ރާއްޖެއަށް ޑްރަގް އެތެރެކުރި އިންޑިއާ ބަޔަކު ހައްޔަރު ކޮށްފި

ރާއްޖެއަށް މަސްތުވާތަކެތި އެތެރެކުރި އިންޑިއާ ދެ މީހުން ހައްޔަރު ކޮށްފި އެވެ.

މި މައްސަލައިގައި ހައްޔަރު ކޮށްފައި ވަނީ މަސްތުވާތަކެތި ރާއްޖެއަށް ގެނައި މީހާއާއި މަސްތުވާތަކެއްޗާއި ރާއްޖޭން ހަވާލުވި މީހާ އެވެ. ދެ މީހުންނަކީ ވެސް އިންޑިއާ ދެމީހުންނެވެ.

މަސްތުވާތަކެތި ރާއްޖެ އެތެރެކޮށްފައި ވަނީ އުމުރުން 31 އަހަރުގެ އެމްޑީ ތަމަންނާ ކިޔާ ފިރިހެކެވެ. ކަސްޓަމްސް އިން ބަލައިފާސްކުރިއިރު އޭނާ ގެނައި ލަގެޖުން މަސްތުވާތަކެތި ފެނިފައިވެ އެވެ. އެތަކެއްޗަކީ މީހަކު ހަވާލުކުރި ތަކެތި ކަމަށް އޭނާ ވަނީ ބަންދު މަޖިލީހުގައި ކްރިމިނަލް ކޯޓުގައި ބުނެފަ އެވެ.

މި މައްސަލައިގައި ފުލުހުން ހިންގި ކޮންޓްރޯލް ޑެލިވަރީ އޮޕަރޭޝަނުގެ ތެރެއިން އެތަކެއްޗާ ހަވާލުވެފައި ވަނީ އުމުރުން 30 އަހަރުގެ ސައްޑާމް ހުސައިން ކިޔާ ފިރިހެނެކެވެ.

އޭނާގެ މައްޗަށް ނެރެފައިވާ ކޯޓު އަމުރުގައިވާ ގޮތުން، މަސްތުވާތަކެއްޗަކީ މީނާ ބޭނުންކުރަން ގެނައި ތަކެތި ކަމަށް ސީންގައި ބުނެފައިވާ ކަމަށް ފުލުހުންނާ ހަވާލާދީ ބަޔާންކޮށްފައިވެ އެވެ.

އެމީހުން ރާއްޖެ ގެނައީ ކިހާ އަދަދެއްގެ މަސްތުވާތަކެތިކަން ކޯޓު އަމުރުތަކުގައި ބަޔާންކޮށްފައެއް ނުވެ އެވެ. މި މައްސަލައިގައި ދެމީހުން ވެސް 30 ދުވަހަށް ބަންދުގައި ބޭތިއްބުމަށް ވަނީ އަމުރުކޮށްފަ އެވެ.