އިސްރާއީލުގެ ގައުމީ ސަލާމަަތާ ބެހޭ ވަޒީރު އަގުސާއަށް ވަނުން ދިވެހި ސަރުކާރުން ކުށްވެރިކޮށްފި
ސަރުކާރުން ސިފަކުރި ގޮތުގައި ބެން ގްވިރް އަގުސާ މިސްކިތަށް ވަނުމަކީ ފަލަސްތީނު ރައްޔިތުންގެ އިތުރަށް ދުނިޔޭގެ ދެ ބިލިއަނަށްވުރެ ގިނަ މުސްލިމުންގެ ހައްގުތަކަށް އަރައިގަތުމުގެ އަމަލެކެވެ.
އިސްރާއީލުގެ ގައުމީ ސަލާމަތާ ބެހޭ ވަޒީރު އިޓަމަރް ބެން ގަވިރް މަސްޖިދުލް އަގުސާއަށް ވަދެވަޑައިގެންނެވުމަކީ އެ މިސްކިތުގެ ހުރުމަތްކެނޑުކަމަށް ބުނެ އޭނާގެ އެ އަމަލު ދިވެހި ސަރުކާރުން ކުށްވެރިކޮށްފި އެވެ.
ހާރިޖީވުޒާރާއިން މިއަދު ބުނެފައިވަނީ ބެން ގްވިރްގެ އަމަލަކީ އިސްލާމީ މުގައްދަސް ބިނާތަކުގެ ހުރުމަތްކަނޑައިލުމަށް ހިންގާފައިވާ އަމަލެއް ކަމަށެވެ. އަދި އެއީ އިސްލާމީ ބިނާތަކުގެ ތާރީހީ ހައިސިއްޔަތު ބަދަލުކުރުމަށް އިސްރާއީލުން ތަކުރާރުކޮށް ކުރަމުން އަންނަ މަސައްކަތްތަކުގެ ތެރެއިން ކަމެއްކަމަށް ސަރުކާރުން ބުނެފަައިވެ އެވެ.
ސަރުކާރުން ބުނީ މިފަދަ އަމަލުތަކަކީ ބައިނަލްއަގުވާމީ ގާނޫނާ ކަނޑައެޅިގެން ހިލާފު އަމަލުތަކެއް ކަމަށެވެ. އަދި މި އަމަލަކީ ފަލަސްތީނު ރައްޔިތުންގެ އިތުރަށް ދުނިޔޭގެ ދެ ބިލިއަނަށްވުރެ ގިނަ މުސްލިމުންގެ ހައްގުތަކަށްވެސް އަރައިގަތުމެއްކަމަށް ސަރުކާރުން ސިފަކުރި އެވެ.
އަދި މިފަދަ އަނިޔާވެރި އަމަލުތައް ހިންގުން ހުއްޓުވއި ބައިނަލްއަގުވާމީ ގާނޫނުތައް ނަގަހައްޓައި އިންސާނީ ހައްގުތަކށް އިހުތިރާމުކުރާކަން ކަށަވަރުކުރުމަށް ހަރުދަނާ ހަލުއި ފިޔަވަޅުތަކެއް އެޅުމަށް ސަރުކާރުން ބައިނަލްއަގުވާމީ މުޖުތަމައަށް ގޮވައިލާފައިވެ އެވެ.
ކުރިއްސުރެ ދިވެހި ސަރުކާރުން ބަޔާންކުރަމުން އަންނަ މައުގިފު ނަގަހައްޓައި މިއަދުގެ ބަޔާނުގައިވެސް ސަރުކާރުން ބުނެފައިވަނީ ފަލަސްތީނު މައްސަލައަށް އޮތް ދާއިމީ ސުލްހަވެރި ހައްލަކީ 1967 ވަނަ އަހރުގެ ކުރިން އޮތް އިންތަކުގެ މަތީގައި، އިރުމަތީ ގުދުސްގައި ވެރިރަށް ގާއިމުވެފައި އޮތް، ސިޔާދަތީ ބާރު ފުރިހަމައަށް ލިބިފައިވާ ފަލަސްތީނުގެ ދައުލަތެއް ގާއިމުކޮށްދިނުން ކަމަށެވެ.
ކޮމެންޓް
Republic of Maldives