ޕީއެންސީއަށް އެމްޑީޕީގެ ބޮޑު ތުހުމަތެއް؛ "ފޯޖުކޮށްގެން ޕާޓީއަށް މެންބަރުންދަނީ ވައްދަމުން"

ވެރިކަންކުރާ ޕީއެންސީގެ މެންބަރުން އިތުރުކުރުމަށް ކުރާ މަސައްކަތުގައި އެހެނިހެން ޕާޓީތަކުގެ މެންބަރުންނާއި ޕާޓީތަކަށް ނިސްބަތްނުވާ މީހުންގެ ސޮއި ފޯޖުކޮށް ސައްހަ ނޫން ލިޔެކިޔުން ހުށަހަޅައިގެން އެމީހުންގެ ހުއްދަ ނެތި ޕާޓީއަށް ވައްދަމުންދާކަމަށް އެންމެ ބޮޑު އިދިކޮޅު ޕާޓީ އެމްޑީޕީން ތުހުމަތުކޮށްފި އެވެ. 

އެ ޕާޓީން މިއަދު ނެރުނު ބަޔާނެއްގައި ބުނެފައިވަނީ އެމްޑީޕީގެ ދަފުތަރުގައި ތިބި އެ ޕާޓީގެ މެންބަރުން އެހެން ޕާޓީތަކުގެ ދަފުތަރުގައި، ހާއްސަކޮށް ވެރިކަންކުރާ ޕީއެންސީގެ ދަފުތަރުގައި ހިމަނަމުންދާކަމުގެ ގިނަ ޝަކުވާތަކެއް އެ ޕާޓީއަށް ލިބިފައިވަނީ ކަމަށެވެ. 

އެ ޕާޓީން ބުނީ ޕީއެންސީއަށް ވަނުމަށް ފޯމު ނުފުރަނީސް އެ ޕާޓީގެ ގިނަ އަދަދެއްގެ އާންމު މެންބަރުންނާއި ޕާޓީގެ ގައުމީ މަޖިލީހުގެ ބައެއް މެންބަރުންވެސް ޕީއެންސީއަށް ވައްދައި، އެމްޑީޕީގެ ދަފުތަރުން އުނިކޮށްފައިވާ މައްސަލަ ހަރުކަށި އިބާރާތުން ކުށްވެރިކުރާ ކަމަށެވެ. 

ޕީއެންސީގެ އިތުރުން އެހެން ބައެއް ޕާޓީތަކަށްވެސް އެމްޑީޕީގެ މެންބަރުން ވައްދަމުންދާކަން ފާހަގަކުރެވިފައިވާ ކަމަށް އެ ޕާޓީން ބުނެފައިވެ އެވެ. އަދި އެފަދަ މައްސަލަތައް ބަލައިދިނުމަށް އިލެކްޝަންސް ކޮމިޝަނުގައި ރަސްމީކޮށް އެދޭނެ ކަމުގައިވެސް ބުންޏެވެ. 

އެ ޕާޓީން ބުނި ގޮތުގައި މިގޮތަށް އެމްޑީޕީގެ ދަފުތަރުގައި ހިމެނޭ މެންބަރުންނަށް އެނގުމަކާ ނުލައި، ޕީއެންސީއަށް ވައްދަމުންދަނީ، ރައީސް ޑރ.މުހައްމަދު މުއިއްޒު ވިދާޅުވެފައިވާ ގޮތަށް އެ ޕާޓީއަށް 100،000 މެންބަރުން ހަމަަކުރުމަށް ކުރާ މަސައްކަތުގެ ތެރެއިންނެވެ. އދި އެކަންކުރަނީ ސޮއި ފޯޖުކޮށްގެންކަމަށް ތުހުމަތުކުރުމާއެކު، އެމްޑީޕީން ބުނެފައިވަނީ މިކަން ފޮރުވުމަށް ދައުލަތުގެ ހުރިހާ އިދާރާތަކަކަށް ސަރުކާރުން ނުފޫޒު ފޯރުވަމުންދާ ކަމަށެވެ. 

ވަގު ފޯމު ފުރައިގެން ޕީއެންސީއަށް މެންބަރުން އިތުރުކުރަން ހުރި ދޮރުތައް ބަންދުކުރަން ގޮވައިލުމާއެކު އެމްޑީޕީން އިލެކްޝަންސް ކޮމިޝަނަށް އިލްތިމާސްކޮށްފައިވަނީ މީހުން ޕާޓީތަކުގެ ދަފުތަރުން އުނިކޮށް އިތުރުކުރުމުގައި މިހާރު އަމަލުކުރަމުންދާ އިޖުރާއާތުތައް އިތުރަށް ހަރުދަނާކުރުމަށެވެ. 

އަދި އެމްޑީޕީން ތުހުމަތުކުރި ގޮތުގައި ޕީއެންސީއަށް މެންބަރުން އިތުރުކުރުމަށް ކުރާ މަސައްކަތުގައި ދައުލަތުގެ އިދާރާތަކުގައި ރައްކާކޮށްފައި ހުރި ރައްޔިތުންގެ ޒާތީ މައުލޫމާތު އަންނަނީ ބޭނުންކުރަމުންނެވެ. އަދި އެކަމަކީ ސީރިއަސް މައްސަލައެއްގެ ގޮތުގައި ބަލައި ގާނޫނީ ފިޔަވަޅުއެޅުމަށްވެސް އެ ޕާޓީން ގޮވާލާފައިވެ އެވެ. 

އެއާއެކު ސޮއި ފޯޖުކޮށްގެން މެންބަރުން ޕީއެންސީއަށް އިތުުރުކުރަމުންދާކަމަށް ތުހުމަތުކޮށް އެ ޕާޓީންވަނީ ދައުލަތުގެ މުއައްސަސާތަކުން އެ މައްސަލަތައް ބެލުމަށް ގޮވައިލާފަ އެވެ. 

އެމްޑީޕީން މިފަދަ ބޮޑެތި ތުހުމަތުތަކެއް ޕީއެންސީއަށް އަމާޒުކޮށްފައިވާއިރު އެ ޕާޓީގެ މަނަދޫ ދާއިރާގެ ރައީސް އަދި ކުރީގެ ސްޓޭޓު މިނިސްޓަރު މުހައްމަދު ތާރިގު (މަނަދޫ ތާރިގު)ވަނީ އޭނާއަށް ނޭނގި ސޮއި ފޯޖުކޮށްގެން ޕީއެންސީއަށް ވައްދާފައިވާކަމަށް ވިދާޅުވެ މައްސަލައެއް ފުލުހަށްވެސް ހުށަހަޅުއްވާފަ އެވެ.