އެ މައްސަލާގައި ސައީދުގެ އިތުރަށް ފެނަކައިގެ ޕްރޮކިއުމެންޓުގެ ކުރީގެ ވެރިޔާ މަރްޔަމް ދީނާ ސާލިހުގެ މައްޗަށްވެސް ދައުވާކޮށްފައިވެ އެވެ. އެ ދެ ބޭފުޅުންގެ މައްޗަށްވެސް އުފުލާފައިވަނީ އެއް ދައުވާއެކެވެ.
ފެނަކަ ކޯޕަރޭޝަނުގެ ކުރީގެ މެނޭޖިން ޑިރެކްޓާ އަހްމަދު ސައީދު މުހައްމަދުގެ މައްޗަށް ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށުގެ ދައުވާ އުފުލައިފި އެވެ.
ޕްރޮސެކިއުޓާ ޖެނެރަލްގެ އޮފީހުން މިއަދު ބުނެފައިވަނީ ސައީދުގެ މައްޗަށް ދައުވާކުރީ ބްލޭޒަން އިންކް ކިޔާ ކުންފުންޏަކާއެކު ފެނަކައިން ހެދި އެއްބަސްވުމެއްގެ މައްސަލައިގަ އެވެ.
އެ މައްސަލައާ ގުޅޭ ގޮތުން ޕީޖީ އޮފީހުން ހާމަކުރި ގޮތުގައި، އެ ކުންފުންޏާ ހަވާލުކުރި މަސައްކަތް އެކީ ނުނިންމަނީސް، އަދި މަސައްކަތް ފުރިހަމަކުރިކަން ކަށަވަރުނުކޮށް، އެ މަސައްކަތަށް ދޭންޖެހޭ ފައިސާ ފެނަކައިން ބްލޭޒަން އިންކަށް ދޫކޮށްފައިވާ ކަމަށެވެ.
މިގޮތަށް ފައިސާ ދޫކުރުމުގެ ސަބަބުން ފެނަކައަށް 848,000ރ (އަށް ލައްކަ ސާޅީސް އަށް ހާސް ރުފިޔާ)ގެ ގެއްލުމެއް ލިބިފައިވާކަމަށްވެސް އެ އޮފީހުން ބުންޏެވެ.
އެގޮތަށް މަސައްކަތް ނުނިމެނީސް ފައިސާ ދޫކުރުމަކީ އެ ކުންފުންޏަށް ނާޖާއިޒު މަންފާ ހޯދައިދިނުމަށް ހިންގާފައިވާ އަމަލަކަށްވާތީ އެ މައްސަލާގައި ދައުވާކުރީ މި މަހުގެ 26 ވަނަ ދުވަހުކަމަށް ޕީޖީ އޮފީހުން ބުނެފައިވެ އެވެ.
އެ މައްސަލާގައި ސައީދުގެ އިތުރަށް ފެނަކައިގެ ޕްރޮކިއުމެންޓުގެ ކުރީގެ ވެރިޔާ މަރްޔަމް ދީނާ ސާލިހުގެ މައްޗަށްވެސް ދައުވާކޮށްފައިވެ އެވެ. އެ ދެ ބޭފުޅުންގެ މައްޗަށްވެސް އުފުލާފައިވަނީ އެއް ދައުވާއެކެވެ.
މި ދައުވާތައް ސާބިތުވެއްޖެނަމަ އަސާސީ އަދަބުގެ ގޮތުގައި އެއް އަހަރާއި ހަތް މަހާއި ހަ ދުވަހުގެ ޖަލު ހުކުމެއް އަންނާނެ އެވެ.
އެންޓި ކޮރަޕްޝަން ކޮމިޝަނުން އަންނަނީ ސައީދަށް ތުހުމަތުވާ ކޮރަޕްޝަނުގެ ގިނަ މައްސަލަތަކެއް ބަލަމުންނެވެ. އެއިން ބައެއް މައްސަލަތަކުގައި ދައުވާކުރަން ޕީޖީ އޮފީހަށް ފޮނުވާފައިވާކަން އެ ކޮމިޝަނުން މީގެ ކުރިން ހާމަކޮށްފައިވެ އެވެ.