔާސަތުގެ ދަށުން، ސަރުކާރުން އަޅަމުންދާ ފިޔަވަޅުތަކަށް އެ ޕާޓީން ހިތްވަރު ދިނެވެ.
އަދި މިފަދަ ކޮރަޕްޝަނުގެ އަމަލުތައް ހިންގާފައިވާ ފަރާތްތައް ޖަވާބުދާރީކުރުވައި އިންސާަފު ގާއިމުކުރެވޭކަން ކަށަވަރުކުރުމަށް ގޮވައިލަމުން އެ ޕާޓީން ފާހަގަކުރީ މިފަދަ އަމަލުތަކަކީ ގައުމުގެ ތަރައްގީއަށް ހީނަރުކަން ލިބޭ، ރައްޔިތުންނަށް ސީދާ ގޮތުން ނޭދެވޭ އަސަރުކުރާ އަމަލުތަކެއް ކަމަށެވެ.
އަދި ފުލުހުން މިހާރު ފަަށާފައިވާ ތަހުގީގުތަކުން ހޯދޭ ކަންކަން ލަސްނުކޮށް ގާނޫނާ އެއްގޮތްވާ ގޮތުގެ މަތިން ރައްޔިތުންނާ ހިއްސާކުރުމަށްވެސް އެ ޕާޓީން އިލްތިމާސްކުރި އެވެ.
ރައީސް މުއިއްޒާ ކޮރަޕްޝަނާ ގުޅުވައިގެން އިދިކޮޅުން ދައްކާ ވާހަކަތަކަކީ އެއްވެސް އަސާސެއް ނެތް ހަގީގަތާ ހިލާފު، ސިޔާސީ މަގުސަދެއްގައި ފަތުރާ ވާހަކަތަކެއްކަމަށް ސިފަކުރުމާއެކު، 2023 ވަނަ އަހަރު ކުރީ ސަރުކާރުގެ ލީޑަރުންނަށް ކުރެވޭ ކޮރަޕްޝަނުގެ ތުހުމަތުތައް ތަހުގީގުކުރަން އެއިރު ވެރިކަަންކުރި އެމްޑީޕީގެ މަޖިލިސް މެންބަރުން ގޮވައިލެއްވުމުންވެސް އެކަން ނުބެލި އޮތުމުން އެ ޕާޓީން ކަންބޮޑުވުން ފާޅުކުރި އެވެ.
ޖަވާބުދާރީވުމާއި ދެފުށް ފެންނަ އުސޫލުން ކަންކުރުން ފަދަ މުހިއްމު ޑިމޮކްރެޓިކް އުސޫލުތައް ނެގެހެއްޓުމަށް ސަރުކާރުން ކުރަމުންދާ މަސައްކަަތްތަކަށް ފުރިހަމަ އެއްބާރުލުން ދޭނެކަަމުގެ ޔަގީންކަން ދެމުން ޕާޓީން ބުނެފައިވަނީ ސިޔާސީ އެއްވެސް ނުފޫޒަކަށް ބޯނުލަނބައި ކޮރަޕްޝަނުގެ ހުރިހާ މައްސަލައެއް ތަހުގީގުކުރާނެކަން ސަރުކާރުން ސާބިތުކޮށްދެމުންދާ ކަމަށެވެ.
ކޮމެންޓް
Republic of Maldives