ދިވެހިންގެ ޒަކާތުން ޣައްޒާގެ ނިކަމެތިންނަށް ބޯ ފެން

ދިވެހިރާއްޖޭގެ ޒަކާތު ފަންޑުން ޣައްޒާގެ ރައްޔިތުންނަށް ހަދިޔާކޮށްފައިވާ ފައިސާއިން ހާލުގައި ޖެހިފައިވާ ފަރާތްތަކަށް ފެން ފޯރުކޮށްދިނުމުގެ މަސައްކަތް ފަށައިފި އެވެ.

ފަލަސްތީނުގެ ލޮބުވެތި ރައްޔިތުންނަށް އެހީތެރިކަން ފޯރުކޮށްދިނުމަށްޓަކައި ޒަކާތު ހައުސްގެ ފަރާތުން ހަދިޔާކޮށްފައި ވަނީ އެއްލައްކަ ޑޮލަރު (1.5 މިލިއަން ރުފިޔާ) ގެ އެހީ އެވެ. މި ފައިސާގެ އެހީ ފޯރުކޮށްދީފައި ވަނީ ގަތަރު ރެޑް ކްރެސެންޓް ސޮސައިޓީ މެދުވެރިކޮށެވެ.

އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވަނީ އެ އެހީ ޣައްޒާގެ ލޮބުވެތި ރައްޔިތުންނާ ހަމައަށް ވާސިލްވެފައިވާ ކަމަށް ވިދާޅުވެފަ އެވެ. އެ ފައިސާ އިން ހަރަދުކުރާނީ ހާލުގައި ޖެހިފައިވާ ފަރާތްތަކަށް ބޯފެން ފޯރުކޮށްދިނުމަށް ކަމަށް ވެސް މިނިސްޓަރު ވިދާޅުވެފައިވެ އެވެ.

ގަތަރުގެ ރެޑް ކްރެސެންޓުން ބުނެފައި ވަނީ ރާއްޖޭން ދީފައިވާ އެހީން މިހާތަނަށް 6000 ކޭސް ފެން ފޯރުކޮށްދީގައިވާ ކަމަށެވެ.

ރާއްޖޭގެ ޒަކާތު ފަންޑުގެ އެހީގައި ހާލުގައި ޖެހިފައިތިބި ފަސްލަތީނުގެ 60،000 މުސްލިމުންނަށް 50،000 ފެން ކޭސް ފޯރުކޮށްދިނުމަށް ހަމަޖެހިފައިވާ ކަމަށް ވެސް އެ ޖަމިއްޔާއިން ބުނެފައިވެ އެވެ.

މިއީ ރާއްޖޭގެ ޒަކާތު އިދާރާއިން ބޭރުގައި ހާލުގައި ޖެހިފައިވާ ބަޔަކަށް އެހީތެރިކަން ފޯރުކޮށްދިން ފުރަތަމަ ފަހަރު ކަމަށް ވެސް މިނިސްޓަރު ފާހަގަކުރައްވާފައިވެ އެވެ.