ރައީސް ސަރުކާރު ހިންގަވަނީ "އެލް ބޯޑު" ޖައްސަވައިގެން: ދީދީ
މެންބަރު އަހްމަަދު ދީދީ ވިދާޅުވި ގޮތުގައި ކެބިނެޓަށް ރައީސް ކުއްލި ގޮތަކަށް ގެންނެވި ބަދަލުން ރައީސް ސަރުކާރު ހިންގަވަނީ ވަކި މިސްރާބެއް އޮވެގެން ނޫންކަން ސާފުކޮށް އެނގެ އެވެ.
ރައީސުލްޖުމްހޫރިއްޔާ ޑރ.މުހައްމަދު މުއިއްޒު ސަރުކާރު ހިންގަވަނީ "އެލް ބޯޑު" ޖައްސަވައިގެންކަމަށް މަރަދޫ ދާއިރާގެ ރައްޔިތުންގެ މަޖިލީހުގެ މެންބަރު އަހްމަދު ދީދީ ވިދާޅުވެއްޖެ އެވެ.
ރޭ އެމްޑީޕީން ބޭއްވި ހަރުގެ ޖަލްސާގައި ވާހަކަދައްކަވަމުން މެންބަރު ދީދީ ވިދާޅުވީ މި ސަރުކާރަށް އަހަރެއްވީއިރު ވެރިކަން ހިންގަވަމުންދަނީ ވަރަށް ބޮޑު "އެލް ބޯޑެއް" ޖައްސަވައިގެން ކަމަށެވެ. އޭނާ މިފަދައިން ވިދާޅުވީ ހައުސިން މިނިސްޓްރީ އުވައިލައްވައި އެ މިނިސްޓްރީގެ މެންޑޭޓު އެހެނިހެން މިނިސްޓްރީތަކުގެ ދަށަށް ގެންނެވުމަށް ރައީސް ޑރ.މުއިއްޒު ނިންމެވުމާ ގުޅިގެންނެވެ.
އެ ނިންމެވުމަށް ފާޑުވިދާޅުވަމުން ދީދީ ވިދާޅުވީ ރައީސް މުއިއްޒު ވެރިކަމާ ހަވާލުވެވަޑައިގެން ކުރިން އެކީގައި ހިންގި ބައެއް ވުޒާރާތައް ވަކިކުރައްވައި އައު މިނިސްޓްރީތައް އުފެއްދެވި ސަބަބެއްކަމަށް ވިދާޅުވީ ސަރުކާރުގެ ހިންގުން ހަރުދަނާކޮށް ރައްޔިތުންނާ ކައިރިން ހިދުމަތް ދެއްވުން ކަމަށް ކަމުގަ އެވެ.
ނަމަވެސް ސަރުކާރުގެ ވުޒާރާތައް ވަކިކުރައްވައިގެން ފާއިތުވި އަހަރެއްހައި ދުވަހު ސަރުކާރުން ކުރީ ވައްކަންކަމަށް ތުހުމަތުކުރައްވައި ދީދީ ވިދާޅުވީ ސިއްރިއްޔާތުގައި ސަރުކާރުން ހިންގަމުން އައި ކަންކަން ފަޅައިއެރުމުން މިހާރު ރައީސް ޖެއްސެވީ "އުނބަށް" ކަމަށެވެ.
"ވެރިކަމަށް ވަޑައިގަންނަވަމުން ވިދާޅުވީ ތިމަންމަނިކުފާނު މިނިސްޓްރީތައް ވަކިކޮށްލައްވަނީ މިނިސްޓްރީތައް އެފިޝިއެންޓުކޮށް މިތަންތަނުން ދެވޭ ހިދުމަތް ވަރުގަދަކޮށް، ދިވެހި ރައްޔިތުންނާ ގާތުން ވެރިކަންކޮށްދޭށޭ. އެހެންނަމަވެސް އަޅުގަނޑުމެންނަށް ފެނުނީ މިނިސްޓްރީތައް ވަކިކޮށްގެން ވައްކަންކުރާތަން.،" ދީދީ ވިދާޅުވި އެވެ.
"ނަމަވެސް ސިއްރިއްޔާތުގައި ވައްކަންކުރަމުންދަނިކޮށް މިފަޅާއެރީ. އެހައި ހިސާބުން ކުރާނެ ކަމެއް ނޭނގިގެން. ހަދަންވީ ނަހަދަންވީ ކިހިނެއްކަން ނޭނގިގެން އެޖެއްސެވީ އުނބަށް. ވަކިކުރެއްވި ވުޒާރާތައް އެއްކޮށްލައްވައިފި."
ދީދީ ވިދާޅުވީ ސަރުކާރުން ކަންކަން ކުރަމުންދާ ގޮތުން ރައްޔިތުންނަށް ކުރިއަށްދާނެ ގޮތެއް ރައްޔިތުންނަށް ނޭނގޭ ކަމަށެވެ. އެގޮތުން މި މަހުގެ ކުރީ ކޮޅުގައި ކެބިނެޓަށް ބަދަލުތަކެއް ގެންނަވަން ރައީސް ނުވިސްނަވާކަމަށް ސަރުކާރުގެ ތަރުޖަމާނު ވިދާޅުވިތާ މަސްދުވަސް ނުވަނީސް ކެބިނެޓަށް ބަދަލުގެންނަވާފައިވާ ކަމަށާއި، ސަރުކާރުން ހެނދުނު ބުނާ އެއްޗަކާއި ހަވީރު އަމަލުކުރާ ގޮތް ދިމާނުވާ ކަމަށެވެ.
ސަރުކާރުގެ އިގުތިސާދީ ސިޔާސަތަށް ފާޑުވިދާޅުވަމުން ދީދީ ވިދާޅުވީ ދެ މިލިއަން ފަތުރުވެރިން ރާއްޖެ އައިސްގެން އުފާ ފާޅުކުރާއިރު، މީގެ ކުރިން ފަތުރުވެރިކަމުގެ ޕީކް ސީޒަނުގައި ޑޮލަރު ލިބޭ މިންވަރު އިތުރުވެ، ޑޮލަރު ތިޔާގިވި ނަމަވެސް މި އަހަރު ޕީކް ސީޒަނުގައިވެސް ޑޮލަރުގެ އަގު އުޅެނީ ވަރަށް މަތިކޮށް ކަމަށެވެ.
އަދި މި އަހަރުގެ ކުރީ ކޮޅުގައި ޑޮލަރުގެ އަގު ދެން ބޮޑުނުވާނެކަމަށް ރައީސް ވިދާޅުވިކަން ފާހަގަކުރައްވަމުން ދީދީ ވިދާޅުވީ ރައީސް އެހެން ވިދާޅުވިފަހުން އެއިރު ހުރި އަގަށްވުރެ އެތައް ގުނައެއް ޑޮލަރުގެ އަގު އުފުލިފައިވާކަމަށާއި، ކުރިން ޑޮލަރުން ސާވިސް ޗާޖު ލިބުނު ރިސޯޓު މުވައްޒަފުންނަށް މިހާރު އެ ފައިސާކޮޅުވެސް ޑޮލަރުން ނުލިބޭ ކަމަށެވެ.
ކޮމެންޓް
Republic of Maldives