އިންޓެލް ރިޕޯޓަށް ބިނާކޮށް ދަންވަރު ފުލުހުން ގޭގެއަށް ވަނުމާމެދު، ތަޖުރިބާގެ އަލީގައި އާޒިމުގެ ކަންބޮޑުވުން

ޕޮލިސް އިންޓެލިޖެންސް ރިޕޯޓެއްގެ މައްޗަށް ބިނާކޮށް ކުރިމިނަލް ކޯޓުން ނެރުނު އަމުރެއްގެ މައްޗަށް ބިނާކޮށް ފުލުހުން ދަންވަަރު ގޭގެއަށް ވަންނާތީ މާލެ ސިޓީގެ މޭޔަރު އާދަމް އާޒިމް ކަންބޮޑުވުން ފާޅުކުރައްވައިފި އެވެ. 

އާޒިމް މިފަދައިން ކަންބޮޑުވުން ފާޅުކުރައްވާފައިވަނީ ރޭ ކުއްލި ގޮތަކަށް ދަންވަރު 2:00 ހާއިރު ފުލުހުން ކޯޓު އަމުރެއްގެ ދަށުން، އާރްޑީސީގެ ކުރީގެ މެނޭޖިން ޑިރެކްޓާ މޫސާ އަލިމަނިކު (މޫކޭ) ދިރިއުޅުއްވާ އެޕާޓުމެންޓަށް ވަނުމާ ގުޅިގެންނެވެ. 

ދަންވަރު ފުލުހުން ހިންގި އޮޕަރޭޝަނުގައި މޫކޭގެ އިތުރަށް އޭނާގެ އަނބިކަނބަލުން ދިރިއުޅުއްވާ އެޕާޓުމެންޓަށާއި، އާރްޑީސީގެ ކުރީގެ ޗީފް ފައިނޭންޝަލް އޮފިސާ ޔާސިރު ހަސަން ދިރިއުޅުއްވާ އެޕާޓުމެންޓަށް ފުލުހުން ވަނެވެ. އަދި މޫކޭއާއި ޔާސިރުގެ ފޯނާއި ސިމް ކާޑާއި، އިތުރު އިލެކްޓްރޯނިކް ސާމާނު ފުލުހުން ގެންދިޔަ އެވެ. 

މިހާރު އާންމުވެފައިވާ ކޯޓު އަމުރު ނެރުމަށް ފުލުހުން އެދުނުއިރު ހުށަހަޅާފައިވާ ހެއްކަކީ ފުލުހުން ތައްޔާރުކޮށްފައިވާ އިންޓެލިޖެންސް ރިޕޯޓެކެވެ. 

މިކަމާ ގުޅިގެން އެކްސްގައި ކުރެއްވި ޕޯސްޓުގައި އާޒިމު ވިދާޅުވީ މައިންނާއި ޅަދަރިން އަރާމުކުރާ ވަގުތު، ފުލުހުން ގޭގެއަށް ވަދެ ނިދި ގެއްލުވައިލާއި ރޭޑުތައް ހިންގުމުން އާއިލާތައް ވައްޓައިލެވެނީ ބިރުވެރިކަމެއްގެ ތެރެއަށް ކަމަށެވެ. އަދި މިހާރު މިފަދަ ކަންކަން ފެނުމަކީ ވަރަށް ބޮޑަށް މާޔޫސްވެވަޑައިގަންނަވާ ކަމެއް ކަމުގައި އާޒިމު ފާހަގަކުރެއްވި އެވެ. 

