މާޔޫސްވަނީ އަގީދާ ބަލިކަށިވެގެންނެއް ނޫން: ހުތުބާ
ހުތުބާގައި ބުނެފައިވަނީ ކިތައްމެ އަގީދާ ވަރުގަދަ މީހަކުވެސް މާޔޫސްކަމަށް ވެއްޓިދާނެކަމަށާއި، އެކަމުން އަރައިގަތުމަށް އަގީދާ ވަރުގަދަކުރުމަކީ ނަފްސު އިތުރަށް ވަރުގަދަވާނެ ކަމެއް ކަމަށެވެ.
ކިތައްމެ އަގީދާ ވަރުގަދަ މީހަކުވެސް މާޔޫސްކަމުގެ ތެރެއަށް ވެއްޓިދާނެކަމަށާއި، މީހުން މާޔޫސްކަމުގެ ތެރެއަށް ވެއްޓެނީ އަގީދާ ބަލިކަށިވެގެން ނޫންކަމަށް މިއަދުގެ ހުކުރު ހުތުބާގައި ބުނެފި އެވެ.
ހުތުބާގައި ބުނެފައިވަނީ ދިރިއުޅުމަކީ ހިތްދަތި ކަންކަމާއި، ހިތާމަތަކާއި، ދަތި އުނދަގޫތައް އެކުލެވޭ ކަމެއް ކަމަށާއި، ކޮންމެ ދަތި އުނދަގުލަކަށްފަހު ފަސޭހަކަން އަންނާނެ ކަމަށެވެ. ހިތާމައަކަށްފަހު އުފާވެރިކަން އައުމަކީ ހަޔާތުގެ ފިތުރަތު ކަމަށްވެސް ބުނެފައިވެ އެވެ.
މުއުމިނުންނަށް ހަޔާތުގައި ކުރިމަތިވާ ކޮންމެ ކަމެއްގައިވެސް އޮންނަނީ ހެޔޮކަން ކަމުގައި ފާހަގަކޮށް ހުތުބާގައި ބުނެފައިވަނީ ހިތާމަތަކަށް ކެތްތެރިވެ އުފާތަކަށް ޝުކުރުވެރިވުމަކީ މުއުމިނުންގެ ގޮތް ކަމަށެވެ.
ހިތާމަތަކުން އަރައިގަތުމަށް ހިތްވަރާއި އަޒުމާއެކު މަސައްކަތްކުރަންޖެހޭކަމަށާއި، ކިތައްމެ އަގީދާ ވަރުގަދަ މީހަކުވެސް މާޔޫސްކަމުގެ ތެރެއަށް ވެއްޓިދާނެކަން ބަޔާންކޮށްދެމުން ހުތުބާގައި ބުނީ އެފަދައިން މާޔޫސްކަމަށް ވެއްޓެނީ އަގީދާ ބަލިކަށިވެގެން ނޫން ކަމަށެވެ. އަދި އެއީ ނަފްސުގެ ބަލިކަށިކަމުން މެދުވެރިވާކަމެއް ކަމަށާއި، ނަފްސު މާޔޫސްކަމުން ސަލާމަތްކުރުމަށް އަގީދާ ވަރުގަދަކުރުމަކީ މުހިއްމު ކަމެއް ކަމަށްވެސް ހުތުބާގައި ބުނެފައިވެ އެވެ.
އިންސާނީ ހަޔާތުގެ ފިތުރަތަކީ ދަތިތައް ކުރިމަތިވުމަށްފަހު ފިލައިދިއުންކަން ފާހަގަކޮށް ހުތުބާގައި ބުނެފައިވަނީ ބައެއް މީހުން އެފަދަ ހާލަތްތަކުގައި ދަތިކަމުން އަރައިގަތުމަށް ހިތްވަރާއެކު މަސައްކަތްކުރުމުގެ ބަދަލުގައި ނާއުންމީދުގެ ބަސްތައް ބުނަން ފަށާ ކަމަށެވެ.
އެފަދަ ޝުއޫރުތަކާއި ވާހަކަތައް ދެކެވެނީ އުއްމީދު ގެއްލި ދުނިޔެވީ ހަޔާތާމެދު މާޔޫސްވުމުންކަމަށާއި، އެ ހާލަތުގައި ސަބަބުތަކުގައި ހިފައގެން ހާލަތު ބަދަލުކުރުމަށް މަސައްކަތްކުރުމަށް އިންސާނާ ފަހަތަށް ޖެހޭކަމަށް ހުތުބާގައި ބަޔާންކޮށްފައިވެ އެވެ.
ޤަޟާ ޤަދަރަށް އީމާންވުމަކީ އީމާންކަމުގެ ރުކުނެއްގެ ގޮތުގައި މާތްﷲ ކަނޑައެޅުއްވީ އެކަމުގެ ސަބަބުން މާޔޫސްވުމުގެ އެތައް ނުރައްކަލަކުން ސަލާމަތްކޮށްދޭނެ ބާރެއްގެ ގޮތުގައިކަން ބަޔާންކޮށްދީ ހުތުބާގައި ބުނެފައިވަނީ ކަންކަމުގައި މާތްﷲއަށް ވަކީލުކުރުމަކީ އީމާންކަމުގެ ތެރެއިންވާ ކަމެއް ކަމަށެވެ. އަދި ﷲގެ ރަހުމަތާމެދު މާޔޫސްވުމަކީ މަގުފުރެދުމުގެ ސަބަބެއް ކަމަށެވެ.
އިތުރަށް ބުނެފައިވަނީ މުއުމިނުންނަކީ އެމީހުންނަށް ކުރިމަތިވާ އެންމެ ބޮޑެތި މުސީބާތުގެ ވަގުތުގައިވެސް ﷲގެ ރަހުމަތްފުޅާއި ލުޔަށް އުންމީދުކުރާ އެކަމުގެ ޔަގީންކަން ހިތްތަކުގައި ބާއްވާ ބައެއް ކަމަށެވެ. ﷲގެ މަގުގައި ސާބިތުވާ މީހާ މާޔޫސްވެގެން ނުދާނެ ކަމަށްވެސް ހުތުބާގައި ބަޔާންކުރި އެވެ.
ކޮމެންޓް
Republic of Maldives