ބޮކްސާތެރޭ އާއި ދިރުވާލައިގެން ރާއްޖެއަށް ޑްރަގް އެތެރެކުރަން އުޅުނު ބަޔަކު ހައްޔަރު ކޮށްފި

ދިރުވާލައިގެންނާއި ބޮކްސާ ތެރޭގައި ފޮރުވައިގެން ރާއްޖެއަށް މަސްތުވާތަކެތި އެތެރެ ކުރަން އުޅުނު ބަޔަކު އަތުލައިގެންފި އެވެ.

ރާއްޖެއަށް ވައިގެ މަގުން މަސްތުވާތަކެތި އެތެރެކުރަން އުޅެނިކޮށް ހަތަރު މީހުން ވަނީ ހައްޔަރުކޮށްފަ އެވެ. އޭގެ ތެރެއިން ދެ މީހަކު މަސައްކަތް ކޮށްފައި ވަނީ ދިރުވާލައިގެން، ފޮރިން ބޮޑީސްގެ ގޮތުގައި މަސްތުވާތަކެތި އެތެރެ ކުރުމަށެވެ.

މި މައްސަލައިގައި ހައްޔަރު ކޮށްފައިވާ ނ. މަނަދޫ، ޕީކޮކް އިހްސާން އިސްހާގުގެ މައްޗަށް ކްރިމިނަލް ކޯޓުން ނެރެފައިވާ ކޯޓު އަމުރުގައި ބުނެފައި ވަނީ އޭނާ ބޮޑުކަމުދިޔައިރު އަށް ބުލެޓް ފެނިފައިވާ ކަމަށެވެ. އެތަކެތީގެ ބަރުދަނުގައި 124 ގުރާމު ހުއްޓެވެ. އޭނާގެ ކުޑަކަމުދާތަކެތި ވެސް މަސްތުވާއެއްޗިއްސަށް ވަނީ ޕޮޒިޓިވްވެފަ އެވެ.

ދިރުވާލައިގެން މަސްތުވާތަކެތި އެތެރެކުރަން އުޅެނިކޮށް ހައްޔަރު ކުރި އަނެއް މީހަކީ ހ. ޕްރިމްރޯސް، މުހައްމަދު ފާރިޝް ކިޔާ އުމުރުން 40 އަހަރުގެ މީހެކެވެ. އޭނާ ބޮޑުކަމުދިޔައިރު އެއް ބުލެޓް ފެނިފައިވާ ކަމަށް ކޯޓު އަމުރުގައިވެ އެވެ. މީނާވެސް ހައްޔަރުކުރިއިރު ހުރީ މަސްތުވެގެންނެވެ.

މި ދެ މީހުން ވެސް 30 ދުވަހަށް ބަންދުގައި ބަހައްޓަން ކޯޓުން ވަނީ އަމުރުކޮށްފަ އެވެ.

ވައިގެ މަގުން ރާއްޖެ އައިއިރު އަރައިގެން ހުރި އިސްޓާކީނާއި ލައިގެން ހުރި ބޮކްސާ ތެރެއިން މަސްތުވާތަކެތި ފެނެގެން ހައްޔަރު ކޮށްފައި ވަނީ ލ. ގަން، ޗާންދަނީވިލާ މުހައްމަދު ޝަފުރާން އާއި ލ. ކަލައިދޫ، އެވަލާސްޓް، އިބްރާހިމް ފައިސަލެވެ.

މި ދެ މީހުން ލައިގެން ހުރި ބޮކްސާ ތެރެއިން މަސްތުވާ އެއްޗެހި ހުރި ރަބަރު ޕެކެޓު ފެނިފައިވާއިރު، ދެ ފައިގެ އިސްޓާކީނު ތެރެއިން ވެސް ވަނީ ފެނިފަ އެވެ. ދެ މީހުން 15 ދުވަހަށް ބަންދުގައި ބެހެއްޓުމަށް ކޯޓުން ވަނީ އަމުރުކޮށްފަ އެވެ.