ގިނަަ އަދަދެއްގެ ސިގަރެޓު ގެއްލުން؛ ދެން ގެތަކުގައި ބޮންޑެޑް ވެއާހައުސް ނުހިންގޭނެ

މާލޭގެ ގެއެއްގައި ހިންގަމުން އައި ބޮންޑެޑް ވެއާހައުސްއަކުން 34،000 އެއްހަައި ކާޓޫނުގެ ސިގިރެޓު ގެއްލުނު މައްސަލައެއް ފެންމަތިވެފައިވަނިކޮށް މީހުން ދިރިއުޅޭ ގޭގޭގައި ބޮންޑެޑް ވެއާހައުސް ހިންގުން ސަރުކާރުން މަނާކޮށްފި އެވެ. 

ބޮންޑެޑް ވެއާހައުސްއަކުން ގިނަ އަދަދެއްގެ ސިގިރެޓު ގެއްލުނު މައްސަލައެއް ފެންމަތިވީ މިއަދު އެ މައްސަލަ އޮންލައިން ނޫސް އަދަދުން ރިޕޯޓުކުރުމުންނެވެ. އެ ނޫހުން ރިޕޯޓުކުރި ގޮތުގައި ގާތްގަނޑަކަށް 575 ކޭސް ނުވަތަަ 34،000 އެއްހައި ކާޓޫނު ސިގިރެޓު ވީނުވީއެއް ނޭނގި މާލޭގައި ހުރި ބޮންޑެޑް ވެއާހައުސްއަކުން ގެއްލިފައިވެ އެވެ. 

މި ހާދިސާއާ ގުޅިގެން އެކްސްގައި ކުރެއްވި ޕޯސްޓެއްގަައި ހޯމްލޭންޑް ސެކިއުރިޓީ މިނިސްޓަރު އަލީ އިހުސާނު ވިދާޅުވީ މިހާތަނަށް މާލޭގެ އެކި ގެތަކާއި އެޕާޓުމެންޓުތަކުގައި ބޮންޑެޑް ވެއާހައުސްތައް ހިންގަމުން އައިސްފައިވާ ކަމަށެވެ. އެތަންތަނުގައި ތަޅު ހަރުކޮށް އެ ތަޅުދަނޑި ކަސްޓަމުގައި އަދި އަނެއް ތަޅުދަނޑި ތަނުގެ ވެރިޔާގެ އަތުގައި ބާއްވާ ކަމަށެވެ. 

އިހުސާން ވިދާޅުވި ގޮތުގައި މިތަނަކީވެސް އެގޮތަށް ހިންގަމުން އައި ތަނެއް ނަމަވެސް އެތަނުގައި ވެއާހައުސް ހިންގި ފަރާތުން އެތަން ދޫކޮށް، އެތަނުގައި އެހެން މަސައްކަތެއް ކުރަމުންދާކަމުގެ މައުލޫމާތު ކަސްޓަމަށް ލިބިގެން ބެލުމަށްފަހު، ވެއާހައުސްގައި ހުރި ކަމަށް ކަސްޓަމުގެ ރެކޯޑުން ފެންނަ ތަކެއްޗަށް ޑިއުޓީ ދައްކަން ތަނުގެ ވެރިފަރާތަށް އަންގާފައިވެ އެވެ. 

އޭގެ އިތުރަށް ސިގިރެޓު ގެއްލުނު މައްސަލާގައި ކަން ހިނގި ގޮތެއް ހޯދުމަށް ކަސްޓަމްސްއާއި ފުލުހުން ގުޅިގެން މިހާރު ތަހުގީގެއް ފަށާފަައިވާކަމަށް މިނިސްޓަރު ވިދާޅުވި އެވެ. 

އިހުސާން ވިދާޅުވީ ގޭގޭގައި ބޮންޑެޑް ވެއާހައުސް ހިންގުމަކީ ސަލާމަތީ ގޮތުންނާއި، އެތަންތަނުގައި ރައްކާކުރާ މުދާ ކޮންޓުރޯލުކުރުމުގެ ގޮތުންވެސް އެންމެ ހަރުދަނާ ގޮތްކަމަށް ނުދެކޭތީ ސަރުކާރުންވަނީ ބޮންޑެޑް ވެއާހައުސް ހިންގޭނީ ކަސްޓަމުގެ ފުރިހަމަ ކޮންޓުރޯލު އޮންނަ ސަރަހައްދުތަކުގައި އެކަނި ކަމށް ކަނޑައަޅައި އެގޮތަށް ސިޔާސަތު ތަންފީޒުކުރަން ފަށާފައި ކަމަށެވެ.