އުމްރާއަށް 6373 ދިވެހިން؛ އެންމެންގެ ހާލުވެސް ރަނގަޅު

މި އަހަރުގެ ޑިސެންބަރާ ދިމާކޮށް އެކި ގުރޫޕުތަކުގެ ހަވާލުގައި 6،373 ދިވެހިން އުމްރާގެ އަޅުކަން އަދާކުރުމަށް ސައުދީ އަރަބިއްޔާއަށް ގޮސްފައިވާކަމަށާއި އެންމެންގެ ހާލުވެސް ރަނގަޅުކަމަށް އިސްލާމިކް މިނިސްޓަރު ޑރ.މުހައްމަދު ޝަހީމް އަލީ ސައީދު ވިދާޅުވެއްޖެ އެވެ. 

މިއަދު މީޑިޔާއަށް ފޮނުއްވި މެސެޖެއްގައި ޝަހީމު ވިދާޅުވީ ޑިސެންބަރު މަހު އުމްރާގެ އަޅުކަން އަދާކުރުމަށް ސައުދީއަށް ދަތުރުކޮށްފައި ތިބި ހުރިހާ ދިވެހިންގެ ހާލުވެސް ރަނގަޅު ކަމަަށެވެ. 

އިތުރަށް މިނިސްޓަރު ވިދާޅުވީ މިފަހަރުގެ އުމްރާއަށް އެކި ކުންފުނިތަކުގެ ހަވާލުގައި ޖުމްލަ 6،373 މީހަކު ގޮސްފައިވާ ކަމަށެވެ. މިއީ ރާއްޖޭގެ ތާރީހުގައިވެސް އެއްފަހަރާ އުމްރާގެ އަޅުކަމުގައި ބައިވެރިވުމަށް އެންމެ ގިނަ ބަޔަކު ދަތުރުކުރި ފަހަރަށް ވާނެ އެވެ. 

ފަަހަކަށް އައިސް ދިވެހިން އަދި ހާއްސަކޮށް ޒުވާނުން އުމްރާއަށް ދާ މިންވަރުވަނީ ވަރަށް ބޮޑަށް އިތުރުވެފަ އެވެ. އެންމެ ގިނައިން އުމްރާއަށް މީހުން ގެންދާ ގުރޫޕުތަކުން ބުނާ ގޮތުގައި މި ދުވަސްވަރު ވަރަށް ގިނަ އަދަދަކަށް އާއިލާތައް އުމްރާއަށް ދެ އެވެ. 

ސްކޫލު ބަންދާ ދިމާތީއާއެކު މިދުވަސްވަރު ދަރިންނާއެކު މުޅި އާއިލާ އުމްރާއަށް ދާ މިންވަރު އިތުރުވެފައިވާއިރު، ކުރިއާ ހިލާފަށް ޒުވާނުން އުމްރާއަށް ދާ މިންވަރު އިތުރުވަމުންދާކަން ހުރިހާ ގުރޫޕަކުންވެސް ފާހަގަކުރެ އެވެ.