ހިސާބުތަކުން ބުނާ ވާހަކަ | ނޮވެމްބަރު ރިސޯޓް އޮކިއުޕެންސީ މިދިޔަ އަހަރަށްވުރެ މަތި

ޖުމްލަ ބެޑްނައިޓްސް 3.1 ޕަސެންޓް މަތި، ލަފާކުރެވޭ އާމްދަނީ ތިން ބިލިއަން ޑޮލަރު

ޓޫރިޒަމް ސިނާއަތުގެ ބައެއް ފަރާތްތަކުން ބުނަނީ މިދިޔަ ނޮވެމްބަރު މަހަކީ މި ފަހުގެ ތާރީހުގައި ޓޫރިޒަމް އެންމެ ދަށް އެއް މަހަށްވާނެ އެވެ. ހާއްސަކޮށް ރިސޯޓްތަކުގެ އެނދުގެ ބޮޑުބައި މިދިޔަ މަހު އޮތީ ނުފުރި ހުހަށެވެ. އެކަމަކު ތަފާސް ހިސާބު ތަކުން ފެންނަނީ މުޅިން އެހެން މަންޒަރެކެވެ. ޓޫރިޒަމް ސިނާއަތުން ފޯރުކޮށްދޭ މައުލޫމާތުގެ މައްޗަށް ބަލައި ޓޫރިޒަމް މިނިސްޓްރީން އާއްމުކުރި މިދިޔަ މަހުގެ ތަފާސް ހިސާބު ކަރުދާސް ތަކުން ފެންނަ ގޮތުގައި މިދިޔަ މަހު ރާއްޖޭގެ ޓޫރިޒަމް ސިނާއަތަށް އެންމެ ބޮޑު އާމްދަނީއެއް ވައްދާ ރިސޯޓްތަކުގެ އޮކިއުޕެންސީ ހުރީ 70.4 ޕަސެންޓުގަ އެވެ. 

ޓޫރިޒަމް މިނިސްޓްރީގެ މައުލޫމާތު ތަކަށް ބަލާއިރު މި އަހަރުގެ ނޮވެމްބަރު މަހުގެ ރިސޯޓް އޮކިއުޕެންސީ 70.4 ޕަސެންޓުގަ ހުރިއިރު މިދިޔަ އަހަރުގެ ނޮވެމްބަރު މަހު ހުރީ 66.6 ޕަސެންޓުގަ އެވެ. އަދި މިދިޔަ ނޮވެމްބަރު މަހު ރިސޯޓްތަކަށް އައި ޓޫރިސްޓުންގެ ބެޑްނައިޓްސް ނުވަތަ އެވްރެޖުކޮށް ތިބި ރޭގެ ޖުމްލަ އަދަދު ހުރީ 9,941,183 ގަ އެވެ. ނަމަވެސް މިދިޔަ އަހަރު ރިސޯޓްތަކުގައި ޓޫރިސްޓުން މަޑުކުރި ރޭގެ އަދަދު ހުރިކަމަށް ދައްކަނީ 9,268,424 ގަ އެވެ. 

ހިސާބުތަކުން ދައްކާ ގޮތުގައި ނޮވެމްބަރު މަހު ރިސޯޓްތަކުގެ އޮކިއުޕެންސީ މަތިވިނަމަވެސް ގެސްޓްހައުސްތަކުގެ އޮކިއުޕެންސީ ވަނީ ދަށްވެފަ އެވެ. މިދިޔަ މަހު ގެސްޓްހައުސްތަކުގެ ޖުމްލަ އޮކިއުޕެންސީ ހުރީ 36.1 ޕަސެންޓުގަ އެވެ. ނަމަވެސް މިދިޔަ އަހަރުގެ ނޮވެމްބަރު މަހު އޮކިއުޕެންސީ ރޭޓް 41.4 ޕަސެންޓުގައި ހުރިކަމަށް ދައްކަ އެވެ. 

ގެސްޓްހައުސް ތަކަށް އައި ޓޫރިސްޓުންގެ ބެޑްނައިސްޓް ނުވަތަ ޖުމްލަ ރޭގެ އަދަދު ހުރީ 1,753,895 ގަ އެވެ. ނަމަވެސް މިދިޔަ އަހަރު މި އަދަދު 2,049,233 ހުރިކަމަށް ދައްކަ އެވެ. ހިސާބުތަކުން ފެންނަ ގޮތުގައި ރިސޯޓްތަކާއި ގެސްޓްހައުސްތަކުގެ ބެޑްނައިޓްސް ވެސް ދަށެވެ. 