މައިންނާއި ޅަދަރީން ރޭގަނޑު އަރާމުކުރާ ވަޤުތުގައި ގޭގެއަށް ވަދެ އާއިލާގެ ނިދި ގެއްލުވާލައި ފުލުހުން ރޭޑްތައް ހިންގުމުން، އާއިލާތައް މިވައްޓާލެވެނީ ވަރަށް ބޮޑު ބިރުވެރިކަމެއްގެ ތެރެއަށެވެ. މިއަދު މިފަދަ ކަންކަން ހިނގާތައް، ފެނުމަކީ އަޅުގަނޑަށް ވަރަށް ބޮޑު މާޔޫސް ކަމެއް ލިބޭ…

— Mayor of Male’ City - Adam Azim (@adamazim) December 27, 2024

އާޒިމު އިތުރަށް ފާހަގަކުރެއްވީ އޭނާއަށްވެސް އެފަދަ ކަންކަން ކުރިން ތަޖުރިބާ ކުރެއްވިފައިވާ ކަމެވެ. އެގޮތުން އަމިއްލައަށް އުފަންކުރާ އިންޓެލިޖެންސް ރިޕޯޓާއި، ފުރޭމްކުރުމަށް ހެކި އުފައްދައިގެން ފުލުހުން ހިންގާ ރެއިޑުތަކުން އެތައް އާއިލާއަކަށް އަނިޔާއާއި ބޭއިންސާފާއި ހިތާމަ ކުރިމަތިވެފައިވާކަމަށް އާޒިމު ވިދާޅުވި އެވެ. އަދި އެ ޖަރީމާތައް ހިންގު މީހުން އިންސާފުގެ ކުރިމައްޗަށް ގެނެވިފައި ނެތްކަމުގައި ފާހަގަކުރެއްވި އެވެ. 

އާޒިމް އިޝާރާތްކުރައްވާފައިވަނީ އޭނާގެ ބޭބޭފުޅު މަޖިލީހުގެ މާފަންނު އުތުރު ދާއިރާގެ މެންބަރު ކާނަލް ރިޓަޔާޑް މުހައްމަދު ނާޒިމު ޑިފެންސް މިނިސްޓަރުކަމުގައި ހުންނަވަނިކޮށް ރެއެއްގެ މެންދަމުން އަލިވި ފަހުން އޭނާގެ ގެކޮޅަށް ފުލުހުން ވަދެ ހަތިޔާރު ގެންގުޅުއްވާ ކަމުގެ ތުހުމަތު އަޅުވައި އޭނާގެ ގެއިން ފިސްތޯލެއް ގެންދިޔަ މައްސަލައަށެވެ. އެ މައްސަލާގައި ހިމެނޭ ހެއްކަކީ ރެއިޑުކުރި ފުލުހުން އިންދި ހެކިތަކެއްކަން ފަހުންވަނީ ފަޅާއަރާފަ އެވެ. 

"މިފަދަ ހިތާމަވެރިކަންކަން، އަމިއްލައަށް ތަހައްމަލުކޮށްފައިވާ މީހެއްގެ ހައިސިއްޔަތުން ދަންނަވަންއޮތީ، ޤާނޫނު ތަންފީޒު ކުރައްވާ ފަރާތްތަކުގެ އަމަލުތަކުގައި ޕްރޮފެޝަނަލިޒަމް ދަމަހައްޓަވައި ދެއްވާށޭ. މިއަދު ލިބިފައިވާ ބާރު ބަދަލު ހިފުމުގެ ވަސީލަތެއްގެ ގޮތުގައި ބޭނުންކުރެއްވުމުން، ދުރުހެލިވެތިބުމަށް، އަޅުގަނޑު ފުލުންހުންގެ މުއައްސާސާއަށް ހަނދާންކޮށްދެން،" އާއިލާއިން ތަހައްމަލުކުރި ތަޖުރިބާގެ މައްޗަށް ބިނާކުރައްވައި އާޒިމު ސަލާމަތީ ހިދުމަތްތަކާ މުހާތަބުކުރައްވައި ވިދާޅުވި އެވެ. 

އިތުރަށް އާޒިމު ވިދާޅުވީ މާލެ ސިޓީގެ މޭޔަރުގެ ހައިސިއްޔަތުން މާލޭގެ ރައްޔިތުންނަށް އަމާންކަމާއި ރައްކާތެރިކަން ނެތްކަމުގެ އިހުސާސް އިންތިހާއަށް ކުރެއްވޭ ވާހަކަ ހިތާމައާއެކު ހާމަކުރައްވާ ކަމަށެވެ.