"ދިވެހިން ހިތްތަކުގައި އަބަދުވެސް އެއްބައިވަންތަކަމުގެ ވިންދު ޖަހާ"

ސުނާމީ ކާރިސާގެ ސަބަބުން ލިބުނު ގެއްލުމުގައި ދިވެހިން ދެއްކި އެއްބައިވަންތަ ކަމަކީ ނަމޫނާއެއް ކަމަށާއި، އަބަދުވެސް ދިވެހިންގެ ހިތްތަކުގައި އެއްބައިވަންތަ ކަމުގެ ވިންދު ޖަހަމުންދާ ކަމަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.

މީގެ 20 އަހަރު ކުރިން، ޑިސެމްބަރު 26، 2004 ރާއްޖެއަށް ކުރިމަތިވި ސުނާމީ ކާރިސާއާ ގުޅިގެން ފާހަގަކުރާ އެއްބައިވަންތަ ކަމުގެ ދުވަހުގެ ތަހުނިޔާ އަބްދުއްރަހީމް މިއަދު ވަނީ ފޮނުއްވާފަ އެވެ.

އެ މެސެޖުގައި ވިދާޅުވެފައި ވަނީ މީގެ 20 އަހަރު ކުރިން ދިވެހިންނާއި ކުރިމަތިވި ނުރައްކާތެރި ސުނާމީގެ ހާލަތުގައި، ކުއްލިއަކަށް ދިރިއުޅުންގެއްލި، ގެދޮރުގެއްލި ހާލުގައި ޖެހުނު ފަރާތްތަކަށް އެހީތެރިވުމަށް ދިވެހީން ދެއްކި ހިތްވަރާއި އެދެއްކެވި އެއްބައިވަންތަ ކަމުގެ ނަމޫނާއަކީ މިގައުމު ދެމިއޮތްހާ ދުވަހަކު ފަނޑުވެގެންދާނެ ކަމެއް ނޫން ކަމަށެވެ.

އަދި އެފަދަ އެއްބައިވަންތަކަން އަބަދުވެސް ދިވެހީންގެ ހިތްތަކުގައި ވިންދުޖަހަމުންދާނެ ކަމަށެވެ.

"އެ ނުރައްކާތެރި ކާރިސާގައި ދުނިޔެދޫކުރި އެންމެހާ އަހުންނާއި އުހުތުނަށް ސުވަރުގޭގެ ދާއިމީ ނިއުމަތް މިންވަރު ކުރައްވާށި. ދިވެހީންނަކީ އަބަދުވެސް އެކުވެރި، އެއްބައެއްވަންތަ، އެއްދީނެއްގައި ތިބި، ފަސްނުޖެހި ގައުމާއިގެން ކުރިއަށް ދިއުމުގެ އަޒުމުގައި ތިބޭ ބައެއްކަމުގައި ލައްވާށި. އާމީން!" އަބްދުއްރަހީމްގެ މެސެޖުގައިވެ އެވެ.

އޭނާ ވަނީ ރައީސް ޑރ. މުހައްމަދު މުއިއްޒުގެ ދެކަނބަލުންނަށާއި ރައްޔިތުންގެ މަޖިލީހުގެ މެންބަރުންނަށާއި ރާއްޖޭގެ ހުރިހާ ރައްޔިތުންނަށް ދުވަހުގެ ތަހުނިޔާ ފޮނުއްވާފަ އެވެ.