މުޅި ރާއްޖެ އަށް ބަލާއިރު މި އަހަރުގެ ނޮވެމްބަރު މަހުގެ ނިޔަލަށް މުޅި ރާއްޖޭގެ ޓޫރިޒަމް ޖުމްލަ އޮކިއުޕެންސީ ނުވަތަ އެނދުތައް ފުރުނު ނިސްބަތް މިދިޔަ އަހަރު ނޮވެމްބަރު މަހަށްވުރެ އިތުރު ކަމަށް ދައްކަ އެވެ. މި އަހަރުގެ ޖުމްލަ އޮކިއުޕެންސީ 58.9 ޕަސެންޓުގަ ހުރިއިރު މިދިޔަ އަހަރު ރާއްޖޭގެ އޮކިއުޕެންސީ ހުރީ 57.2 ޕަސެންޓެވެ. އެހެންވެ މިއީ 1.7 ޕަސެންޓުގެ އިތުރުވުމެކެވެ. 

ހިސާބުތަކުން ދައްކާ ގޮތުން މިދިޔަ ނޮވެމްބަރު މަހުގެ ނިޔަލަށް ރާއްޖޭގައި ޓޫރިސްޓުން ހޭދަހުރި ބެޑްނައިޓްސް ހުރީ 12,133,725 ގަ އެވެ. ނަމަވެސް މިދިޔަ އަހަރުގެ ނޮވެމްބަރު މަހުގެ ނިޔަލަށް ބެޑްނައިޓްސް ހުރިކަމަށް ދައްކަނީ 11,764,637 ގަ އެވެ. މިއީ 3.1 ޕަސެންޓުގެ ބެޑްނައިޓްސް އިތުރުވުމެކެވެ. އެހެންވެ މި އަހަރުގެ މިހާތަނަށް ތިން ބިލިއަން ޑޮލަރުގެ އާމްދަނީއެއް ޓޫރިޒަމަށް ލިބިފައިވާނެ ކަަމަށް ބެލެވެ އެވެ. މުޅި އަހަރު ޓޫރިޒަމް ބެޑްނައިޓްސް އިތުރުވިކަމަށް ދެއްކިނަމަވެސް ނޮވެމްބަރު މަސް ވަކިން ބަލާނަމަ ބެޑްނައިޓްސް ދަށް ކަމަށް ދަށްކަ އެވެ. މިދިޔަ އަހަރު ޓޫރިޒަމް ބެޑްނައިޓްސް 1,152,375 ގައި ހުރިނަމަވެސް މި އަހަރު ވަނީ 1,028,459 ދަށްވެފަ އެވެ. މިއީ 10 ޕަސެންޓުގެ ދަށްވުމެކެވެ. ނޮވެމްބަރު މަހާ ހަމައަށް ބަލާއިރު އެވްރެޖު ސްޓޭ ނުވަތަ ޓޫރިސްޓުން މަޑުކުރި މުއްދަތު ވަނީ ކުޑަކޮށް އިތުރުވެފަ އެވެ. މިދިޔަ އަހަރުގެ އެވްރެޖު ސްޓޭ 7.6 ޕަސެންޓުގަ ހުރިއިރު މި އަހަރު ހުރީ 7.7 ޕަސެންޓުގަ އެވެ. 

މި އަހަރު ޓޫރިޒަމް ޓާގެޓެއްގެ ގޮތުގައި ސަރުކާރުން އަންދާޒާ ކުރީ ދެ މިލިއަން ޓޫރިސްޓުން ގެނައުމެވެ. މި ޓާގެޓް އަހަރު ނިމުމުގެ ކުރިން އިއްޔެ ވަނީ ހާސިލްވެފަ އެވެ. ޓޫރިޒަމް މިނިސްޓްރީން ބުނެފައިވަނީ އަންނަ އަހަރުގެ އެރައިވަލްސް 15 ޕަސެންޓް ނުވަތަ 2.3 މިލިއަން ހަމަ ކުރުމަކީ ލަނޑުދަނޑިއެކެވެ.