ދިއްފުށީ ކައުންސިލަށް ލިބެންޖެހޭ 4.9 މިލިއަން، ހޯދަން އެކަަށީގެންވާ މަސައްކަތެއް ނުކުރޭ

ކ.ދިއްފުށީ ކައުންސިލަށް ލިބެންޖެހޭ 4.9 މިލިއަން ރުފިޔާ ހޯދުމަށް ގަވާއިދާ އެއްގޮތަށް އެ ކައުންސިލުން އަޅަންޖެހޭ ފިޔަވަޅުތައް އަޅާފައިނުވާކަމަށް އޮޑިޓާ ޖެނެރަލްގެ އޮފީހުން ބުނެފި އެވެ. 

ދިއްފުށީ ކައުންސިލުގެ 2022 ވަނަ އަހަރުގެ އޮޑިޓު ރިޕޯޓުގައި ފާހަގަކުރި ގޮތުގައި 2022 ވަަނަ އަހަރުގެ ނިޔަލަށް އެ ކައުންސިލަށް ލިބެންޖެހޭ ޖުމްލަ ފައިސާގެ ތެރެއިން 4،912،880 (ހަތަރު މިލިއަން ނުވަލައްކަ ބާރަހާސް އަށްސަތޭކަ އަށްޑިހަ އަށް) ރުފިޔާ ހޯދުމަށް މާލިއްޔަތު ގަވާއިދާ އެއްގޮތަށް އެކަށީގެންވާ ފިޔަވަޅުތަކެއް އަޅާފައިނުވެ އެވެ. 

މާލިއްޔަތު ގަވާއިދުގައި ބުނެފައިވަނީ ދައުލަތުގެ އިދާރާތަކަށް ލިބެންޖެހޭ ފައިސާ ލިބެންޖެހޭ މުއްދަތުގެ ތެރޭގައި ނުލިބިއްޖެނަމަ، ހަތް ދުވަހުގެ ތެރޭގައި ފައސާ ދައްކަން އަންގައި ލިޔުން ފޮނުވުމަށްފަހު އެ މުއްދަތުގައިވެސް ފައިސާ ނުދައްކައިފިނަމަ އިތުރު ހަތް ދުވަހުގެ މުއްދަތެއް ދިނުމަށްފަހު، އެ މުހުލަތުގެ ތެރޭގައިވެސް ފައިސާ ނުދައްކައިފިނަމަ ޝަރީއަތަށް ހުށަހަޅައިގެން އެ ފައިސާ ހޯދަން މަސައްކަތްކުރަންޖެހޭނެ ކަމަށެވެ. 

ގަވާއިދުގައި ބުނާ ގޮތުން ޝަރީއަތުން އެ ފައިސާ ދެއްކުމަށް އެންގުމުންވެސް ފައިސާ ނުދައްކާނަމަ އެ މައްސަލައެއް ފިނޭންސް މިނިސްޓްރީއަށް ހުށަހަޅައިގެން އެ މިނިސްޓްރީ މެދުވެރިކޮށް އެ ފައިސާއާމެދު ވަކި ގޮތެއް ނިންމަަންޖެހެ އެވެ. 

އޮޑިޓު ރިޕޯޓުގައި ބުނެފައިވާ ގޮތުން ދިއްފުށ ކައުންސިލަށް ލިބެންޖެހޭ 4.9 މިލިއަން ރުފިޔާގެ ތެރެއިން 4.7 މިލިއަން ރުފިޔާއަކީ ނުލިބި ހުންނަތާ އެއް އަހަރަށްވުރެ ގިނަ ދުވަސްވެފައިވާ ފައިސާ އެވެ. 

އޭގެ ތެރޭގައި ހިމެނެނީ 3.8 މިލިއަން ރުފިޔާއަކީ، އޮޑިދޯނިފަހަރު ބަނުމަށް ތިން ހަރުގެއާއި ސްލިޕްވޭއެއް ތަރައްގީކޮށް ހިންގުމަށް ޓެންފޯޓީ ޓެކް ކިޔާ ކުންފުންޏަކަށް ދޫކުރި ބިމަށް އެ ކުންފުނިން ދައްކަންޖެހޭ ކުއްޔެވެ. އެއްބަސްވުމާ އެއްގޮތަށް ފައިސާ ނުދައްކާތީ 2018 ވަނަ އަހަރު އެއްބަސްވުން ބާތިލުކުރި އެވެ. އެ ފައިސާ ނުދައްކާ މައްސަލަ ޝަރީއަތަށް ހުށަހަޅަން މަސައްކަތްކުރާ ކަމަށް ކައުންސިލުން ބުނި ނަމަވެސް އޮޑިޓު އޮފީހަށް އެކަމާ ގުޅޭ ލިޔުމެއް ލިބިފައިނުވެ އެވެ. 

އޭގެ އިތުރަށް ދިއްފުށީ ބަނދަރުގެ ދެކުނުން އޮންނަ ގިރާ ސަރަހައްދު ހިމާޔަތްކުރަން އޭރިއާ ޓެކް ކިޔާ ކުންފުންޏަކަށް ދޫކުރި ފައިސާގެ ތެރެއިން އަނބުރާ ދައުލަތަށް ދޭންޖެހޭނެކަމަށް 2018 ވަނަ އަހަރު ސިވިލް ކޯޓުން ނިންމާފައިވާ 380،000 ރުފިޔާވެސް މިހާތަނަށް ހޯދިފައިނުވެ އެވެ 

ގަވާއިދާ ހިލާފަށް ދިއްފުށީ ފަޅުގައި ޔޮޓެއް ބަނދަރުކުރުމާ ގުޅިގެން އެ ޔޮޓުގެ ވެރި ފަރާތުން ޖޫރިމަނާ ފީގެ ގޮތުގައި ދައްކަންޖެހޭ 384،800 ރުފިޔާއަކީ ދައްކަންޖެހޭ ފައިސާއެއް ނޫންކަމަށް ބުނެ އެ ފަރާތުން ކައުންސިލަށް ސިޓީއެއް ފޮނުވާފައިވާއިރު އެ ފައިސާ ހޯދުމަށް ކައުންސިލުން އެއްވެސް ކަމެއް ކުރިކަން ލިޔެކިޔުމުން ފެންނަން ނެތްކަމަށް އޮޑިޓު އޮފީހުގެ ރިޕޯޓުގައި ފާހަގަކޮށްފައިވެ އެވެ. 

މިފަދައި ދިއްފުށީ ކައުންސިލަށް ލިބެންޖެހި ނުލިބި ހުރި ފައިސާ ހޯދުމަށް ކައުންސިލުން މާލިއްޔަތު ގަވާއިދުގައި ބަޔާންކުރާ އުސޫލުން އަމަލުކުރުމަށް އޮޑިޓު ރިޕޯޓުގައި ލަފާ ދީފައިވެ އެވެ.