ތުރުކީގައި ހަތިޔާރު ކާރުހާނާއެއް ގޮވި ހާދިސާއާ ގުޅިގެން ރައީސް ތައުޒިޔާ ވިދާޅުވެއްޖެ

ތުރުކީގެ އުތުރު-ހުޅަނގުގައި ހުންނަ ހަތިޔާރު ކާރުޚާނާއެއްގައި އެއްޗެއް ގޮވައިގެން ހިނގި ހާދިސާއާ ގުޅިގެން އެ ގައުމުގެ ރައީސް ރަޖަބް ތައްޔިބު އުރުދުޣާނަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ތައުޒިޔާ ވިދާޅުވެއްޖެ އެވެ. 

ބަލިކެސިރް ޝަހަރުގައި ހުންނަ ކާރުހާނާގައި އެއްޗެއް ގޮވައިގެން ހިނގި ހާދިސާގއި މުޅި ކާރުހާނާގައި ރޯވިއިރު 12 މީހަކު މަރުވި އެވެ. އަދި ހަތަރު މީހަކަށް އެ ހާދިސާގައި އެކިވަރުގެ ގެއްލުން ލިބިފައިވާއިރު، މިއީ ބަޔަކު ގަސްތުގައި ހިންގި ކަމެއް ނޫންކަމަށް އެ ގައުމުގެ ސަރުކާރުން ބުނެފައިވެ އެވެ. 

މި ހާދިސާއާ ގުޅިގެން ރައީސް މުއިއްޒު އުރުދުޣާނަށް ފޮނުއްވި ތައުޒިޔާގެ މެސެޖުގައި މި ހާދިސާގެ ހަބަރު އަޑުއެއްސެވީ ފުން ހިތާމައާއެކުކަން ފާހަގަކުރައްވަމުން އެ ހާދިސާގައި މަރުވި މީހުންގެ އާއިލާތަކާއި ގާތްތިމާގެ މީހުންނަށާއި، ތުރުކީގެ ރައްޔިތުންނާއި އެ ގައުމުގެ ސަރުކާރަށް ތައުޒިޔާ ރައްދު ކުރެއްވި އެވެ. 

އޭގެ އިތުރަށް މި ހާދިސާގައި އެކިވަރުގެ އަނިޔާވި މީހުންނަށް އަވަސް ޝިފާއަކަށް އެދިވަޑައިގަންނަވާ ކަމުގައިވެސް ރައީސް ވިދާޅުވި އެވެ. 

އެ ހާދިސާގެ ވީޑިޔޯ މީސްމީޑިޔާގައި ދައުރުވާން ފަށާފައިވާއިރު އެ ވީޑިޔޯތަކުން ފެންނަނީ ކުއްލި ގޮވުމަކަށްފަހު އަލިފާންގަަނޑެއް ފަޅައިގެންދާ މަންޒަރެވެ. އެއަށްފަހު އެ އިމާރާތުން ބޯ ކަޅު ކުލައިގެ ދުން އަރަމުންދާ މަންޒަރުވެސް ފެނެ އެވެ. 

އަދި އެގޮވުމުގައި ކައިރީ ސަރަހައްދުތަކަށް ދަގަނޑުގެ ބައިތައް ބުރައިގެންދާ މަންޒަރުވެސް ވީޑިޔާއިން ފެނެ އެވެ. މި ހާދިސާ ހިނގުމަށް މެދުވެރިވި ސަބަބު ދެނެގަތުމަށް ތުރުކީ ސަރުކާރުން މިހާރު ހާއްސަ ތަހުގީގެއްވަނީ ފަށާފަ އެވެ. 

ރައީސްގެ ތައުޒިޔާގެ މެސެޖު ނިންމަވައިލައްވަމުން ދިވެހިން ތިބީ ތުރުކީގެ އަހުންނާއި އުހުތުންނާއެކުކަން ފާހަގަކުރައްވާފައިވެ އެވެ.