ތަހުގީގަށް އައި އިންޑިއާ ޓީމު ފުރައިގެން ދިޔައީ ހުރިހާ ދިރާސާއެއް ކޮށްފައި

މ. ގްރީން ބިލްޑިންގުގައި ހިނގި އަލިފާނުގެ ހާދިސާއާ ގުޅިގެން ހިންގާ ތަހުގީގުގައި ބައިވެރިވުމަށް އައި އިންޑިއާގެ ތަޖުރިބާކާރުންގެ ހާއްސަ ޓީމު ފުރައިގެން ގޮސްފައި ވަނީ ބޭނުންވާ ހުރިހާ ކަމެއް ދިރާސާކުރުމަށްފަހުގައި ކަމަށް ފުލުހުން ބުނެފި އެވެ.

ނުރައްކާތެރި އަދި ގެއްލުން ބޮޑު އަލިފާނުގެ މި ހާދިސާ ހިނގީ މި މަހުގެ 12 ވަނަ ދުވަހު އެވެ. 

ސަރުކާރުގެ ތިން ވުޒާރާއެއް ހިންގަމުން އައި އިމާރާތެއްގައި އަލިފާން ރޯވެ ހިނގި ހާދިސާގެ ތަހުގީގު ފުލުހުންގެ އިދާރާއިން ފަށާފައިވާ ތަހުގީގަށް އެހީތެރިކަން ފޯރުކޮށްދިނުމަށް އިންޑިއާ ޓީމު ރާއްޖެއައީ މިމަހުގެ 20 ވަނަ ދުވަހު އެވެ. ނަމަވެސް ދެ ދުވަސް ފަހުން 22 ވަނަ ދުވަހު ވަނީ ފުރައިގެން ގޮސްފަ އެވެ.

ފުލުހުން މިއަދު ބުނީ އެމީހުން ފުރައިގެން ގޮސްފައި ވަނީ ހާދިސާ ހިނގި ތަން ބަލައި، ތަހުގީގު ފުރިހަމަ ކުރުމަށް ބޭނުންވާ އެންމެހައި ކަންކަން ދިރާސާ ކުރުމަށްފަހުގައި ކަމަށެވެ. އަދި ހާދިސާއާ ގުޅޭ ފޮޓޯ، ވީޑިއޯ އަދި ސީސީޓީވީ ފުޓޭޖްގެ އިތުރުން ހާދިސާއާ ގުޅުންހުރި މުހިންމު މައުލޫމާތުތައް އެ ޓީމާއި ފުލުހުންގެ ފަރާތުން ހިއްސާކޮށްފައިވާ ކަމަށެވެ.

"ފޯރުކޮށްދެވުނު މައުލޫމާތުތަކާއި ތަކެތި ދިރާސާކުރުމަށްފަހު، އެ ޓީމުގެ ހޯދުންތައް ދިވެހި ފުލުހުންގެ ހިދުމަތާ ހިއްސާކުރުމަށް ވަނީ ހަމަޖެހިފައި،" ފުލުހުން ބުންޏެވެ.

މި އަލިފާނުގެ ހާދިސާގެ ސަބަބުން މުޅި އިމާރާތް ވަނީ ބިމާ ހަމަވެފަ އެވެ. އެތަނުގައި ހިންގަމުން ދިޔައީ ހައުސިން، ކޮންސްޓްރަކްޝަން އަދި އެންވަޔަރަމެންޓް މިނިސްޓްރީ އެވެ. މި ހާދިސާ ހިނގުމާއެކު އެ މިނިސްޓްރީތަކުގެ ހުރިހާ މަސައްކަތެއް ވަގުތީ ގޮތުން ވަނީ ދަރުބާރުގެއަށް ބަދަލުކޮށްފަ އެވެ.

މި ހާދިސާގައި މިނިސްޓްރީތަކުގެ ވަރަށް މުހިންމު ލިޔެކިޔުން ވަނީ ގެއްލިގެން ގޮސްފަ އެވެ.