އަލީ ހަމީދުގެ ކުންފުންޏަށް 44 މިލިއަން ދިން މައްސަލައިގެ ތަހުގީގު އަވަސްކުރަން ޕީޖީ އަންގަވައިފި

ރައްޔިތުންގެ މަޖިލީހުގެ އިސްދޫ ދާއިރާގެ ކުރީގެ މެންބަރު އަލީ ހަމީދުގެ ނޯތު ކޯސްޓް ކޮންސްޓްރަކްޝަނަށް ނިމިދިޔަ އެމްޑީޕީ ސަރުކާރުން 44 މިލިއަން ރުފިޔާގެ އެޑްވާންސެއް ދިނުމަށްފަހު, އެއްވެސް މަސައްކަތެއް ނުކުރި މައްސަލައިގެ ތަހުގީގު އަވަސް ކުރުމަށް ޕްރޮސެކިއުޓަރު ޖެނެރަލް އައްބާސް ޝަރީފް މިއަދު އަންގަވައިފި އެެވެ. 

ޕީޖީ އޮފީހުން މިއަދު ބުނީ އަލީ ހަމީދުގެ މަސްލަހަތު އޮންނަ ކުންފުންޏެއް ކަމަށްވާ ނޯތު ކޯސްޓް ކޮންސްޓްރަކްޝަން ޕްރައިވެޓްލިމިޓެޑަށް ހަވާލުކޮށްފައިވާ ޕްރޮޖެކްޓަކާ ގުޅިގެން، 2023 ވަނަ އަހަރު 44 މިލިއަން ރުފިޔާ ދޫކޮށްފައިވާ ކަމަށް ތުހުމަތު ކުރެވޭ މައްސަލަ ރައްޔިތުންގެ މަޖިލީހުގެ މާލިއްޔަތު ކޮމިޓީއިން ބެލުމަށް ފަހު ފުލުހުންގެ ސަމާލު ކަމަށް ގެނެސްފައިވާ ކަމަށެވެ.

މި މައްސަލަ އަކީ ދިވެހި ދައުލަތާއި ރައްޔިތުންގެ އާންމު މަސްލަހަތު މަތީ ދަރަޖައަކަށް އޮތް ހައްސާސް މައްސަލަ އެއް ކަމަށް އެ އޮފީހަށް ފެންނާތީ، މި މައްސަލައަށް އިތުރު ސަމާލުކަމެއް ދީ މައްސަލައަށް ހާއްސަ ތަހުގީގު ޓީމެއް އެކުލަވާލާ އަވަސް މައްސަލައެއްގެ ގޮތުގައި ކުރިއަށް ގެންދިއުމަށް ފުލުހުންގެ ހިދުމަތަށް އަންގާފައިވާ ކަމަށް ޕީޖީ އޮފީހުން ބުންޏެވެ.

އަދި މި މައްސަލައިގައި ހިމެނޭ ފަރާތްތަކާ ގުޅޭ މި ބާވަތުގެ އިތުރު ޕްރޮޖެކްޓެއްވާނަމަ އެކަންކަން ވެސް މި މައްސަލައިގެ ތެރެއިން ތަހުގީގު ކުރުމަށް ވަނީ އަންގާފަ އެވެ.

މިއީ އާސަންދައިން ހޮސްޕިޓަލެއް އެޅުމަށް އެކުންފުންޏާއެކު ހެދި އެއްބަސްވުމެކެވެ. ނަމަވެސް އޭރު އާސަންދައިގެ މާލީ ހާލަތު ހުރި ގޮތުން މަޝްރޫއު މަޑުޖައްސައިލީ އެވެ.

އާސަންދައިގެ ހޮސްޕިޓަލެއް އެޅުމަށް ފުރަތަމަ އަލީ ހަމީދުގެ ނޯތު ކޯސްޓް ކޮންސްޓްރަކްޝަނާއެކު އާސައިންދައިން އެއްބަސްވުން ހެދީ 2016 ވަނަ އަހަރު އެވެ. ހަ ބުރީގެ އެ ހޮސްޕިޓަލު އެޅުމަށް ދެ ކުންފުނީގެ މެދުގައި އެއްބަސްވީ 61 މިލިއަން ރުފިޔާ އަށެވެ. ނަމަވެސް އޭގެ އަނެއް އަހަރު މަޝްރޫއު މަޑުޖައްސައިލީ އެވެ.

ފަހުން އެމްޑީޕީ ސަރުކާރުގައި ނޯތު ކޯސްޓުގެ ފަރާތުން ސެޓްލްމެންޓް ކޮމެޓީއަށް ބަދަލު ހޯދަން އެދުމުން، ރައީސް އޮފީހުން ވަނީ އަލުން އެ ކުންފުންޏާ އެ މަސައްކަތް ހަވާލުކޮށްފަ އެވެ. ދެވަނަ ފަހަރު އެ މަސައްކަތް ހަވާލުކުރީ 147 މިލިއަން ރުފިޔާ އަށެވެ. އެ މަޝްރޫއުގެ އެޑްވާންސް ޕޭމެންޓުގެ ގޮތުގައި 2023 ވަނަ އަހަރު އާސަންދައިން ވަނީ ދެ ފަހަރެއްގެ މަތިން 44 މިލިއަން ރުފިޔާ އެ ކުންފުންޏަށް ދީފަ އެވެ.

މަޖިލީހުގެ މާލިއްޔަތު ކޮމެޓީން ވަނީ އެ މަޝްރޫއުގެ ތަފްސީލު ހޯދަން އާސަންދައިގައި އެދިފަ އެވެ. އާސަންދައިން ކޮމެޓީއަށް ފޮނުވި ސިޓީގައި ބުނެފައި ވަނީ، މަޝްރޫއުގެ މަސައްކަތް މަޑުޖެހިފައި އޮންނާތީ ނޯތު ކޯސްޓާއެކު އެތައް ފަހަރެއްގެ މަތިން ބައްދަލުކޮށް މަޝްވަރާކޮށްފައިވާ ކަމަށާއި ނަމަވެސް، މަސައްކަތް ކުރިއަށް ނުދާ ކަމަށެވެ.

އަލީ ހަމީދު މަޖިލީހަށް އިންތިހާބުވީ ގާސިމް އިބްރާހިމްގެ ޖުމްހޫރީ ޕާޓީންނެވެ. ނަމަވެސް އޭރު ސަރުކާރު ހިންގާ އެމްޑީޕީއަށް ބަދަލުވީ އެވެ. ފަހުން ކޮންގްރެސް ޕާޓީގެ ވެރިކަން ފެށުމުން އެ ޕާޓީއަށް ވަނީ ސޮއިކޮށްފަ އެވެ.