މާލޭގެ ދެ ސަރަހައްދަކުން 25 ބިދޭސީން ނަގައިފި

މާލޭގައި ބިދޭސީން ކޮންޓްރޯލް ނަގާފައިވާ ދެ ސަރަހައްދެއްގައި ރެއިޑު އޮޕަރޭޝަނެއް ހިންގައި، ގަވާއިދާ ހިލާފަށް އުޅޭ 25 ބިދޭސީން މޯލްޑިވްސް އިމިގްރޭޝަންގެ ބެލުމުގެ ދަށަށް ގެނެސްފި އެވެ.

އިމިގްރޭޝަނުން ވަނީ ފާއިތުވި ދެ ދުވަހު މާލޭގެ ލޯކަލް މާރުކޭޓު ސަރަހައްދާއި ހީނާމާގެ ޕާކިން ސަރަހައްދަށް ހާއްސަކޮށް ރެއިޑު އޮޕަރޭޝަނެއް ހިންގާފަ އެވެ. މި އޮޕަރޭޝަނުގައި އިމިގްރޭޝަންގެ ކޮންޓްރޯލާ ޖެނެރަލް މުހައްމަދު ޝަމްއާން ވަހީދު ވެސް ބައިވެރިވެވަޑައިގެންނެވި އެވެ.

އޮޕަރޭޝަނާ ގުޅޭ ގޮތުން ޝަމްއާން ވިދާޅުވީ "އިމިގްރޭޝަން ވޮޗް" އަށް ހާއްސަކޮށް ލޯކަލް މާރުކޭޓާ ގުޅޭ ގިނަ ޝަކުވާތަކެއް ލިބެމުންދާ ކަމަށެވެ. އެގޮތުން ރަށްރަށުން ގެންނަ ތަކެތި ގަތުމަށްފަހު އެތަކެތި ވިއްކައި، ލޯކަލް މާރުކޭޓުގެ ވިޔަފާރީގެ ކޮންޓްރޯލް ބިދޭސީން އަތުލާފައިވާ ކަމުގެ ޝަކުވާތައް ލިބެމުންދާ ކަމަށެވެ.

އިމިގްރޭޝަނުން ބުނެފައި ވަނީ މި އޮޕަރޭޝަނުގައި 137 ބިދޭސީން ބަލައި ފާސްކޮށް، ގަވާއިދާ ހިލާފު 25 ބިދޭސީއަކު ބެލުމުގެ ދަށަށް ގެނެސްފައިވާ ކަމަށެވެ. 

އިމިގްރޭޝަނުން އާންމުކޮށްފައިވާ ވީޑިއޯގައި، އޮފިސަރުން ފެނުމާއެކު ބައެއް ބިދޭސީން ފިލަން ދުވާ މަންޒަރު ފެނެ އެވެ. ނަމަވެސް އިމިގްރޭޝަން އޮފިސަރުން ވަނީ ބިދޭސީން ފަހާ ދުވެ، އަތުލައިގެންފަ އެވެ.